Read Q'anjob'al Jos 22 Bible Online

Jos 22 - Q'anjob'al bible

Jos 22

¹Max lajwi tu', max yawten cham Josué eb soldado yet Rubén, c'al yetok eb yet Gad, yetok nan is tribual Manasés.

²Max yalon bay eb axca ti': Ayex ti', mayal wal yi ba e yuj masanil tzet max yalcan cham Moisés, is chekbej Jehová, cax max e yiken c'apax masanil tzet yetal max wala'.

³Masantac'al yet jun c'ual ti', c'al yin masanil jun tiempoal ti', c'am wal janic'ok max e bekcan eb e yet conob, a ti e yet, max e yikej masanil chekbanilej max yak' Jehová co Diosal.

⁴A tinani', mayal yun bay max yak' Cham is ti', yujtol a eb e yet conob masanil, ayxa oc eb yin tzalojc'ulal. Meltzojanek bay e satak max yak'can cham Moisés is chekbej Jehová ayex, bay k'axepal ec'tok a' Jordán tu'.

⁵Asan wal jun tzet chin k'an ayex, tol wal che yikej masanil chekbanilej max yak'can cham Moisés is chekbej Jehová. Chi yal elapnok jun tu' tol wal che camc'ulnej co Diosal, chex tzaklojc'al yintak, c'al e yiken masanil is chekbanil, tzakan exc'al yintak yin e yak'on serbil yin masanil e c'ul, c'al yetok masanil e yanimail, ẍi cham bay eb.

⁶Max lajwi tu xin, max yalon cham Josué watx' k'anej yiban eb axca ti': Ayex ti', meltzojanek bay e tx'otx'al, yetok mimek beyomal, c'al yetok xiwil e jobbejal no', yetok xiwil oro, plata, bronce c'al yetok hierro, yetok c'apax xiwil pichilej. Watx' tol che pojic' masanil juntzan max e yi'can ec' bay eb ajc'ul e xol yetok masanil eb aycan bay tu', ẍi cham. Lajwi tak'enelay eb yuj, axa tojcan eb bay is lugar tu'. Ak'bil is tx'otx' nan eb is tribual Manasés yuj cham Moisés bay yul yet Basán. Axa nanxa is tribual Manasés xin, axa cham Josué max ak'on is tx'otx' eb yetok eb yet israelal bay yetc'ulal yayubc'u bay a' Jordán. Lajwi tu' max meltzoj eb tribual Rubén, eb yet is tribual Gad, c'al yetok nanxa eb is tribual Manasés. Max pojon el ba eb xol janic'xa eb israel bay Silo, bay yul is makbej Canaán, cax max meltzoj eb bay is satak bay yul yet Galaad. A tu' ay is tx'otx' eb, atac'ala' max yun yaloncan cham Moisés yuj Jehová.

¹⁰A yet max apni oc eb soldado tu' bay a' Jordán, bay yulto is makbej Canaán, a bay tu' max watx'nej aj eb jun miman altar.

¹¹Max apni oc yabixal jun ti' bay juntzanxa eb israel, tol max watx'nej aj eb jun altar bay is mojonal Canaán bay yayubc'ual a' Jordán.

¹²A yet max yaben eb axca tu xin, max wajban ba eb masanil bay Silo, yet chi toj eb yak'on owal yin eb tu'.

¹³Max cheklaytok Finees, is c'ajol cham sacerdote Eleazar yin babelal yuj eb bay Galaad bay ayic' eb nan yox tribual tu'.

¹⁴Max toj lajonwan eb yajaw yayji xol eb yet israelal tu' yetok, junjunc'al eb tu', yajaw yayji eb yin junjun tribu.

¹⁵Masanil juntzan eb tu' max tojtac'al eb bay Galaad, bay ayic' nan yox tribu tu', max yalon eb axca ti':

¹⁶—Ayon ti', chi ul jal tzet max yal eb conob Jehová. ¿Tzet yetal jun man watx'ok max e yun yin Jehová co Diosal e yetok? ¿Tzet yuj xan che yintaknej el Cham, cax max e watx'nen aj jun altar yuj e yak'on yobc'ulalil yin?

¹⁷Tokwal man k'okbilok yobtakilal max uj bay Peor, tol aytoc'al ec' jin tinani'. Yujc'al jun tu', xan xiwil eb jet conob max cami.

¹⁸¿Tom man k'okbilok jun tu' ayex, axa tinani' che bekcan Jehová? Tatol tenomtak che yut e ba yin Cham tinani' xin, axa yet yecal chi tit yowal c'ul Cham jin co masanil.

¹⁹Tatol che na' tol c'am chi je' e yoc ayilal bay co Diosal bay jun tx'otx' bay ayex ec' ti', tonek jetok bay tx'otx' tol asannej Jehová ay yet bay ayic' is cajlobal Cham, cax che yion e satak bay co xol on tu'. Palta manchak e yut e ba tenomtakil bay Jehová c'al ayon, cax che watx'nen aj junokxa altar yintak jun yet Jehová co Diosal tu'.

