Read Q'anjob'al 1 Ts 5 Bible Online

1 Ts 5 - Q'anjob'al bible

1 Ts 5

¹Palta man yowalilok chi waltok tiempoal jayubal Cham Jajawil tu' e yab ex wuẍtak, ex wanab.

²Yujtol e yojtakxa sic'libil, tol axca wal junok elk'om chi oc elk'an yet ak'balil, c'am mac ojtakneni jantak hora chi jayi, cay wal tu' ok yun jay c'ual jay Cham Jajawil tu'.

³A yet jun tiempoal tu', ok tz'ak yal anima axca ti': Ayon ti', caw watx' ayon, c'am tzet chi co na', ẍi mi eb. Palta a ton yet tu' yin ayman ok ak'lay c'ayil eb. Axca chi yun jay tiempoal yail unin yin ix ix, caytu' ok yun jay tiempoal yailal eb tu'. Tutun wal c'am junok eb ok colchajcan el bay jun yailal tu'.

⁴Palta ex wuẍtak, ex wanab, man xolok k'ekk'inal ayon ec'ok, yujtol chi nachaj el juntzan ti' juj. Yuj tu', caxc'al axca elk'om ok yun jay jun c'ual tu'; palta moj ton tol makbil jay juj.

⁵Ayon ti', sakk'inalxa yayji co nabal, yet onxa c'ualil. Wal yel, man k'ekk'inalok jayji, may on yetok ak'balil.

⁶Yuj tu' xan maj je' tol lajan ok jut co ba axca juntzanokxa anima. Axca tol waynak el eb, yujtol man makbilok jay jun c'ual tu' yuj eb. Yowalil chon makwajekc'al xin, tec'an chi jut co nabal.

⁷Yujtol a eb tol chi wayi, yet ak'balil chi way eb; axa eb tol uq'uem an, yet ak'balil chi uc'wi an eb.

⁸Palta ayon ti', yet onxa c'ualil. Yuj tu', tec'anokab chi jut co nabal. Yowalil chi ja wal oc Cristo yin co c'ul. Yetok c'apaxok, ayokab co camc'ulal. Ta chi jut axca tu', lajan on axca eb soldado chi col ba yetok is ch'en pichilej chi jenbaj oc txam c'ul. Yowalil chi jaoc yipok co c'ul, tol colchajnak onxa. Ta chi jaoc jun tu' yipok co c'ul, lajan on axca eb soldado k'oxbil ch'en toctor yuj. Cayokab tu' chi jut co colon co ba.

⁹A Dios, man yujok yaon oc yowal c'ul jiban, xan max on is siq'uilok. Max on is siq'uilok yuj co chaon co colbanil bay Cham Jajawil Jesucristo.

¹⁰A Cham max cam co q'uexelok. Yuj tu', caxc'al iquis onto, ma camnak onxa, cax chi jayi, junxanej ok juncan yetok co masanil.

¹¹Yuj tu xin, iptzelejek e ba junjun ex, c'al e yalen oc e tec'anil, axcac'alta' lananxa e beybalnen tu'.

¹²Ex wuẍtak, ex wanab, ay eb chi mulnaj e nan e xol yuj Cham Jajawil, lanan ex yak'on cuenta eb, lananc'al yaon oc eb e nabal. Chon tewi ayex, tol nachajokab el e yuj, tol ak'bil yopiso eb yuj Dios.

¹³Xan yowalil tol miman yelapnok eb yul e sat, che camc'ulnej eb, yujtol yin yet Cham Jajawil chi mulnaj eb. C'amokab owal e nan e xol junjun ex.

¹⁴Ex wuẍtak, ex wanab, chi cam wal jalontok ayex, tol che tenchanej eb c'am chi yal c'ul chi mulnaji. Che yak' tec'anil nabal eb cabtak c'ul. Chex colwaj bay eb c'am is tec'anil yin yet Dios. Miman che yut e c'ul yin eb masanil.

¹⁵Che yilc'al, manchak e pak e ba bay mac chi ak'on yobc'ulal ayex. Watx'c'al che yut e ba ayex junjun ex, yetokc'al bay masanil eb jet animail.

¹⁶Tzalojanekc'al.

¹⁷Txajlanekc'al tojbalk'inal.

¹⁸Alek yuj diosalil bay Dios yuj tzanc'al tzet chex oni. A ton axca tu' chi yochej Dios tol chi jal yuj diosalil bay, yujtol yet onxa Cristo Jesús.

¹⁹Man e tenoc wanaj Yespíritu Dios ayoc e yin junjun ex.

²⁰A eb chi cheklaytok yalil k'anej Dios ayex, manchak e yintaknej el tzet chi yal eb tu'.

²¹Jantakc'al juntzan cuybanilej chi ak'lay ayex, chi cam e yabeni, cax chi cam e naoni, ta yel, ma man yelok. Asan wal juntzan tzet yetal yel che yaoc yin e c'ul.

²²Pojek el e ba xol masanil pojanil yobtakil.

²³Chi jochej tol aokab Dios, Cham ak'om junc'ulalil chex yi wal oc yetok sic'libil. Chi jochej c'apaxok, tol a' chi ak'on cuenta e yanimail, c'al e nabal, yetokc'al e mimanil, yet watx' c'am jabok e yobtakil yet ok jay Cham Jajawil Jesucristo.

²⁴A Cham awtenej on elok, chic'al yun bay chi yala'. Ok yun masanil juntzan ti' yuj Cham.

²⁵Ex wuẍtak, ex wanab, caw wal chex txajli juj bay tu'.

²⁶A yet che yil-len e ba, che yak'lej cawil e c'ul yin camc'ulalil, yujtol yet exxa Dios.

²⁷Yujtol chekbej in Cham Jajawil, xan chi waltok ayex, tol che yawtej jun in carta ti' xol eb creyente masanil bay tu'.

²⁸Yak'okabc'al Cham Jajawil Jesucristo is watx'c'ulal ayex bay tu'.