Read Q'anjob'al 2 Ti 4 Bible Online

2 Ti 4 - Q'anjob'al bible

2 Ti 4

¹A yet ok jay Cham Jajawil Jesucristo yet cayelal, ok texac'al oc Cham yin reyal, cax ok beyc'ulnen Cham masanil eb anima camnakxa, c'al eb iquisto. Yuj tu' xan satak wal Dios c'al satak Cham Jajawil Jesucristo chi cam walontok ayach

²tol chalil k'anej Dios xol anima. Caxc'al chi yochej eb chi yabej, caxc'al c'am chi yochej eb chi yabej, palta alilok. Cha tenchanej eb yin tzet man watx'ok, cha jek oc nabal eb. Miman chot a c'ul yin eb, cha cuy c'apax eb yin k'anej Dios.

³Yujtol ay jun tiempoal ok jayok, xan ay mactxel majxa cha' al-lay cuybej acaw yel bay. Asanxanej comon k'anej ok yochej eb ok yabej. Yuj tu', xiwil cuywajwom ok wajbajtek eb; palta juntzan cuywajwom tu', toc'al ok tz'ak yal eb juntzanok comon k'anej, axca chi yochej anima tu'.

⁴Yuj tu', majxa yacbaj eb txiquin yin cuybej acaw yel, asan yin comon abix ok yaoc eb nabal.

⁵Palta ach ti', tec'anc'al chot a nabal. Ak'c'al techaj yailal chi jay eban. Alc'al el k'anejal yet colbanilej nan xol anima. Mulnajan sic'libil, yet watx' c'am tzet chi majax aj yin opiso tu'.

⁶Axa ayin ti xin, lananxa jay tiempoal in cami. Axca vino chi seclay ay yin ofrendail, caytu' ok wunej.

⁷Axca junok mac chi oc yin junok anejbail, axca tu' max wut in ba in mulnaj yin yet Dios. A tinani xin, mayal yi ba wopiso yin watx'il. Max in ya'ilnej masanil tiempo juntzan cuybej max jaoc yin co c'ul.

⁸A tinani', c'ubanxa ec' in paktzebal, yujtol tojolc'al max wut in beybal. A yet jun c'ual tu' ok in cha' in paktzil tu' bay Cham Jajawil, Cham Juez tojol. Man asannejok in ok in cha' paktzil tu', palta ok cha' c'apax eb chi ochen chi jay Cham yet is cayelal yet.

⁹Chi wochej chak' ep a sayon tzet chi yun a tit yin ayman.

¹⁰Yujtol max quin beklaycan yuj Demas in tx'oklil. Max toj bay Tesalónica, yujtol asan tzet yetal ay yulyibank'inal ti' chi yochej. A juẍtak Crescente, a bay Galacia max toji. A pax juẍtak Tito xin, a bay Dalmacia max toji.

¹¹Ti asan Lucas ayic' wetok. A yet chach tita, chi ec' e' Marcos etok, yujtol caw chi oc yopiso nak wuj mulnaj yin yet Cham Jajawil.

¹²Max in chektok juẍtak Tíquico bay Efeso.

¹³A yet chach tita, elokab yin a c'ul chi ec' e' jun jokan pichilej max in bekcan bay Troas bay yatut Carpo, yetok juntzan in libro c'al juntzan wun yelxac'al watx' tol yowalil chi tita.

¹⁴A nak Alejandro, nak tenom ch'en, caw yob chi yut ba nak ayin, palta ok paktzej Cham Jajawil yunben nak tu'.

¹⁵Ilc'al a ba bay nak ach ti', yujtol chi yak' nak ajc'ulal yin jun abix chi jalilok.

¹⁶A yet max wal in ba yet babelal satak cham yajaw bay Roma, c'am junok mac max oc wetok. Maxc'al quin is bekcan eb in tx'oklil. Matawal c'am chi tit yowal c'ul Dios yin eb yuj tzet max yun eb tu'.

¹⁷Palta max oc Cham Jajawil wetok. Max colwaj Cham wetok. Yuj tu' xan max je' waloncan el k'anejal yet colbanilej. Maxc'al yab eb man israelok masanil. A junel axca wal tol max in michchaj yuj junok no coj, cax ijan max in is chiaytok no', palta max in col-lay el yul ti' no'*fn* yuj Cham Jajawil.

¹⁸Ok in is colil Cham yul k'ab masanil tzet man watx'ok. Watx' ok in yut c'uban aj Cham, yet watx' ok in apnok yul is k'ab bay satcan. Mimanokabc'al yelapnok Cham yin tojbalk'inal. Yunokabi.

¹⁹Chak' cawil c'ul janab Prisca yetok juẍtak Aquila, yetokc'al eb cajan yetok Onesíforo bay yatut.

²⁰A juẍtak Erasto max can bay Corinto. Axa juẍtak Trófimo xin, a bay Mileto max wak'canok, yujtol ya'ay.

²¹Chach nanon a tita, yak'ban wal c'amto chi oc nabilk'inal. Chi yatok nak juẍtak Eubulo cawil a c'ul. Ilab c'apax juẍtak Pudente, yetok juẍtak Lino, c'al janab Claudia, c'al masanil eb creyente, chi ya c'apaxtok eb cawil a c'ul.

²²Ayokab oc Cham Jajawil Jesucristo etok. Yak'okabc'al Dios is watx'c'ulal ayex.