Read Q'anjob'al Jos 8 Bible Online

Jos 8 - Q'anjob'al bible

Jos 8

¹Max lajwi tu' max yalon Jehová bay cham Josué: Manchak ach xiwi, c'amc'al chach paxtok entak. Itok masanil eb soldado, cax chach toj yin owal yin conob Hai. Abek wali, ayin ok waoc jun conob tu' yetok is reyal, c'al masanil is makbej yul a k'ab.

²Axca wal max e yut conob Jericó yetok is reyal, caytu' ok e yut c'apax jun conob ti' yetok is reyal, axa pax masanil tzetak yetal ay jun conob tu xin, c'al no no', chi je' yoccan e yetok yet mayal ayc'ay e yuj. Atok junok makan eb nak soldado yet chi toj c'uban el ba yintak eltok jun conob tu', axa juntzanxa eb soldado xin, chi tx'emon eltek eb aj conob tu', ẍi Jehová.

³Lajwi tu xin, max watx'nej ba cham Josué yetok eb soldado yet ok tok eb yin owal yin conob Hai, max sic'on el 30,000 eb soldado caw jelan yin owal, cax max chekontok eb yet ak'balil.

⁴Max yalon cham bay eb nak: Chi cam e yabeni, a tu' chex toj bay yintak eltok conob tu', cax che c'uban el e ba bay tu', cax makbilxac'al e yuj.

⁵Ayinxa yetok juntzanxa eb soldado ti', ok co jitztok co ba bay cawilal conob tu'. A yet ok elul eb ajc'ul tu' jin, cax ok on el bay eb, axca max yun yel eb jet conob bay eb yet babelal.

⁶A yet ok tit eb jin tu', cax ok on el bay eb, a mi naon eb tol ok on ayc'ay junelxa.

⁷Palta a yet ok e yilon axca tu', cax ok ex eltek bay che c'ubaj el e ba tu', axa e yoc lemnaj yul conob tu', yujtol a Jehová chi aon oc jun conob tu' yul co k'ab.

⁸A yet mayal ayc'ay jun conob tu' e yuj xin, cax che yaon oc k'ak'al axca max yut yalon Jehová. A jun ti' chi wal ayex, ẍi Josué.

⁹Max lajwi tu', max yalon cham tol chi toj eb soldado, cax max toj eb. Max apni oc eb c'ubaj el ba bay nan xol Betel yetok Hai tu', bay yetc'ulal bay chi toj c'u, yak'ban cham Josué, maxto ec' ak'bal yuj bay yul campamento.

¹⁰Axa yet junxa c'ual max pet aj wan cham Josué, cax max wajban oc juntzanxa eb soldado. Lajwi tu', max babji cham satak eb yetok eb yajawil conob Israel. Max toj eb yak'on owal yin eb aj Hai.

¹¹Max jitzonxac'al oc ba eb bay satak conob tu' bay yetc'ulal bay ayoc is puertail, max watx'nen aj eb is campamento bay ac'al. Bay is paq'uil ay jun jobeal nan xol eb yetok conob tu'.

¹²5,000 eb soldado max chek cham Josué c'ubaj el ba bay nan xol Betel yetok Hai tu' bay yetc'ulal yayub c'u.

¹³Yuj tu' xan cab makan max yut ba eb soldado tu', jun makan eb max toj c'ubaj el ba bay yintak conob tu' bay yetc'ulal bay chi toj c'u, axa junxa makan eb xin, maxto cancan eb yul campamento bay yetc'ulal norte, axa pax cham Josué xin, ak'balilto max aytok bay jun jobe.

¹⁴Axa yet max yilontek cham reyal Hai tzetbil yayji ocok, max pet aj wan, cax max eltek yetok masanil eb soldado yet puch k'inibalil, axa chalen ba eb yetok eb israel bay jobeal chi ayapnok bay ti a' Jordán, palta man yojtakok eb, tatol ay eb nak soldado chi c'ubaj el ba bay yintak conob eb tu'.

¹⁵Axa yet max yilon cham Josué tit eb, axca tol max xiw cham, cax max el yetok eb soldado yin anejbail, cax bec'al toj eb bay tz'inan tx'otx'.

¹⁶Xan max chaon masanil eb soldado yet Hai orden tol chi uktelay cham Josué yetok is soldado, cax yelxac'al najat max el eb bay is conobal tu'.

¹⁷C'amxa junok winak max can bay conob Hai c'al bay conob Betel, masanil eb max toj yintak cham Josué c'al yintak is soldado. Yujc'al max toj eb masanil yintak eb israel, xan max beklaycan jakan conob yuj eb.