²⁰Naektek tzet max yun Acán is c'ajol Zara, max oc is mul yin juntzan tzet yetal tol sic'bilxa elok tol yowalil chi lajwi ayok, yuj wal jun tu' max tit is yowal Jehová jin co masanil. Tokwal asannej Acán max cam yuj is mul tu', ẍi eb.

²¹Catatu' max tak'wi eb yet Rubén, eb yet Gad c'al yetok nanxa eb yet Manasés bay eb yajawil yayji xol eb yet israelal tu' axca ti':

²²—A Jehová Cham chi Je' yuj Masanil,*fn* yojtak wali tol maj co watx'nej jun altar ti', yuj jak'on yobc'ulalil yin, man c'apax yujok co pojon el co ba yin Cham. Caw wal yojtak Cham yayji, ok yak' Cham e yojtaknej c'apax el ayex ti', ta a yuj jak'on yobc'ulalil yin Cham xan max junej, c'amokab che yak' mimanc'ulal jin.

²³Ta yuj co pojon el co ba yintak Jehová, xan max co watx'nej aj jun altar ti', ma yuj jak'on tz'a xajanbal, ma ofrenda, c'al jak'on ixim trigo, ma juntzanxa xajanbal yet junc'ulalil yiban, aokab wal Cham ok ak'on yowalil ayon.

²⁴Palta max co watx'nej aj jun ti', yujtol c'am chi yochej co c'ul chi yal eb e yuninal bay eb juninal on yet bak'in: ¿Tzet e yalon e yet yin Jehová co Diosal ayon israel on ti'?

²⁵Yujtol a Jehová max ak'oncan a' Jordán ti' co nan e yetok, ayex ex is tribual Rubén c'al ex yet Gad. Yuj tu' xan c'am wal jabok e yalon e yet yin Jehová, ẍi talaj eb. Talaj axca tu' chi yal eb e yuninal yin eb juninal on. Ta axca tu' c'am xam yelapnok Jehová yul sat eb juninal on chi yal tu'.

²⁶Yuj tu' xan max co na' co watx'nen aj jun altar ti', man yujok jak'on tz'a xajanbal c'al jak'on juntzanxa xajanbal bay Jehová.

²⁷Palta asan axca junok testigo chi yuncan co nan co xol e yetok, c'al nan xol eb jinatil, yet watx' ayon ti' chi je' c'apax jak'on serbil Jehová, c'al joc satak Cham yin jak'on tz'a co xajanbal, c'al co xajanbal yuj co mul, yetokc'al xajanbal yet chon oc yin junc'ulalil yetok Cham. Yuj tu xin, a eb e yinatil ayex ti', c'am chi je' yalon eb bay eb jinatil ayon ti': Ayex ti', c'am e yalon e yet yin Jehová, man ẍiok eb.

²⁸Yuj tu' xan max co na' talaj c'uxan ay mac chi alon ayon axca tu' ma bay eb jinatil on, xan ayon ti' chi je' co tak'wi bay eb axca ti': Ilek wali, a eb jichmam on max watx'nej aj eb jun altar ti' bay Jehová, man yujok yak'lay tz'a xajanbal, ma junokxa makan xajanbal, palta asan tol aycan oc yin testigoal co nan co xol e yetok, con chi.

²⁹Colwajokab Jehová jetok yet man ok jak' tenomtakil yin, tamwal ok co bekoncanok, yuj co watx'nen aj junokxa altar yet chi jak' xajanbal, c'al jak'on ixim trigo yin ofrendail, ma jak'on juntzanokxa xajanbal tol is moj a bay altar yet Jehová co Diosal chi jak'a', bay satak is cajlobal, ẍi eb.

³⁰A wal yet max yaben cham sacerdote Finees, yetok eb yajawil conob tzet max yal eb yet is tribual Rubén, is tribual Gad, c'al yetok nanxa eb is tribual Manasés, watx' max yab eb.

³¹Lajwi tu xin, a cham Finees is c'ajol cham sacerdote Eleazar, max yal bay eb axca ti': —A tinani' xin, mayal nachaj el juj tol ayoc Jehová jetok, yujtol ayex ti' man tenomtakilok max e yun satak Cham, yuj tu' xan c'amc'al yailal ok yatek Cham jiban.

³²Max lajwi tu xin, max tak'lencan ba cham Finees yetok eb ajun yetok yetok eb, axa meltzojtek eb tu'. Max el eb bay yul yet Galaad, max apni oc eb bay yul yet Canaán, bay ayic' juntzanxa eb yet israelal eb. Max yalon eb bay eb aycan bay Canaán tu' masanil tzet max yal juntzanxa tribual tu'.

³³A paktzebal max yak' eb tu', max cha' c'ul eb, xan max yal eb watx' k'anej bay Dios yuj. Ataxc'al yet tu', c'amxa tzet max yal eb yuj yak'on eb owal yetok eb is tribual Rubén, yetok eb yet Gad, tamwal yuchon lajwok eb bay is tx'otx'al.

³⁴Xan a eb yinatil Rubén, c'al yetok eb yet Gad, max yak' eb yik jun altar tu' Testigo. Max yalon eb: A jun altar ti', testigo chi yuncan co nan co xol, tol a Jehová co Diosal toni, ẍi eb.