Read Q'anjob'al 2 Ti 2 Bible Online

2 Ti 2 - Q'anjob'al bible

2 Ti 2

¹Yuj tu xin, ach tol axca in c'ajol ach, tec'baj a ba yuj watx'c'ulalil Dios chi yak' ayon, yujtol junxanej jayji yetok Cristo Jesús.

²A juntzan cuybanilej max ab walon nan xol xiwil eb creyente etok, abenejcan oc yul k'ab eb yikem, eb chi je' cuywaj nan xol yet creyenteal.

³Axca junok soldado tol caw watx', axcaokab tu' chot ak'on techaj yailal chela', yuj lanan ak'on serbil Jesucristo.

⁴K'inalok junok soldado ayoc yin yopiso tinani', maj je' comonc'al ok tok yin junokxa comon mulnajil, yujtol asan jun yajaw chi je' yak'on serbil.

⁵K'inalok junok winak ayoc yin junok sakach tinani', caw wal chi yochej chi yak' ganar, palta ta c'am chi yikej axca wal yalon leyal jun sakach tu', maj je' chaon is paktzil.

⁶Ilab c'apax eb mulnajwom tinani'. A eb, moj chaon yet yin babelal yin sat awoj.

⁷A juntzan chi waltok ayach ti', chi cam a beyc'ulnen sic'libil, cax ok yak'on Cham Jajawil nachaj el oj masanil.

⁸Natek Jesucristo, Cham yinatil David, Cham max ictzonelay aj xol eb camnak. A ton jun ti' k'anejal yet colbanilej chi walilok.

⁹Yujc'al chi walil jun ti', xan lanan waben yail tinani'. Toltax c'alan in yetok cadena, axca wal tol miman in mul yul sat ley, palta a k'anej Dios man c'alanok yetok cadena axca in c'al-lay ti'.

¹⁰Ay juntzanxa eb sic'bilxa el yuj Dios, chi wochej ok cha' eb watx'il jetok. Yuj tu' xan chi wak' techaj jantakc'al tzet chi jay wiban, yet watx' chi cha' c'apax eb is colbanil miman yelapnok. Jun chi ak'lay ayon yin junelnej, yuj junxanej jayji yetok Cristo Jesús.

¹¹A juntzan k'anej ok waltok ayach ti', caw yel. Ta camnak on yetok Cham, ok on iquisbokc'al ec' yetok yin junelnej.

¹²Ta chi jak' techaj yail yetok Cham, ok jak' yajawilal yetok. Ta chi jiel Cham jin, ok on yi' c'apax el Cham yin.

¹³Ta ayon c'am chi yun tzet chi jala', palta a Cham chic'al yun tzet chi yala'. Yujtol c'am chi je' q'uexon Cham is ti' yin tzet chi yala'.

¹⁴Jek na' eb creyente bay tu' juntzan chi waltok ayach ti'. Satak Dios chal bay eb, tol man comonok chi teyelej ba eb yin k'anej. Nabac'al chi yetnej ba eb yin. A eb chi aben teyelen ba eb, toc'al chi somchajcan el c'ul eb yuj eb.

¹⁵Caw chak' ep a mulnaj yin yet Dios, yet watx' chi yil eb tol watx' a mulnajil, cax caw watx'c'al chot alon el k'anej Dios acaw yel. Ta chon axca chi wal ti', c'am tzet yuj xan ok ach q'uixwok aj satak Dios.

¹⁶Man a cha' ab tzet chi yal eb comonc'al chi k'anjabi, eb c'am yelapnok tzet chi yala'. Yuj is comon k'anej eb tu', xan chi texac'al toj eb xol tzet man watx'ok.

¹⁷Axca wal junok yax k'ayil chi el lebebok, caytu' chi yun yel lebebok juntzan comon k'anej chi yal eb tu'. Caytu' yutnak ba Himeneo yetok Fileto.

¹⁸Yuj tu' xan max bekcan eb jun cuybej acaw yel, cax chi tz'ak yalon eb tol mayal ictzoj aj eb camnak. Axca tu' chi ec' somtok eb tzet ayoc yin c'ul jaywanokxa.

¹⁹Palta a jun yanak ay Dios yich, caw ay yip. Axca junok yich na c'am jabok chi bili, caytu' jun tu'. Ayoc jun sello yin, tol chi yal axca ti': Yojtak Cham Jajawil eb yetc'alta' yayji, ẍi. Cax chi yal c'apax axca ti': Tzanc'al mac chi yaloc ba yetok Cham Jajawil, yowalil chi bekcan masanil yobtakil, ẍi jun sello tu'.

²⁰K'inalok ay junok miman na xiwil mitx'k'abej yul. Ay laj ch'en mitx'k'abej. Ay laj oro yetok plata, caw ay yopiso. Palta ay pax te mitx'k'abej, c'al tx'otx' mitx'k'abej. A cabxa makan tu' comon mitx'k'abejc'al.

²¹Axca juntzan mitx'k'abej tu', cayon ton tu'. Ta chi co bekcan masanil yobtakil, caw miman jelapnok satak Cham Jajawil. Asan Cham ayon yet. Ay jopiso yuj Cham, yujtol tzanc'al tzet opiso miman yelapnok chi yochej c'ul Cham watx'xa jayji yet chi junej.

²²Besil a ba yin juntzan tzet chi yochej oc eb et ach'ejal. Ocan yin tojolal, yin camc'ulal, yin junc'ulal, c'al yin aon oc a c'ul yin Cham Jajawil axca chi yut ba eb c'am jabok is paltail satak Cham, yet chi yalon ba eb bay.

²³Ay eb comonc'al chi teyelej aj ba, palta nabac'al toni. C'am jabok yelapnok tzet chi yal eb. Pojil a ba xol eb. Ojtakxa tol owalxa chi yun lajwi aj tzet chi yal eb tu'.

²⁴A mac chi ak'on serbil Cham Jajawil, c'am chi je' tol comonc'al chi yatok ba xol owal. Yowalil manso chi yut ba eb bay masanil anima. Yowalil watx' chi yut cuywaj ba eb, cax miman c'apax chi yut eb c'ul.

²⁵Yetok c'apaxok, watx'c'ulalokabc'al chi yut yalon eb bay eb chi tit yowal. Yamita ok ak'lay na ba c'ul eb yuj Dios, cax ok yojtaknen el eb jun cuybej acaw yel.

²⁶Yujtol a eb tu', axca tol mitx'bil tzakay eb yuj nak diablo, yet watx' chi yun eb tzet chi yochej nak, palta ta chi na ba c'ul eb, ok colchaj eb yul k'ab nak diablo tu'.