Read Q'anjob'al Jos 4 Bible Online

Jos 4 - Q'anjob'al bible

Jos 4

¹Max lajwi yec'cantok eb anima tu' masanil bay yul a' Jordán, max yalon Jehová bay cham Josué:

²Al bay eb nak lajcawan sic'bilxa el oj xol eb conob ti', tol junjunc'al yin junjun tribual

³chi yi ajtek eb jun junok ch'en ch'en bay yul a' tu' bay waan oc eb sacerdote, cax chi yiontok eb bay ok e wajbaj e ba yet jun ak'bal ti', ẍi Jehová.

⁴Yuj tu xin, max yawtentek cham Josué eb lajcawan winak maxax siq'uil tu'.

⁵Max yalon cham bay eb: Ayanektok, masantac'al bay nan yul a', cax chex apni ocok bay satak te' caẍail trato Jehová co Diosal, cax junjun exc'al che yiajtek jun junok ch'en ch'en, junjun yin junjun tribu, cax lajcaweb chi yil ba ch'en.

⁶A ch'en ok yak' testigoal e yin. Yet bak'in ok k'anlej eb e yuninal ayex: ¿Tzet yelapnok juntzan ch'en ch'en ti'? ta ẍi eb,

⁷cax ok e yalon bay eb axca ti': A chi yal elapnok juntzan ch'en ch'en ti', tol a yet max k'axpoj ec'tek eb sacerdote yetok te caẍail trato Jehová, cax max pojon ba a' Jordán bay satak te caẍa tu'. Yuj tu' xan a ch'en ch'en ti' chi yak'c'al testigoal yin tzet max uj cayti' jin, ayon israel on ti', quex chi bay eb, ẍi cham.

⁸Max yikej eb yunen bay tzet max yal cham Josué. Max aytok eb yion ajtek junjun ch'en ch'en bay yul be a' Jordán, junjun ch'en yin junjun tribual eb israel, cax max yiontok eb ch'en bay campamento, max wajban oc bulan eb ch'en axca max yut yalon Jehová bay cham Josué.

⁹Max chekon cham Josué wajbalay oc lajcawebxa ch'en bay yul a' Jordán tu' bay max oc waan eb sacerdote bay yul be a' yetok te caẍail trato, bulantoc'al ay ch'en ch'en tu' tinani'.

¹⁰A yet lecanto oc eb sacerdote bay nan a' Jordán tu', max yikej eb israel tzet max yal cham Josué, axca max yut yalon Jehová. Masanil max yi ba axca max yut yaloncan cham Moisés bay cham Josué tu'. Max ec'tok eb nak soldado yet is tribual Rubén, c'al eb yet Gad, yetok eb yet Manasés, ibil oc is mitx'k'ab eb yet owal, cax max babji eb satak conob axca max yun yaloncan cham Moisés. Ay mi junok 40 mil eb nak tu' max babji satak is conob Jehová, cax max apni oc bulan anima masanil bay jun ac'al sataktek Jericó. Yinxac'al aymanil max yun yec'tok eb conob Israel. A yet max ec'cantok masanil eb anima tu xin, catatu' max ec'tok eb sacerdote yetok te caẍail is trato Jehová. Max lajwi tu xin, axa babji eb satak masanil anima tu'.

¹⁴A yet jun c'ual tu', a Jehová max ak'on yun eb israel, tol chi ilay can cham Josué, cax tol miman yelapnok yul sat eb yul is tiempoal yet iquis ec'ok, axca yayji oc cham Moisés yul sat eb.

¹⁵A yet max lajwi yec'cantok eb conob bay yul a' Jordán, max yalon Jehová bay cham Josué:

¹⁶Al bay eb sacerdote inej oc te caẍail trato, tol ec'okabtek eb bay yul a' tu', ẍi Jehová.

¹⁷Max yalon cham xin: Ajanektek bay yul a', ẍi cham.

¹⁸Maxc'al ajol eb bay ti a' tu xin, max ayol secnaj a' wajancan bay yiban ajtok tu' cax max ec'ay secnaj a', c'al pulil a' yul is be axca yet max oc wanaj a' tu'.

¹⁹A yet max ec'tok conob Israel yul a' Jordán, yet wal 10 waay babel xajaw, cax max apni oc eb bay Gilgal, sataktek Jericó bay yetc'ulal bay chi ajol c'u.

²⁰A bay tu' max wajay oc bulan ch'en ch'en max yiajtek eb bay yul a' Jordán.

²¹Max yalon cham Josué bay eb yet conob: Ta ay bak'in ok k'anlej eb e yuninal ayex: ¿Tzet yelapnok juntzan ch'en ch'en ti'? ta ẍi eb,

²²alek bay eb yuj tzet max yun e yec'tek bay yul a' Jordán,

²³c'al tzet max yut pojon ba a', yujtol a Jehová co Diosal max aloni, tol yin takinal max yun jec'tek, axca max yut pojon ba a' Cakyin Mar yuj Cham yet max on ec'tek, a ton yet max on el bay Egipto.

²⁴Axca tu' chi yun yojtaknen el masanil anima ay bay yulyibank'inal ti', tol miman yayji oc is yipalil Jehová, yuj wal tu xin, ayokab yelapnok Jehová yul e sat yin tojbalk'inal, quex chi bay eb, ẍi cham Josué.