Read Q'anjob'al 1 Ts 4 Bible Online

1 Ts 4 - Q'anjob'al bible

1 Ts 4

¹Ex wuẍtak, ex wanab, ilab ec' albil juj ayex, tol watx' che yutc'al e beybal, yet watx' chi tzaloj Dios e yetok. A tinani xin, yuj chekbej on Cham Jajawil Jesucristo, xan chi cam wal jalontok ayex, tol chex ajc'alcan e yiken jun chekbanil ti'.

²E yojtakxa juntzan chekbanil Cham Jajawil Jesús max ec' jalcan ayex.

³A tzet ok waltok ayex, a ton chi yochej Dios tol chi jikej. Yowalil tol asan yin chi jaoc co nabal, cax c'am chi je' co toj yin ajmulal.

⁴Junjun ex, ex wuẍtak, yowalil che yojtaknej elok, tol asan yin e yistzil che yaoc e nabal. Mimanokab yelapnok e yistzil yul e sat junjun ex.

⁵C'am chi je' chi jochej oc yobtakil yet co mimanil, axca eb man ojtaknenok Dios.

⁶Caw wal manchak jetnejek junok jet creyenteal yuj juntzan ti'. Toxa max cam wal jalon ayex, ta ay mac chi unen juntzan yobtakil ti', ok oc tz'umal eb yuj Dios.

⁷A Cham awtenej on el yet chon oc yetok, yet watx', watx' chi jut co beybal. Man yujok junen yobtakil xan max on yawtej.

⁸Ta ay mac c'am yelapnok juntzan chekbanil ti' yul sat, a Dios chi yintaknej elok, cax manak anima chi yintaknej elok. Palta a Dios anej oc Cham Espíritu Santo jin.

⁹Man yowalilok tol ayinto wal chi waltok ayex, cax che camc'ulnen eb jet creyenteal, yujtol a wal caw Dios chi ak'on nachaj el e yuj tzetbil che yut e camc'ulnelen e ba.

¹⁰Ilab lanan e camc'ulnen eb jet creyenteal yul yet Macedonia tu'. Palta ex wuẍtak, ex wanab, chon tewitok ayex, tol chi ajc'al can e camc'ulal tu'.

¹¹Ak'ek e yip e beybalnen junc'ulal. Man e bekay e yilon e mulnajil junjun ex. Mulnajanek yetok e k'ab axca max jut jaloncan ayex,

¹²yet watx' ayokab e yelapnok yul sat eb comon anima. Yetok c'apaxok, yet watx' c'am chex oc is bilc'ulalok junokxa mactxel.

¹³Ex wuẍtak, ex wanab, chi jochej tol caw wal che yojtaknej elok tzetbil yayji eb creyente chi wayi, a ton eb camnakxa, yet watx' man mimanok chex cus yuj eb, axca wal chi yun cus eb c'am jabok tzet chi yaoc yipok c'ul.

¹⁴Ayon ti', chi jaoc yin co c'ul, tol a ton Jesús max cami, palta max ictzonelay pax ajok. Caytu' ok yun c'apax eb creyente camnakxa tu'. A Dios ok aontek eb yetok Jesús yet ok jayok.

¹⁵A juntzan lanan jalontok ayex ti', cuybej Cham Jajawil yayji. A yet ok jay Cham, a ayon iquis onto ti', man babelok ok on tok satak eb creyente camnakxa tu'.

¹⁶Ok oc jun aw yet ok ak'lay jun chekbanil, a sat ángel ok aj yaw tu', cax ok xuon is trompeta Dios. Axa yayol Cham Jajawil tu' bay satcan, cax ok ictzonelay aj mimanil eb creyente camnakxa tu', yujtol a eb babel ok ictzonelay ajok.

¹⁷Axa on mac iquis onto ti', junej ok yun jilay ajtok yetok eb, cax ok on tok xol asun yet ok co chalen co ba yetok Cham Jajawil bay nan satcan. Axa jayji ec' yetok yin junelnej.

¹⁸Yuj tu' xan mimanc'ulnelejek e ba yuj juntzan cuybanilej ti'.