Read Q'anjob'al Jos 11 Bible Online

Jos 11 - Q'anjob'al bible

Jos 11

¹A yet max yaben Jabín, reyal Hazor, masanil juntzan tu', max yaontok chekbej bay Jobab reyal Madón, yetokc'al bay eb rey ay bay Simrón, c'al bay Acsaf, yet chi junanej ba yetok.

²Max chekon c'apax tok is chekbej bay masanil eb rey ay bay siquilal tx'otx' bay norte, bay jobeal a' Jordán, bay yetc'ulal sur a' najab Cineret, bay ac'al, c'al bay cawilal yet Dor bay yetc'ulal yayub c'u,

³yetok eb cananeo ay bay yetc'ulal bay chi ajol c'u c'al bay chi toj c'u, yetok eb amorreo, eb hitita, eb ferezeo, eb jebuseo; a ton eb ti' ay bay siquilal tx'otx', yetok eb heveo bay Hermón yul yet Mizpa.

⁴Masanil juntzan eb rey tu' max eltek eb yetok is soldado, yetok chej c'al yetok carruaje yet owal. C'amxa chi bischaj soldado, axcaxac'al yarenail bay ti a' mar.

⁵Max wajban oc ba eb masanil bay cawilal a' najab Merom, yuj yak'on owal eb yin eb israel.

⁶Palta max yalon Jehová bay cham Josué: C'amc'al chach xiw jabok bay eb tu', yujtol ayin ok wak' yunej, tol yab axca ti' yet yecal, masanil eb ok camay latz'naj eb e satak. Ayexxa ok e mak' k'aj yakan is chej eb, cax ok e yaon oc k'ak'al is carruaje eb tu', ẍi Jehová.

⁷Yuj tu xin, a cham Josué, yetok masanil eb ajun yetok max apni oc yin eb ajc'ul tu' bay ti a' najab Merom, yet man naanok yuj eb.

⁸A Jehová max aon oc eb yul k'ab Israel, yuj tu' xan max yak'c'al ayc'ay eb juntzan conob tu' yulak be, masantac'al max apni oc eb bay miman conob Sidón, c'al bay Misrefot-maim, axa bay yetc'ulal bay chi ajol c'u, masantac'al bay ac'al yet Mizpa, tok ayto junokxa max can yin iquisal bay tu'.

⁹Max yikej cham Josué yunen masanil tzet max yal Jehová, max mak' k'aj cham yakan is chej eb ajc'ul tu', max yak'on tz'a masanil is carruaje eb yet owal.

¹⁰Max lajwi tu xin, max jayoc eb bay conob Hazor tol miman conob yayji bay juntzan lugar tu', max mak'on c'apax cam is reyal jun conob tu'

¹¹yetokc'al masanil anima cajan bay tu'. Masanil max yak'can lajwok eb, max yak'on can tz'a eb jun conob tu'.

¹²Lajanc'al max yut juntzanxa conoblak max junanej ba yetok, tol max ayc'ay eb yuj. Max mak'on cam is reyal eb, cax max yak'on lajwok eb anima masanil, axca wal max yun yaloncan cham Moisés is chekbej Jehová.

¹³Palta a eb israel xin, maj yak' tz'a eb juntzanxa conoblak ayxac'alta yet payxa, asan conob Hazor max yak' tz'a eb.

¹⁴Max mak'on cam eb masanil eb cajan bay tu' yetok espada, c'amxa junok max yak'can eb yin yiquisal. Axa masanil no no', c'al masanil tzetak yetal ay bay tu' max yican eb.

¹⁵Maxax yalcan Jehová juntzan chekbanilej bay cham Moisés is chekbej, maxax yalcan Moisés juntzan tu' bay cham Josué, xan max yikej masanil; c'am wal junok toc'al max eq'uel yiban.

¹⁶Max yak' ayc'ay cham Josué masanil juntzan makbej tu', chi yal elapnok, tol a ton tx'otx' siquilal tx'otx', masanil makbej Néguev yetok masanil tx'otx' yul yet Gosén, c'al bay ac'al, yetokc'al jobeal tilak a' Jordán, yetokc'al masanil tx'otx' siquilal tx'otx' ayxa oc yul k'ab israel yetokc'al yac'alil.

¹⁷Chi tojtac'al bay yich witz Halac jun chi ajtok bay Seir, masantac'al chi apni oc bay Baal-gad, a tu' ay jun tu' bay yac'alil Líbano, a ton bay yich witz Hermón. Max mitx'lay masanil is reyal juntzan nacionlak tu' yuj cham Josué, max mak'on camok.

¹⁸Caw wal miman tiempoal max yak' owal yetok eb.

¹⁹Asan wal eb heveo aj conob Gabaón max yak' is trato yetok eb israel; axa pax masanil juntzanxa eb xin, max ak'lay lajwok eb yin owal.

²⁰A Jehová max ak'on pitbok el c'ul eb ajc'ul tu', yet chi tec'baj ba eb satak eb israel yaloni, yet watx' chi c'aylay el eb masanil yuj eb yin c'am yabenc'ulal, axca wal max yun yalon Jehová bay cham Moisés.

²¹A ton yet jun tiempoal tu' max yak' lajwok cham Josué masanil is conoblak eb anaquita cajan bay siquilal tx'otx': a ton bay Hebrón, bay Debir c'al bay Anab c'al yetok bay masanil siquilal tx'otx' yul yet Judá, c'al yul yet israel.

²²Xan c'amxa junok eb anima mimek tel yin is yinatil Anac maxto cancan bay yul is makbej israel; asanxanej bay Gaza, bay Gat c'al bay Asdod maxto cancan jaywanxa eb.

²³Caywal tu' max yun yioncan ec' cham Josué masanil tx'otx' tx'otx' tu', axca wal max yun yalon Jehová bay cham Moisés. Lajwi tu', max pojon ec' xol masanil is tribual israel, yuj sataknen eb. Maxtoc'al lajwi juntzan tu xin, catatu' max oc junc'ulal bay jun lugar tu'.