Read Q'anjob'al Jos 6 Bible Online

Jos 6 - Q'anjob'al bible

Jos 6

¹C'am junok mac chi je' yeltek, tamwal junok mac chi je' yoctok bay yul conob Jericó, caw wal watx' makay is puertail yuj xiwc'ulalil bay eb conob Israel.

²Max yalon Jehová bay cham Josué: Ayin ok waoc conob Jericó ti' yul a k'ab yetok is reyal c'al eb is soldado.

³E masanil ayex soldado israel ex ti', junjunc'al c'u ok ex ec' oyoyok junel yin conob ti', cax wakeb c'u ok e yun axca tu'.

⁴Ukwan eb sacerdote chi babji satak te caẍail trato, cax junjunc'al eb ibil oc junjun is cacho. Axa yet is suk c'ual xin, ukel ok ex ec' oyoyok yinlak conob tu', cax ok xuonc'al eb no cacho tu'.

⁵Axa wal yet ok e yabeni, tol manxa ok oc wanaj xuon eb no cacho tu', cax ok el e yaw yin ipejal; axa ok e yiloni, ok ay weknaj murallail conob ti'. Axa wal yet jun bek tu', junjun exc'al chex oc yul conob bay yetc'ulal bay ayex ec' tu', ẍi Jehová.

⁶Cax max yawtentek cham Josué eb sacerdote: Iektok te caẍa yet is trato Jehová. Ukwan ex chex babji satak te', cax ibilokab no cacho e yuj, ẍi cham.

⁷Max yalon c'apax cham bay eb conob axca ti': Asek e yoymanej junelok jun conob ti'. Axa eb nak soldado ak'om owal, babelokab toj eb nak satak te caẍail trato Jehová, ẍi cham.

⁸Max yikej eb masanil bay tzet max yal cham Josué; axa eb nak ukwan sacerdote, babel eb satak te caẍail trato Jehová, cax chi xuonc'al eb is cacho, cax tzakan te caẍa tu'.

⁹Babel toj eb soldado ak'om owal satak eb sacerdote tu'; ay junxa makan eb xin, tzakan max yuncanok, axa eb sacerdote max occ'al ijan xuon eb is cacho.

¹⁰Max yalon cham Josué bay eb soldado tu', tol c'am junok eb nak chi el yaw tamwal k'anjabi, masantac'al a cham chi aloni, catatu' chi aj yaw eb masanil yin ipejal.

¹¹Max yalon cham Josué, tol chi ec' oyoyok te caẍa tu' yuj eb yin junel bay yinlak conob tu'. Max lajwi tu', max meltzoj cham yetok masanil eb anima bay campamento. A bay tu' max ec' ak'bal yuj eb.

¹²Axa yet junxa c'u, caw wal puch k'inibalilto max aj wan cham Josué, cax max yion pax aj eb te caẍail is trato Jehová.

¹³Ac'ala' babel eb ukwan sacerdote satak te caẍa tu'. A yet tu', lanan c'apax xuon eb cacho, axa eb nak soldado xin, ay eb babel, ay pax eb tzunan. Axa bay nan, a tu' ayoc te caẍail is trato Jehová, c'al eb xuom cacho tu'.

¹⁴Axa yet is cab c'ual, max yoymanej pax eb conob Jericó. Max lajwi tu', max meltzoj pax eb bay is campamento, cac'al tu' max yut ba eb yin wakeb c'ual.

¹⁵Axa yet suk c'ual xin, caw wal puch k'inib max aj wan eb, cax max toj pax eb yoymanej conob tu' junelxa. Ukel max ec' oyoyok eb yet jun c'ual tu'.

¹⁶A yet is yukelal tu', yet max xuon eb sacerdote is cacho, max yalon cham Josué tu' bay masanil eb anima: Awjanek, mayal yaoc Jehová jun conob ti' yul co k'ab.

¹⁷Masanil jun conob ti' yetokc'al masanil eb anima ayic' bay yul tu', mayal yal Jehová tol masanil eb ok c'ayilok, asan xal Rahab, xal ajmul ix, c'am chi c'aylay elok yetok masanil mac ayoctok yetok yul yatut, yujtol a xal max colon el eb nak max ulic' beytzen jun lugar ti' juj.

¹⁸Chi cam e yabeni, tol ayta wal junok tzet yetal ay bay xol conob tu' che mitx'a', ma e yiontok e yetok, yujtol mayal yal Jehová tol masanil chi c'aylay elok, yujtol ta ay tzet ok e mitx'a', axa tit yowal c'ul Jehová jiban co masanil tu', cax chi jayoc uchlejbail jiban.

¹⁹Asan ch'en oro, ch'en plata, yetokc'al tzet yetal tol bronce, c'al hierro, a juntzan tu' chi occan yetok Jehová, cax chi tojcan yul is c'uanbal Cham, ẍi Josué bay eb.

²⁰A wal yet jun bek tu' max xu eb sacerdote no cacho tu', max yaben masanil conob Israel, cax max el yaw eb masanil yin ipejal, axa yay weknaj murallail conob tu', ayman max oc eb yul conob tu', junjunc'al bay yetc'ulal bay ayic' eb tu'.

²¹Cax max mak'lay cam eb anima ayic' bay yul conob tu' masanil, eb winak, eb ix, c'al eb ichamtak animaxa, c'al masanil eb unin, yetok c'apax no no', no wacax, no calnel, c'al no burro, masanil max c'ayilok.

²²Maxax yal cham Josué bay eb nak cawan max betic' iloj conob yin babelal: Asek, cax che yion eltek xal ajmul ix yetok is familia bay yatut axca max yun e yaloncan bay, ẍi cham.

²³Max toj eb nak xin, cax max bet yion eltek eb nak xal bay yatut, yetok is mam c'al yetok is txutx, c'al yetok eb is nuej, yetok masanil familia, c'al masanil is tzet yetal eb, cax max ilaytok eb yuj eb israel bay jun lugar yiniltok campamento.

²⁴Max lajwi tu' max yaon oc eb israel tu' k'ak'al conob tu', max tz'atok masanil tzet yetal. Asan ch'en plata, ch'en oro, yetokc'al tzet yetal tol bronce, c'al hierro max yitok eb, cax max c'ubaj eb bay is c'uanbal Jehová.

²⁵Asan xal Rahab yetok is mam, c'al is txutx, c'al is familia, maj c'ayil yuj cham Josué, yujtol max colwaj xal bay eb nak max beytzen conob Jericó tu' yet babelal. Ataxc'al yet tu' max cancan xal yetokc'al yinatil xol conob Israel.

²⁶Max lajwi tu xin, cax max yalon cham Josué jun k'anej ti': Catabnebilokab yuj Jehová mactxel chi ca watx'nen aj jun conob ti', cax camokab tok is babel unin yet ok ay cimientoal yich, cax camokab tok is tzunan unin yet ok oc is puertail, ẍi cham.

²⁷Caw wal max colwaj Jehová yetok cham Josué, caw wal miman max yun binaj cham bay masanil juntzan lugar tu'.