Read Q'anjob'al Jos 14 Bible Online

Jos 14 - Q'anjob'al bible

Jos 14

¹Max cha eb israel tx'otx' Canaán is satakok, axca wal max yun yak'lay yuj cham sacerdote Eleazar, yetok Josué c'ajol Nun, c'al yetok eb yajaw yayji yin junjun tribual eb israel.

²Toc'al max pojlay ec' tx'otx' yin suerteal xol nan is lajoneb tribual tu', axca wal max yun yaloncan Jehová bay cham Moisés yin tzet chi yutej.

³Yettax yalantok max yak'can cham Moisés tx'otx' bay junxa k'axepal a' Jordán bay is tribual Rubén, c'al bay Gad, yetok c'apax bay nan is tribual Manasés. Axa pax eb levita xin, c'amc'al is tx'otx' eb max ak'layi.

⁴A eb yinatil José, cab tribual yayji eb, a ton yet Manasés, c'al Efraín. A pax eb levita xin, c'amc'al junok makan tx'otx' eb max yi', palta asan juntzan conob bay chi je' cajay eb, c'al yinlak conob tu' bay chi low is jobbejal no' eb.

⁵Max pojic' eb israel tu' tx'otx' tx'otx' yin, axca wal max yun yaloncan Jehová bay cham Moisés.

⁶Max toj eb yinatil Judá bay Gilgal k'anjab yetok cham Josué, axa yalon cham Caleb cenezeo, is c'ajol Jefone bay cham: Natek tzet max yalcan Jehová bay cham Moisés is chekbej, en ach ti', c'al win ayin ti', yet ayic' bay Cades-barnea.

⁷Ayxa cawinak abil in k'inal cax max on chekontok cham Moisés bay Cades-barnea tu', yuj ul jiloni tzetbil yili jun lugar ti'. Axa yet max con meltzoj xin, bayc'al ijan wal yili, caytu' max jut jaloni.

⁸A pax eb nak max ulic' jetok xin, tol max xibtej aj eb nak eb anima, a pax ayon ti' xin, tojolc'al yayji co nabal satak Jehová co Diosal.

⁹Max yak'oncan cham Moisés is ti' ayin: A bay tx'otx' max ach ec' el a beytzej tu', et yayji yetok enatil, yujtol jichan yayji oc a nabal satak Jehová co Diosal, ẍican cham.

¹⁰A jun ti', ayxa 45 abil yaloncan cham Moisés tu' yuj Jehová, yet ayto ec' eb conob Israel bay takin tx'otx'. A yuj tzet albilcan tu', xan iquis into ec' yuj Cham. A tinani', ayxa 85 abil in k'inal,

¹¹palta caw wal tec'an into chi wabej, axca yet max con yaontek cham Moisés co beytzen tx'otx' tx'otx' ti', ac'ala' axca tu' in tec'anil chi wabej, chitoc'al je' in bili, c'al wak'wi owal, axcac'al yet tu'.

¹²Yuj tu' xan chi wal ayach tol chak' tx'otx' siquilal tx'otx' tu' ayin, axca max yun yalon Jehová ayin yet tu'. Max ab yet tu', tol a tu' cajan eb mimek winak yinatil Anac, caw wal tol mimek conob yayji eb bay tu', caw wal watx' yayji is murallail conob eb tu', palta ayin ti', chi waoc Jehová yipok in c'ul tol a' ok colwaj wetok, yet ok je' wion el eb bay tu', axca max yut yaloni, ẍi cham Caleb.

¹³Yuj tu xan max yal cham Josué watx' k'anej yiban cham Caleb, cax max yak'on tx'otx' Hebrón bay, c'al yetok bay masanil yinatil.

¹⁴Axca tu' max yun yoccan tx'otx' Hebrón yetok cham Caleb yetokc'al eb yinatil, masantac'al tinani', yujtol tojol yoc nabal cham yul sat Jehová Diosal israel.

¹⁵A conob Hebrón tu', Quiriat-arba bi yettax payxa, yujtol Arba is bi jun winak caw wal ay is may xol eb yinatil Anac. Max lajwi yioncan junjun tribu is tx'otx', axa yoccan junc'ulalil bay jun lugar tu'.