Read Q'anjob'al Jos 9 Bible Online

Jos 9 - Q'anjob'al bible

Jos 9

¹Max abchaj k'umal tzet max yun Josué yuj eb reyal eb heteo, eb amorreo, eb cananeo, eb ferezeo, eb heveo c'al eb jebuseo cajan bay siquilal tx'otx' satak eltok ti a' Jordán, bay satlak ac'al, c'al bay is tilak a' mar Mediterráneo, masantac'al chi apni oc bay Líbano.

²Yuj tu' max lajtinej ba eb col-len ba yet chi toj eb yak'on owal yetok cham Josué, c'al yetok conob Israel.

³Palta a eb heveo cajan bay Gabaón, a yet max yaben eb yuj tzet max yuncan conob Jericó, c'al Hai yuj cham Josué,

⁴max naon eb tzet chi utlay cham Josué yuj eb. Max wajban aj eb icham coẍtal c'al icham tz'um yet vino olquiẍtakxac'al, max yaon ajtok eb yiban is burro cax max toj eb.

⁵Max yaon oc eb icham pichilej nic'quiltakxac'al, max yaon oc eb icham xanabej, cax max yiontok eb nak ixim pan k'uxtakxac'al ayxa xil bay yul pichil is lobej.

⁶A yet max apni oc eb bay Gilgal, max yalon eb bay cham Josué, c'al bay eb yajawil conob Israel: —Caw wal najat bay petoj on, chi jochej che watx'nej junok e trato jetok, ẍi eb.

⁷Axa tak'wi eb israel bay eb heveo tu': —Tekan axc'a cawil-lak ti' cajan ex, ¿tzet wal ok jut co watx'nen junok co trato axca tu'? ẍi eb.

⁸Max oc ijan eb yalon bay cham Josué: —Bekan co c'ul joc e chekbejok jaloni, ẍi eb. Cax max k'anlen cham Josué bay eb: —¿Mac ex txel ayex ti'? ¿Baytal petoj ex? ẍi cham.

⁹Max tak'wi eb axca ti': —Caw wal najat petoj on; a yuj max jabej tol ay is may Jehová e Diosal, cax max jabeni tzet max e yun bay Egipto,

¹⁰yetokc'al tzet max yun Jehová yin eb cawan reyal eb amorreo bay k'axepaltok a' Jordán, a ton Sehón ay bay Hesbón yetokc'al Og bay Astarot yul yet Basán.

¹¹Yuj wal tu xin, xan max yal eb co yajawil on, c'al eb jet conob on: Iektok e lobej bay yulak be cax chi toj e yilon eb israel tu' bay ayic' eb, cax che yaloni tol chon oc is chekbejok eb, cax chi co watx'nen junok co trato yetok eb, ẍi eb ayon.

¹²A yet max on tit ex co sayon ec'ok, caw wal k'axan ixim pan ti' yet max jiontek, axa tinani', k'uxtakxac'al ixim, cax takinxa ixim.

¹³Ac'ala' juntzan no tz'um ti', caw wal tol ac' no', cax max jaon aytok vino yul, axa tinani' olanxa; ac'ala' co pichil ti', co xanab ti' olquiẍtakxac'al yujtol caw wal najat petoj on, ẍi eb.

¹⁴Max yablen eb israel lobej eb tu', palta majc'al pax k'anlej eb bay Jehová yuj tzet wal chi yun eb yetok eb.

¹⁵Max lajwi tu' cax max watx'nen cham Josué trato yet amigolejbail yetok eb. Max yalon cham Josué tol chi yak' mimanc'ulal yin eb, c'am chi c'aylay el eb yuj. Ac'ala' axca tu' max yun yalon c'apax eb yajawil conob israel, max yak'on eb is ti'.

¹⁶Cabjial wal tu', max yaben aj eb israel tol a bay cawilal eb tu', a tu' cajan ec' eb gabaonita tu'.

¹⁷Lajwi tu' max toj eb israel sayon ec' eb. Yinxa is cabjial max apni eb bay conob eb tu': tol a ton conob Gabaón, Cafira, Beerot c'al yetok Quiriat-jearim.

¹⁸Maj je' mak'lay cam eb yuj eb israel, yujtol mayal yak' binaj eb yajawil conob Jehová is Diosal, yet max yak'on eb is ti' tol ok yak' eb mimanc'ulalil yin eb. Yuj tu' xan max tit yowal eb israel yin eb yajawil conob tu'.

¹⁹Max yalon eb yajawil conob tu' bay eb yet conob axca ti': —Ayon ti' max jaoc Jehová co Diosal co testigook, tol c'am chi co mak'cam eb, yuj tu xin, c'am tzet chi jut eb.

²⁰Ok canc'al eb axca tu' yet watx' c'am chi co q'uex co ti' max jak' satak Jehová, ta c'amak ok tit yowal c'ul jin, ẍi eb.

²¹Max yalon pax eb: C'amokab chi cam eb, palta ocokab eb yin siwomal c'al yin ikom aejal ayon, ẍi eb. Axca tu' max yun is yalben eb yajaw conob.

²²Axa max yun xin, max naon cham Josué tol chi awtelay eb gabaonita yuj cham: —¿Tzet yuj xan max on e yetnej? Max e yaloni tol najat ayex, ti tol cawil pax ayex.

²³A yuj tzet max e yun ti', xan catabnebil ex tinani', yuj tu' chex occan yin siwomal c'al yin ikom aejal yin tojbalk'inal bay yatut co Diosal on, ẍi cham.

²⁴Max tak'wi eb bay cham Josué axca ti': —Max jut co ba axca tu', yujtol chon xiwi talaj chon e yak' c'ayilok, yujtol max jab tzet max yal Jehová e Diosal bay cham Moisés is chekbej, tol ok yaoc masanil jun lugar ti' yul e k'ab, cax chi c'aylay el masanil anima cajan bay sat tx'otx'.

²⁵Yuj tu' xan tol ayonxa oc yul a k'ab tinani', xan chi je' onen bay chi cha a c'ul jin on, ẍi eb.

²⁶Yuj wal tu xin, xan maj yal c'ul cham Josué tol chi mak'lay cam eb gabaonita yuj eb yet conob.

²⁷Palta max ocxac'al can eb yin siwomal, c'al yin ikom aejal bay eb conob tu', c'al bay is altar Jehová bay jun lugar sic'bil el yuj Cham. Chitoc'al mulnaj eb gabaonita tu' yin jun mulnajil tu' tinani'.