Read Q'anjob'al Jos 2 Bible Online

Jos 2 - Q'anjob'al bible

Jos 2

¹A yet ayic' cham Josué bay Sitim, max yaontok cawan eb nak winak yin ewantakil, max yalon cham bay eb axca ti': Asek, cax che beytzen tx'otx' tx'otx', mawal axca conob Jericó chi cam e yilon tzetbil yayji, ẍi cham bay eb. Max toj eb xin, a tu' max apni oc eb yak' is posada bay jun xal ajmul ix bay conob Jericó tu', Rahab yoc is bi xal.

²Palta ay ab mac max bet alon bay cham reyal Jericó tu': —Max jayoc juntzan eb israel ul yilon co conob ti', ẍi eb.

³Yuj wal tu xin, xan max yatok cham rey tu' k'anej bay xal Rahab: —I eltek juntzan eb nak israel ayic' yin posadail ayach tu', aoc eb yul co k'ab yujtol toc'al chi ul yiltok eb nak co conobal ti', ẍitok cham rey tu'.

⁴Palta mayal c'ubelay el eb nak yuj xal, axa max yut yaloni: —Yel toni, ay juntzan winak max ec' cayti', palta man wojtakok baytal max ca titoc eb nak.

⁵Axa yet max ay numumok max toj eb, yujtol a yet jun yorail tu' chi makaycan puertail conob. Man wojtakok tzet beal max yi eb. Ta yin aymanil chex tzakloj yintak eb, tekan chito michchaj eb e yuj, ẍi xal bay eb.

⁶Cac'al tu' max yut yalon xal, palta a xal max aon ajtok eb israel tu' bay yiban pananil yatut, cax max c'uban el xal eb bay xol juntzan lino yin topanil yayji.

⁷Lajwi tu' max toj eb nak is chekbej cham rey tu' yintak eb masantac'al max apni oc eb bay ti a' Jordán bay taxbal; maxc'al wal elcantok eb soldado tu xin, cax max makay puertail conob.

⁸Axa yet c'amto chi wayaj eb nak cawan israel tu' max ajtok xal Rahab bay eb nak, cax max yalon bay eb:

⁹—Wojtak tol a Jehová max ak'on jun tx'otx' ti' ayex, xan max jay jun miman xiwc'ulalil jiban on cayti', xan co masanil chon xiw tinani', yuj jaben e k'umal.

¹⁰Max jab k'umal yet max ex el bay Egipto, tol a Jehová max pojon ay nan a' Cakyin Mar, cax max ex ec'tek yin takinal. Max jaben c'apax k'umal tol max e c'aycan el cawan eb reyal amorreo bay k'axepal ec'tok a' Jordán, a ton Sehón c'al Og.

¹¹Caw wal max xiwaj co c'ul yet max jaben k'umal juntzan tu'; yuj tu xin, xan c'am mac chi je' tec'ban ba e satak tinani', yujtol a Jehová e Diosal, a ton is Diosal satcan c'al sat tx'otx' tx'otx' ti'.

¹²Yuj wal tu xin, chin tewi ayex, tol che yak' binaj Jehová e Diosal yin e yak'on e ti' ayin, tol che natek in familia, axca wal chex wut ti' tinani'; xan ak'ek junok seña, tatol yel che yala',

¹³tol che yak' mimanc'ulal yiban in mam c'al in txutx, c'al masanil in nuej, c'al masanil tzet ay bay eb, c'amokab che c'ayilok, ẍi xal.

¹⁴Max tak'wi eb nak cawan tu': —Chi jak' co ti', tol ok ex co natek; asan tatol c'am bay chalil yuj jun ti'. A yet ok yak'on Jehová jun tx'otx' ti' yul co k'ab, chach co colcan el on, ẍi eb nak bay xal.

¹⁵A xal Rahab tu', a tu' ayajtok is yatut bay yiban is murallail conob tu', yuj tu' xan yin c'ojanc'ulalil max yun yaytek t'ununok eb nak yuj xal yin jun lasu bay wentena yina.

¹⁶A yet c'amto chi aytek eb nak, max yalon xal bay eb axca ti': —Asek bay jolomlak witz yet watx' c'am chex ilchaj yuj eb nak chex sayon ec' tu', chex cancan oxebok c'ual bay tu', masantac'al yet chi jay eb nak chex sayon ec' tu', catatu' chex paxtok bay e conob tu', ẍi xal bay eb nak israel tu'.

¹⁷Max yalon eb nak: —Yowalil ok jikej co ti' max a chek jak'can ayach ti'.

¹⁸A yet ok jak'on owal yetok a conob ti', cax ok a locban aytok junok lasu tol cakyin bay wentena bay ok on aytok t'ununok ti', cax cha wajban oc a ba yetok a mam, c'al a txutx, yetok eb a nuej bay yul atut ti'.

¹⁹Ta ay junok chi eltok bay yul atut ti' yet ayoc owal tu' juj, ta chi cam jun tu', c'am chi oc co mulok; palta tatol a bay yul atut tu' ayoctok, cax chi low co k'ab yin, a jun tu' chi oc co mulok on.

²⁰Yetok c'apaxok tatol ok alil jun tzet chi ul jun ti', manxa yowalilok ok jikej bay max jak' co ti' ayach, ẍi eb.

²¹—Chi cha' in c'ul, ẍi xal. Max lajwi yalon toj ba eb nak bay xal, cax max c'albancan oc xal jun tx'an cakyin lasu bay is wentenail is yatut tu'.

²²Axa toj eb nak cawan tu' bay xolak te' jolomlak witz c'uban el ba yin oxeb c'ual. Max ec'c'al eb nak soldado tu' sayon ec' eb, palta majc'al ilchaj eb nak yuj eb, axa paxtek eb bay Jericó tu'.

²³Max lajwi tu xin, max meltzoj aytek eb nak cawan tu', axa k'axpoj ec'tok eb bay a' Jordán tu', max apni oc eb bay ayic' cham Josué, max c'oli yalon eb bay cham tzet max bet yilic' eb bay tu'.

²⁴Max yalon eb nak tol: A Jehová mayal yaoc juntzan anima tu' yul co k'ab, yujtol a eb anima bay tu' axca tol camnak el eb yuj xiwilal juj, ẍi eb.