Read Q'anjob'al Col 1 Bible Online

Col 1 - Q'anjob'al bible

Col 1

¹Ayin Pablo in ti', chekbej in Jesucristo, yujtol axca tu' max el yin c'ul Dios. Ajun juẍtak Timoteo wetok,

²cax chin tz'ibentok jun in carta ti' ayex ex yet-xa Dios bay conob Colosas. Caw yikem ex yin Cristo sic'libil. Yak'okabc'al co Mam Dios*fn* is watx'c'ulal c'al is junc'ulal ayex.

³A yet chon txajli junjuntak el e yuj, chi jalon yuj diosalil bay Dios Cham is Mam Cham Jajawil Jesucristo.

⁴Yujtol max jab e yabixal, tol max e yaoc e c'ul yin Cristo Jesús. Max jabej, tol caw ay e camc'ulal yin masanil eb yet-xa Dios jetok.

⁵Che yun axca tu', yujtol lanan e yechbanen tzet ayoc yipok e c'ul c'ubabil bay satcan. Atax yet max e yaben oc jun k'anejal yet colbanilej caw yel, atax yet tu' max e chail yich e yaon oc jun tu' yipok e c'ul.

⁶A jun yabixal colbanilej albilxa e yabej, a' lanan yal-lay el bay junjun lugar bay yulyibank'inal ti'. Axca junok te te' chi ch'ibi, chi yak' te' sat, axca tu' chi yun yelapnok jun abix ti' bay eb chi abencan ocok. Yetok c'apaxok, axca tu' max yun yelapnok ayex, yettax max babji e yaben yabixal is watx'c'ulal Dios, cax max nachaj el e yuj sic'libil.

⁷A Epafras max ex cuyon yin jun abix tu'. A Epafras tu', caw wal camc'ulnebil juj, yujtol jet mulnajwomal co ba yetok. Yikemc'al chi yut ba yin yak'on serbil Cristo e nan e xol tu'.

⁸A' max alon ayon tol caw ay e camc'ulal yuj Cham Yespíritu Dios.

⁹Yuj tu', xan atax yet max jaben e yabixal, cayc'al ti' co txajli e yuj. Chi co k'an bay Dios tol chi ak'lay e jelanil yuj is Yespíritu, cax chi yak'on nachaj el e yuj sic'libil is yochwan Dios.

¹⁰Ta chex eloc axca co k'anon tu', watx' ok e yut e beybal, yet watx' chi tzaloj wal Cham Jajawil e yetok, yujtol moj wali tol axca tu' che yut e ba. Caw watx' ok el e yuten e beybal, axca junok te te' watx' satni, cax ok e yojtaknej el wal Dios sic'libil.

¹¹Chon txajli c'apax e yuj, yet watx' chi yak' Cham e tec'anil yetok is miman mayk'ak'al. Ta axca tu', ok techaj masanil tzetak yetal e yuj. Caw tec'an ok e yut e ba, cax ok ex tzalojok,

¹²cax ok e yalon yuj diosalil bay co Mam Dios. A Dios chi watx'nen oc co nabal yet watx' ay jalon jet yetok masanil eb yet-xa yayji, yujtol yet onxa sakk'inal.

¹³A' max on colon el yul k'ab k'ekk'inal, cax max on yion oc yul k'ab is C'ajol, Cham camc'ulnebil yuj.

¹⁴A Cham is C'ajol tu', colnej on elok, yujtol jujc'al max cami. A Cham ak'nejcan lajwok co yobtakil.

¹⁵Caxc'al c'am chi je' jilon oc yin co Mam Dios, palta a is C'ajol max tx'oxon Cham ayon, tzetbil yayji, yujtol lajan yetok. A is C'ajol tu', ec'ban yelapnok Cham yintak masanil tzetak yetal watx'nebil yuj.

¹⁶A Cham max ak'balnelay yuj Dios, yet max watx'ji masanil tzetak yetal bay satcan, c'al sat tx'otx' ti'. Juntzan tzetak yetal chi je' jiloni, c'al juntzan c'am chi je' jiloni, ac'al ton Cham watx'nenej masanil. C'al yetok masanil juntzan eb ayoc yajawilal, eb ay is yipalil, caxc'al c'am chi je' jilon oc yin eb, palta a Cham max watx'nen yuj yak'lay serbil Cham yuj.

¹⁷A yet c'amto yulyibank'inal ti', ayxac'alta' ec' Cristo. Yuj Cham, xan watx' yec' masanil tzetak yetal.

¹⁸Jolomej yayji Cham bay iglesia, axa ayon iglesia on ti', axca tol is mimanil Cham jayji, yujtol a Cham chi ak'on co k'inal. A Cham babel ictzojnak xol eb camnak, yet watx' miman yelapnok Cham yintak masanil.

¹⁹Caw tz'akaki ayoc Dios yin Cristo sic'libil, yujtol axca tu' chi yochej.

²⁰Chi yochej c'apax Dios tol junxanej chi yuncan el masanil tzet yetal yetok yuj Cristo, juntzan tzet yetal ay satcan, c'al tzet yetal ay bay yulyibank'inal ti'. Yuj tu', max cam Cristo yin te curus, max el is chiq'uil, yet watx' chi oc masanil yin watx'c'ulalil yetok Dios.

²¹A yet yalan, najat ay ex el c'atan Dios, caw e yajc'ul e ba yetok yin e nabal, yujtol yob e beybal yet tu'. Palta tinani', junc'ulalxa e yayji yetok,

²²yuj camichal is mimanil Cristo. Axca tu' max yun cami, yuj con yion oc yetok, yet watx' c'am jabok co yobtakil, c'al jec'nakilal yul sat.

²³Palta yowalil tol tec'an exc'al yin jun cuybanilej max e yaoc yin e c'ul. Caw tec'anc'al che yut e nabal, axca junok na sic'libil tz'unlay ay yich. Manchak e bek e yaon oc yipok e c'ul jun yabixal colbanilej e yabnakxa. A jun abix ti', lanan yal-lay el bay masanil yulyibank'inal. Ayin Pablo in ti' lanan c'apax walon elok.

²⁴A tinani', lanan wilon yail yuj e watx'ilok, palta chin tzaloji, yujtol a yet chi waben yail yin in mimanil ti', axca tol lanan in tz'aktzen yailal Cristo, jun yailal max yab Cham juj ayon yiglesia on ti', tol axca is mimanil Cham jayji.

²⁵Max in alay oc yak'omalok serbil eb wet creyenteal masanil. Max yak' Dios jun wopiso ti', yuj ex wak'on serbil, yujtol chi wochej chin watx' alnej el is k'anej.

²⁶Ay jun tzet ewanc'uan yayji yuj Dios yettax c'amto yulyibank'inal ti', palta tinani', mayal yak' jojtaknej el ayon yet onxa ti'. A' ak'nej wopiso walon el jun ti'.

²⁷Tix jun miman yelapnok max ak'lay e yojtaknej el ayex ex mayex israelok ti'. Tol cajanxa oc Cristo e yin junjun ex jetok. Yuj Cristo xan chi jaoc yipok co c'ul, tol ok co cha is watx'il Dios.

²⁸A ton Cristo chi jal yabixal. Yin masanil jelanil chi co tenchanej eb anima, cax chi co cuyon c'apax can junjun eb, yujtol chi jochej tol caw chi tec'anbi nabal junjun eb yuj Cham.

²⁹Yuj juntzan ti' xan caw chi wiajtek in c'ulok in mulnaji. Caw chi wak' wip yin masanil in c'ul, yujtol chi yak' Cham wipalil.