Read Q'anjob'al Jos 20 Bible Online

Jos 20 - Q'anjob'al bible

Jos 20

¹Max k'anjab Jehová bay cham Josué, max yalon bay axca ti':

²Al bay eb et israelal, tol chi sic' eb juntzanok conob bay chi je' colon ba eb, axca max yun walon bay Moisés.

³Ta ay junok mactxel chi mak'cam junok anima yin tol man yinok c'ul chi tita, chi je' toj colon ba bay junok juntzan conob tu', yet watx' c'am chi mak'lay cam yuj junok is yican jun mayal cam tu'.

⁴A mac chi say is colbal ba bay junok juntzan conob tu', yowalil chi apni oc bay puertail conob, cax chi yaloni, tzetbil wal yayji oc satak eb yicham winakil conob, cax chi chalay octok bay xol conob tu', cax chi ak'lay junok lugar bay chi cajayi.

⁵Ta chi uktelay ec' yuj junok yican jun mayal cam tu', axa eb cham yicham winakil conob tu' c'am chi bekon oc yul k'ab, yujtol max cam jun yet animail tu' yuj, palta man wal yinok c'ul max tita, man yujok ay is yobc'ulalil yin.

⁶A jun mac chi toj col ba tu', chi cancan bay tu', masantac'al chi yal yoc bay satak masanil conob, yet chi beyc'ulnelayi, yetok c'apaxok, masantac'al yet chi cam cham sat sacerdote ayoc yet jun tiempoal tu'. Lajwi tu', chixa je' meltzoj jun mac chi col ba tu' bay is lugar bay max elaj tu', a ton bay yatut, ma bay is conob, ẍi Cham.

⁷Caytu' max yun sic'on el eb israel juntzan conob bay chi col ba eb tu', a ton Cades bay Galilea, bay siquilal tx'otx' yul yet Neftalí, c'al Siquem bay siquilal tx'otx' yul yet Efraín, c'al Quiriat-arba, ac'ala' chi yik c'apax Hebrón, a ton tu' ay bay siquilal tx'otx' yet Judá.

⁸Axa bay junxa k'axepal a' Jordán, a bay pananil yet tz'inan tx'otx' bay yetc'ulal bay chi ajol c'u bay Jericó, a bay tu' max siq'uil eb conob Beser, bay yet tribual Rubén. Axa bay makbej Galaad, a tu' max siq'uil eb conob Ramot, a ton bay yet is tribual Gad. Axa bay yul is makbej Basán, max siq'uil eb jun conob Golán, bay yul yet is tribual Manasés.

⁹A ton juntzan conob ti' max siq'uil eb bay chi col ba eb israel, c'al eb tx'ok conobal cajan ec' bay xol eb tu'. A bay tu' chi je' colon ba mac chi mak c'am junok anima tol man yinok c'ul chi tita. A yuj tu' xan a eb yican jun mayal cam tu' c'am chi je' paktzen bay, cax chi mak'on cam yet c'amto chi beyc'ulnelay yuj eb conob.