Read Q'anjob'al Flp 4 Bible Online

Flp 4 - Q'anjob'al bible

Flp 4

¹Ex wuẍtak, ex wanab camc'ulnebil wuj, caw chi wochej chex toj wila', yujtol in tzalojc'ulal e yayji ocok. E yuj xan ay in paktzil ok in cha'. Yuj tu', ex camc'ulnebil wuj, caw tec'an che yut e ba e yaon oc e c'ul yin Cham Jajawil.

²A tinani', chin tewitok bay Evodia yetok bay Síntique, yet watx' junxanejokab chi yut eb nabal, yujtol nuej ba eb yul k'ab Cham Jajawil.

³Ach wuẍtak, jet mulnajwomal, chin k'an ayach, tol chach colwaj a watx'nen el is k'anej eb janab bay tu', yujtol a cawan eb janab tu', caw max tec'baj ba eb mulnaj wetok, yet max ec' walon el k'anejal yet colbanilej. Yetok c'apaxok, max mulnaj nak Clemente wetok, c'al juntzanxa eb. A eb tu', tz'ibbilxatok bi eb yul tx'an libro bay tz'ibxa yayji co bi ayon ayxa co k'inal tol ayc'al yin tojbalk'inal ti'.

⁴Tzalojokonekc'al yin Cham Jajawil. Chi wal junelxa, tol caw chon tzaloji.

⁵Yowalil caw watx' chi jut co nabal yil masanil anima, yujtol janic'xanej ok jay Cham Jajawil.

⁶Manchak on oc il yuj junok tzet yetal. Jalek masanil tzet chi co na' bay Dios yet chon txajli. A yet chi co k'anon tzet yetal bay Cham, yowalil chi jal c'apax yuj diosalil bay.

⁷Ta axca tu' chi jut co ba, ok yak' Dios is junc'ulal ayon. A is junc'ulal tu' c'am chi nachaj el juj, yujtol c'amxa chi alchaj elok jantak. A is junc'ulal tu', chi taynen janimail c'al co nabal, yujtol junxanej jayji yetok Cristo Jesús.

⁸Axa tinani' ex wuẍtak, ex wanab, jaek oc co nabal yin masanil tzet yel, yin juntzan moj tol ay yelapnok yul co sat, yin masanil tzet tojol, masanil tzet c'am is tacnakil, c'al yin masanil tzet watx', yetok tzet miman yelapnok, yetok c'apax masanil tzet watx' yul sat Dios, yetok juntzan moj yal-lay watx' k'anej yin. A yin juntzan tu' jaokab oc co nabal.

⁹Beybalnejek juntzan cuybanilej yetok juntzanxa tzet e yabnakcan ayin. Masanilc'al tzet max e yabcan oc ayin, c'al tzet max e yil c'apax win, a' che beybalnej. Ta axca tu' chi el e yuneni, ok oc Dios e yetok, Cham chi ak'on co junc'ulal.

¹⁰A tinani' caw chin tzaloj yin Cham Jajawil, yujtol max quin e natek junelxa, yet max e yaontek e colwal ayin. Wojtak tol toc'alta' naan in e yuj; palta c'am wal bay che yatek e colwal ayin, yujtol maj je' e yaontek.

¹¹Toc'al chi waltok juntzan ti' ayex; man yujok majilal xan chi wala', yujtol mayal in cuy in ba wak'on tzaloj in c'ul yin tzet ayin.

¹²Chic'al el wak'len porobal masanil. Ay bay c'am jabok tzet ay ayin; ay bay xin, caw chi yak' pax sobra. Yuj tu', caxc'al nojnak in c'ul, chi yak' sobra tzet ayin, caxc'al chi wak' wajil, c'am jabok tzet chin lo', palta k'aynak inxa, chi techaj wuj.

¹³Tzanc'al tzet yetal chi je' wuj, yujtol chi yak' Cristo yipalil ayin.

¹⁴Palta ayex ti', watx' tzet max el e yuneni, yujtol max e yatek e colwal ayin, yet ayin oc yin yailal ti'.

¹⁵Ex aj Filipos, e yojtakxa, tol a yet max in chaon el yich walon el k'anejal yet colbanilej, yet max in tit bay Macedonia, asan ex colwajnak ex ayin. Asan ex anejtek in gasto bay tu'.

¹⁶Ac'ala' yet max in ec' bay Tesalónica, e yanaktok junel cayel e colwal ayin yuj in gasto bay tu'.

¹⁷Manak e colwal tu' chin saya', ma chi wochej, xan chi waltok juntzan ti' ayex, palta tol chi wochej chi mimanbi is pak tzet che yak' tu' yul sat Dios.

¹⁸Ayin ti', xiwil tzet max el in chaoni, toltax chi yak'xac'al sobra ayin tinani'. A jun e colwal max ul yak' Epafrodito ti', k'okbilc'al chi colwaj ayin. Axca wal junok tzet chi ak'lay bay Dios, tol caw suk'uk'i yoc jab, ma axca junok xajanbal caw wal watx', axca tu' jun e colwal ti', yujtol caw wal chi tzaloj Dios yetok.

¹⁹Yuj tu', ok yak' co Diosal masanilc'al tzet ay chi oc e yuj, atac'ala' is miman beyomal chi yak' ayon yuj Cristo Jesús.

²⁰Mimanokab yelapnok co Diosal yin tojbalk'inal, a ton Cham co Mam. Yun okabi.

²¹Chi watok cawil e c'ul e masanil ex yet exxa Dios yuj Jesucristo. Ti chi ya c'apaxtok eb juẍtak ayic' wetok ti' cawil e c'ul.

²²Yetok c'apax eb yet-xa Dios cayti', mawal eb creyente chi mulnaj bay cham yajaw Roma ti', ti chi ya c'apaxtok eb cawil e c'ul.

²³Ayokab ec' watx'c'ulal Cham Jajawil Jesucristo e yetok e masanil bay tu'.