Read Q'anjob'al Jos 5 Bible Online

Jos 5 - Q'anjob'al bible

Jos 5

¹Masanil eb reyal amorreo ay bay k'axepal ec'tek a' Jordán bay yetc'ulal bay chi tojcan c'u, c'al yetok eb reyal eb cananeo bay ti' a' mar Mediterráneo, max yab eb k'umal yuj tzetbil max yut pojon ay Jehová is nan a' Jordán yet max ec'tek eb israel bay yul a'. Yuj wal tu' max xiwaj eb, c'amxa junok eb chi tec'baj ba yeltok yak'on owal yin eb israel tu'.

²A yet tu' max yal Jehová bay cham Josué: Watx'nej jayebok ch'en cuchillo, cax chaloni tol chi ak'lay circuncidar eb et conob, ẍi Cham.

³Max watx'nen cham Josué ch'en cuchillo tu', cax max ak'lay circuncidar masanil eb israel yet ayic' eb bay tzalan Aralot.

⁴Max ak'lay circuncidar masanil eb, yujtol a masanil eb nak tol tiempoal wal yoc yin soldadoal yet max el eb bay Egipto, maxax camcan eb nak tu' bay takin tx'otx'.

⁵Yujtol a eb nak max el bay Egipto tu', ak'bil circuncidar eb tu' masanil, axa eb nak max alji bay takin tx'otx' xin, manto ak'bilok circuncidar eb nak tu'.

⁶Cawinak abil max ec' conob Israel bay takin tx'otx', yuj tu' xan a eb nak tiempoal wal yak'on soldadoal maxax camcan eb nak tu', yujtol maj yikej eb tzet max yal Jehová. Yuj tu' xan max yal Cham tol c'am junok eb ok ilon tx'otx' tol albilcan bay eb jichmam tol ok yak' tx'otx' bay eb, tx'otx' tol caw wal yax sat.

⁷Yuj wal tu' xan max chek cham Josué yak'lay circuncidar is c'ajol eb, a ton eb max cancan q'uexelok is mam, c'amtoc'al chi ak'lay circuncidar eb yujtol yin beyil ayoc eb yet max alji eb nak tu'.

⁸Axa yet max lajwi yak'lay circuncidar eb nak xin, max ayji ec' eb nak bay yul is campamento, masantac'al max yal watx'ji eb.

⁹Max yalon Jehová bay cham Josué: A yetok jun circuncisión ti' chi wican el buchwal k'anej eb Egipto e yin, ẍi Jehová. Yuj tu' Gilgal*fn* max yikcan jun lugar tu'.

¹⁰A yet ayto ec' eb israel yul campamento bay Gilgal tu', yet wal 14 waay xajaw yet yayc'ualil, cax max chaon eb k'in Pascua bay ac'al sataktek Jericó.

¹¹A yet junxa c'ual, a tzet yetal chi el bay sat tx'otx' tu', axa max lo eb, a ton ixim pan c'am yich, c'al ixim trigo toc'al k'anbinak yul sam.

¹²Ataxc'al yet tu xin, max oc wanaj jay maná, xan majxac'al lo' eb israel maná tu', a ton yet jun abil tu' axac'al tzet chi el bay sat tx'otx' Canaán tu' max lo eb.

¹³A yet jun c'ual max yil cham Josué jun axca yili soldado bay cawilal Jericó, ibil aj is yespada yul is k'ab, cax max jitzontok ba bay is cawilal, max k'anlen bay axca ti': —¿Tom jetok ay ach ocok, ma tol yetok eb ajc'ul oc jin? ẍi cham bay.

¹⁴—C'amak, ayin ti' max in jayoc yuj woc yajawilok eb soldado Jehová, ẍi. A yet max yalon Cham jun tu' cax max ay nojan Josué satak, cax max yalon ba bay, c'al k'anlen bay: —A chekbej in ach Mamin. ¿Tzet chi yochej a c'ul chi wun tinani'? ẍi Josué.

¹⁵Cax max tak'wi Cham axca ti': —Iel a xanab, yujtol a jun lugar bay waan ach oc ti', yet Jehová yayji, ẍi. Cax max yiken cham Josué ti' bay.