Read Q'anjob'al Jos 23 Bible Online

Jos 23 - Q'anjob'al bible

Jos 23

¹Mimanxa tiempoal yak'on Jehová junc'ulalil bay eb israel. Axa yet icham winakxa cham Josué xin,

²max chekon cham yawtelay masanil eb yet conob israel, yetok eb yicham winakil conob, a ton eb juez, c'al eb yajaw yayji. Max yalon bay eb axca ti': Ayin ti', caw wal icham winak inxa, mayal ec' wabilal.

³Max cam wal e yilon tzet yetal max yun Jehová co Diosal yetok juntzan conob ti', juntzan tol max tec'baj ba yak'on owal jetok, palta a wal caw Cham max yak' owal juj.

⁴Ayin max in pojic' tx'otx' tx'otx' ti' e xol e masanil. Man asanok tx'otx' yet eb nacionlak mayal ayc'ayi max in pojic'ok, palta max in poj c'apax ec' tx'otx' yet juntzanxa c'amto chi ayc'ayi, chi tojtac'al bay a' Jordán, masantac'al bay a' mar Mediterráneo bay yayub c'u.

⁵A Jehová ok ion el masanil eb anima cajan bay juntzan tx'otx' ti', axa ayex ti' ok e yican tx'otx' axca wal max yun yak'on Jehová is ti' yin yak'oni.

⁶Ak'ek wal e yip e yiken masanil tzet chi yal tx'an yunal ley yet Moisés; axca wal yayjican tu', caywal tu' chi yun e yikeni.

⁷Caw wal manchak e somtok e ba xol juntzan anima cajanto ec' e xol ti'. Manchak ex oc yin ayilal bay is diosal eb, manchak e yikej bay, tamwal e yak'on binaj is bi juntzan dios tu', tamwal e yak'on e ti' satak.

⁸Palta tol tzaklojanekc'al yintak Jehová co Diosal, axcac'al max yun co beytek ti'.

⁹A wal caw Jehová max ion el juntzan mimek conob ay is may co satak. Tokwal ay mac chi je' tec'ban ba co satak masantac'al tinani'.

¹⁰A bay junok on chi je' yelaj junok mil, yujtol a Jehová co Diosal chi yak' owal juj, axca wal max yun yak'on Cham is ti'.

¹¹Asan tol che taynej e ba ayex ti', che camc'ulnen wal Jehová co Diosal.

¹²Caw wal chi wochej tol che yojtaknej el juntzan ti': Tatol ok e pojil e ba yintak Dios, cax ok e somontok e ba xol juntzan anima tu', a ton xol juntzan maxto cancan e xol ti', cax che yilen aj e ba yetok eb,

¹³manxa ok yiel Jehová juntzan anima tu' e satak, palta tol ok k'anabax eb axca tx'an yal, yet chex yak'on ayc'ayok, ma axca wal tz'um chi oc yin e yichin, ma axca wal q'uix chi octok yul e sat, masantac'al tol c'amxa junok ex chex cancan bay sat jun tx'otx' max yak' Jehová co Diosal ayon ti'.

¹⁴Ayin ti' toxa ok in camok, palta ayex ti' e yojtak wali tol max yuncan el masanil bay max yak' Jehová co Diosal is ti', c'amxa junok tzet yetal bay max yak' Cham is ti' tol maj yunej.

¹⁵Palta axca wal max yun yion ba masanil tzet yetal watx' bay max yak' Jehová is ti', axca wal tu' ok yun c'apax yaontek Cham masanil pojanil yatakilal albilcan yuj e yiban, tatol man ok e yikej e yunen trato Jehová co Diosal max watx'nej jetok. Tatol axa bay comon dios ok ex oc yin ayilal, axac'al satak juntzan tu' ok ex ay nojanok, ok tit yowal c'ul Jehová e yin, cax yinxac'al aymanil ok ex c'aylay elok, c'amxa junok ex ayex ti' ok ex can bay sat jun tx'otx' manxa watx'ilok max yak' ayon ti', ẍi cham Josué tu'.