Read Q'anjob'al Jos 1 Bible Online

Jos 1 - Q'anjob'al bible

Jos 1

¹Ay jun winak chi yik Josué, c'ajol Nun; a jun winak tu' colwajwom bay cham Moisés is chekbej Jehová. Axa yet max cam cham Moisés tu xin, max yalon Jehová bay Josué tu' axca ti':

²A tinani', ilab tol mayal cam in chekbej Moisés, yuj tu' xan achxa ok ekbaj jun conob ti'. Ok ex ec'cantok bay yul a' Jordán ti', axa e yapni oc bay sat tx'otx' tx'otx' ok wak' ayex tu'.

³A masanil tx'otx' tx'otx' bay ok ex ec'ok, e yet ok yuncanok, axca max yun walon bay Moisés.

⁴Masanil tx'otx' chi tojtac'al bay takin tx'otx', masantac'al bay tx'otx' Líbano, chi tojtac'al bay a' miman aej Éufrates, masanil tx'otx' yet eb heteo, masantac'al chi apni oc bay ti a' mar bay yetc'ulal yayub c'u, ok wak'c'al ayex.

⁵A jantak tiempoal ayach ec' bay yulyibank'inal ti', c'amc'al mac ok tec'baj ba a satak. Ayinc'al oc etok, axca max yun wocc'al yetok Moisés. C'amc'al bak'in ok ach in bekcanok.

⁶Tx'ijan chot a ba, cax cha tec'ban a ba, yujtol ach ok a pojic' tx'otx' tx'otx' ti' yin satakejal xol juntzan anima ti', a ton tx'otx' max wak' in ti' wak'on bay eb e yichmam.

⁷Asannej tol chi wal ayach, tol cha tec'baj a ba, tx'ijan chot a ba, cax chekenc'al masanil ley max yalcan in chekbej Moisés ayach. Watx'c'al chi yun eken masanil, xan watx'c'al ok ach elocok.

⁸C'amc'al cha bek awten tx'an yunal ley ti', cha naobtanejc'al, yet c'ualil c'al yet ak'balil, yet ok je' eken masanil tzet chi yala'. Ta ok ekejc'al, a masanil tzet ok onej, watx'c'al ok yun yelocok.

⁹Ayin Jehová in chi wal ayach, tol tx'ijan chot a ba, tec'anc'al chot a ba, c'amc'al jabok chach paxtok entak, tamwal chi xiwaj a c'ul, yujtol ayin Jehová a Diosal in chi wal ayach, tol ayinc'al ec' etok, tzanc'al bay chach eq'ui, ẍi Jehová bay.

¹⁰Yuj wal tu xin, xan max yal cham Josué bay eb yajawil conob Israel:

¹¹Asek bay masanil yul campamento cax che yaloni tol chi watx'nej eb conob is lobej, yujtol a yet cabej tinani' cax chon eq'uektok bay yul a' Jordán, cax chon apni oc jion tx'otx' tx'otx' ok yak' Jehová Dios ayon, ẍi cham.

¹²Max yalon cham Josué bay eb tribual Rubén, yetokc'al bay Gad c'al yetok bay nan tribual Manasés:

¹³—Naektek masanil tzet max yalcan cham Moisés, is chekbej Jehová ayex, tol max yak' co Diosal jun tx'otx' ti' ayex bay chex ayji.

¹⁴Canokabcan eb e yistzil, e yuninal c'al e jobbejal no' bay tx'otx' max yak'can cham Moisés ayex bay k'axepal ec'tek a' Jordán ti', axa masanil ex xin, tiempo wal e toj yin owal, watx'nejek e ba yetok e mitx'k'ab, cax chex babji satak masanil eb jet conob ti', yet watx' chex colwaj yetok eb,

¹⁵masantac'al ok yak' Jehová jun tx'otx' bay ok ayjok eb tu', axca max yun yak'on Cham tx'otx' e yet ti'. A yet mayal occan tx'otx' yetok eb, cax ok ex meltzojtek bay tx'otx' e yet bay k'axepaltek a' Jordán ti', bay yetc'ulal bay chi ajol c'u, catatu' ok e watx'nenxac'al ay e ba sat tx'otx', ẍi cham Josué bay eb.

¹⁶Cax max tak'wi eb nak axca ti': —A masanil tzet chal tu', ok jikej on, caxc'al tzanc'al bay chon a chektok, okc'al jikej co toji.

¹⁷Ok jikejc'al ayach, axca max yun jikenc'al bay cham Moisés yin masanil tzet max yal ayon. Asan xin, chi jochej tol chi occ'al Jehová etok axca max yun yocc'al yetok cham Moisés tu'.

¹⁸Ta ay mac ok tenon tzet chala' cax man ok yikej, a eb tu' tojolc'al cam eb. Asan wal chi jochej tol cha tec'baj a ba cax tx'ijan chot a ba.