¹⁸Lajwi tu', max yalon Jehová bay cham Josué: Etc'ulnejtok a lanza yin conob Hai, yujtol mayal waoc jun conob tu' yul a k'ab, ẍi Jehová. Yin aymanil max yetc'ulnejtok is lanza yin conob Hai tu'.

¹⁹Yet wal jun bek tu' max octok lemnaj eb soldado yul conob tu', eb max c'ubaj el ba. Axa yet max ayc'ay yuj eb xin, max yaon oc eb k'ak'al.

²⁰Axa yet max meltzojtok t'anan eb aj Hai, max yilon eb, topopixac'al yaj mubal is conob eb satcan. C'amxa bay max je' colon ba eb yujtol a eb israel chi el bay eb tu', max meltzoj eb yak'on owal yin eb.

²¹Yujtol max yil cham Josué, tol topopixac'al yaj mubal conob, xan max yojtaknej elok tol mayal oc eb nak soldado bay yul conob tu'. Yuj tu' max meltzoj cham yetok is soldado, cax max ak'lay c'ayil eb aj Hai tu' yuj eb.

²²A jun makan eb nak ayxa oc yul conob tu', max eltek eb yin eb, c'al eb nak uktebil yuj eb tu', max meltzoj eb nak yin eb. Yuj wal tu xin, c'amxa junok mac maxto je' yeli, max cam eb masanil yuj eb israel.

²³Asanxanej cham reyal Hai yin yiquisal max yitok eb bay satak cham Josué.

²⁴A yet max lajwi cam masanil eb soldado max ukten eb israel tu', axa tojpax eb bay yul conobal Hai, max bet c'ayonxac'al el eb jantakto anima max can bay yul conob tu'.

²⁵A yet jun c'ual tu', max cam 12,000 anima aj conob Hai, ix c'al winak.

²⁶C'amc'al jabok xewilal yuj cham Josué, yetok masanil eb israel, masantac'al max yal camcan el masanil eb aj Hai.

²⁷Max yitok eb israel tu' no no', c'al masanil tzetak yetal axca max yun yalon Jehová bay cham Josué.

²⁸Max tz'acantok conob Hai yuj cham Josué; masanil na axac'al yechel txequelcan tinani'.

²⁹Max t'unban aj cham Josué tu' cham reyal Hai tu' yin k'ab jun te te' masantac'al yet max k'ekbi. Axa yet max ayxac'al numnaj xin, cax max chekon yilay aytek. Max ilaytok bay puertail conob, cax max tojcan bulan ch'en yiban. A jun bulan ch'en tu' txequeltoc'al tinani'.

³⁰Max lajwi tu xin, max wajban can aj cham Josué jun is altar Jehová Diosal israel bay yich witz Ebal.

³¹Max watx'nej axca max yun yaloncan cham Moisés, is chekbej Jehová bay eb israel, ac'ala' axca tu' yayjican yul libroal ley bay chi yal axca ti': A ch'en ch'en man josbilok chi oc yin junok altar, ẍi jun ley tu'. Max lajwi tu', max yak'on tz'a eb israel xajanbal yiban ch'en satak Jehová, max yak'on c'apax eb xajanbal yet junc'ulalil.

³²Satak wal conob max tz'iben oc cham Josué jun ley max yak'can cham Moisés bay yet israelal yin ch'en ch'en yet altar tu'.

³³Max lajwi tu xin, masanil eb israel, c'al eb tx'ok conobal cajan xol eb, c'al eb yicham winakil conob, yetokc'al eb yajawil eb soldado, c'al yetok eb juez, max oc eb bay is tz'eyil te caẍail trato Jehová, bay satak eb sacerdote levita, a ton eb max jolomxic'nentok te caẍa tu'. Nan eb anima tu' max tojcan bay yich witz Gerizim, axa nanxa max tojcan bay yich witz Ebal. Axa eb sacerdote xin, lanan yalon eb watx' k'anej yin israel, axca wal max yun yaloncan cham Moisés, is chekbej Jehová yet yalantok.

³⁴Lajwi tu' max yawten cham Josué jun ley albilcan yuj cham Moisés bay masanil eb israel, ajun eb ix ix, c'al yetok eb coc'al unin, c'al eb anima tx'ok conobal ayic' xol eb. C'am junok k'anej tol maj yawtej cham Josué yab eb conob, a ton masanil watx' k'anej c'al catab k'anej, tz'ibabil yul tx'an libroal ley max yawtej.