Read Q'anjob'al Col 4 Bible Online

Col 4 - Q'anjob'al bible

Col 4

¹Ac'ala' c'apax ayex patronej ex, watx'okab che yut e c'ul yin eb e moso; bayc'al ijan che yut e ba bay eb. Naektek, tol junnej c'apax e patrón bay satcan yetok eb, a ton Cham Jajawil.

²Axa ex e masanil, yelc'ulalokab tol chex txajlic'al, cax che yalon yuj diosalil bay Dios.

³Yetok c'apaxok, chex txajli juj, yet watx' chi oc Cham Jajawil jetok, cax chi je' jalon el is k'anej, c'al yabixal Cristo ak'bil jojtaknej elok. A tinani', yujc'al walon el yabixal tu', xan preso wayji.

⁴Yuj tu', txajlanek wuj, yet watx' jichanokab chi yun walon el yabixal Cham axca wal is mojalil.

⁵A yet chex k'anjab yetok eb man creyenteok watx'okabc'al che yut e beybal satak eb.

⁶Watx' che yut k'anjab e ba, che tx'ox e watx'c'ulal bay eb. Ta che yut axca tu', ok nachaj el e yuj, tzet ok e yut e paktzen is k'anlebal junjun eb ayex.

⁷A juẍtak Tíquico ti', camc'ulnebil juj, caw yikemc'al chi yut ba mulnaj yin masanil yet Dios. Ayoc yak'omalok serbil Cham Jajawil wetok. A' ok tok yal ayex tzetbil wayji cayti'.

⁸Yuj tu', chin chektok toj yal ayex tzetbil jayji on, yet watx' chi aj can e tzalojc'ulal.

⁹Ok tok c'apax juẍtak Onésimo yetok. A Onésimo ti', caw wal yikem, c'al camc'ulnebil juj, junxanej jayji yetok. A ton eb cawan ti', ok tok alon e yabej, tzetak yetal lanan yuj cayti'.

¹⁰A Aristarco ayoc preso wetok cayti', chi yatok cawil e c'ul. C'al nak Marcos, nak yican Bernabé, chi ya c'apaxtok nak cawil e c'ul. Walnakxatok ayex yuj Marcos ti', ta ok apnok ayex tu', chaek apnok nak yin tzalojc'ulalil.

¹¹Chi ya c'apaxtok nak Jesús cawil e c'ul, nak chi yik c'apax Justo. A xol eb chi mulnaj wetok yin jalon elok tzetbil chi yun joc yul k'ab Dios, ti wal asannej eb cawan ti' wet israelal, cax chi wi in mimanc'ulal yin eb.

¹²A nak e yet conob chi yik Epafras ti', ayoc nak yak'omalok serbil Cristo Jesús wetok. Caw wal chi txajli nak e yuj sic'libil, yet watx' che tec'baj e ba yet watx' asan yin tzet chi yochej Dios che ya wal oc e nabal.

¹³Ayin ti', chi wak' in ba testigoal, tol wal yel chex is na'. Chi nalay c'apaxtek eb aj Laodicea yetok eb aj Hierápolis yuj.

¹⁴A Lucas, cham ak'om ambal camc'ulnebil juj, chi yatok cawil e c'ul, yetok Demas.

¹⁵Ak'ek c'apax cawil c'ul eb jet creyenteal aj Laodicea co k'ana'. Ak'ek c'apax cawil c'ul janab Ninfas, c'al eb creyente chi wajbaj ba yin culto bay yatut.

¹⁶Chi lajwi e yawten jun carta ti yab masanil eb creyente ayex tu', cax che yaontok bay eb aj Laodicea, yet watx' chi awtelay c'apax tx'an yab eb bay tu'. Ac'ala' yet ok e chaon tx'an in carta ok yatok eb aj Laodicea tu' ayex, cax che yawten c'apax tx'an e yab e masanil.

¹⁷Alek bay juẍtak Arquipo axca ti': Ak' ep a mulnaj yin opiso max yak' Cham Jajawil ayach, quex chi bay.

¹⁸Ti' ayin wal caw Pablo in ti' chin tz'ibejtok cawil e c'ul yetok wal in k'ab. Naek in tek, tol preso wayji cayti'. Yak'okabc'al Dios is watx'c'ulal ayex bay tu'.