Read Q'anjob'al Tit 1 Bible Online

Tit 1 - Q'anjob'al bible

Tit 1

¹Ayin Pablo in ti', yak'omal in serbil Dios, chekbej in c'apax Jesucristo, yuj wiontek eb sic'bilxa el yuj Dios, yin yaon oc eb c'ul yin. Ay wopiso in cuyon eb yin jun cuybej acaw yel, tol chon cuy yin watx'il.

²Cayton tu' wopiso axca tu', yet watx' chi yaoc eb yipok c'ul, tol ok co cha' k'inalej tol ayc'al yin tojbalk'inal. A Dios c'am bay chi yak' lek'tial junelok. A yet manto watx'nej yulyibank'inal ti', max yak'on is ti' tol ok yak' co k'inal tol ayc'al yin tojbalk'inal tu'.

³Mayal jay tiempoal tinani', yak'on ojtaknelay el is k'anej. Yuj tu', a Cham co Colomal Dios, a Cham max ak'on walil is k'anej ti'.

⁴Ti chi watok jun in carta ti' ayach Tito. Wal yel axca tol in c'ajol ach, yujtol ayin max wal abej, xan max a cha' Cristo wetok. Yak'okabc'al co Mam Dios c'al Jajawil Jesucristo co Colomal is watx'c'ulal c'al is junc'ulal ayach.

⁵Max ach wak'can bay Creta tu', yuj a watx'nen oc juntzan tzet ayto watx'ji, c'al yuj a sic'on oc mac chi oc ancianoal xol eb creyente bay junjun conob. Cha sic'oc eb axca max wut waloncan ayach.

⁶Ti ok waltok beybal eb moj yoc ancianoal abej. A junok anciano, c'amokab bay chi say junok tzet yetal yobtak, yet watx' c'amc'al queja chi aj yin. Junnejokab yistzil. Creyenteokab yuninal masanil, cax man comonok chi say yun eb junok yobtakil. Manokab tenomtakok chi yut ba eb, palta tol yikemokab chi yut ba eb yuninal eb tu'.

⁷Yujtol a eb chi oc yilomalok eb jet creyenteal tu', yowalil caw wal watx' chi yut eb is beybal, yujtol yak'omal cuenta mulnajil Dios yayji eb. Maj je' tol asanxanej eb chi yochej chi yal yet. Maj je' tol c'un chichon aj c'ul eb. Manokab uq'uemanok eb. Maj je' tol mak'wajwom c'apax eb. Yetok c'apaxok, maj je' yion tumin yin yobal.

⁸A eb ay yopiso tu', ak'om posadaokab eb. Yowalilokab a tzet watx' chi yun eb, c'amokab chi ec' eb yiban. Tojolokab chi yut eb is beybal. Asannejokab yin Dios chi yaoc eb nabal. Yowalilokab chi mitx'oc wanaj eb mimanil yin tzet man watx'ok.

⁹Yowalilokab chi yaoc eb nabal yin cuybej acaw yel, jun cuybej ak'bilxa cuy eb, yet watx' chi je' yiptzen eb juntzanokxa mactxel yetok jun cuybej yel tu', cax chi je' c'apax yak'on eb yojtaknej el eb anima chi tenton ec' bay co cuybej.

¹⁰Yujtol xiwiltoc'al anima tenomtak chi yut ba. Toc'al chi comon alnej junok tzet yetal c'am yelapnok, caw iom aytek satej eb. Mawal axca eb ayoc nabal yin circuncisión, xiwil eb caytu' chi yut ba.

¹¹Yowalil chi tenlay oc wanaj eb, cax c'amxa chi yal eb, yujtol tzanc'al nail bay chi ec' eb, chi ec' yak' somchaj eb c'ul eb creyente tu'. Chi ec' yak' eb cuylay tzet man watx'ok, yet watx' chi yi' eb is tumin yin eb.

¹²Ay jun nak aj Creta tu', aj nabal yayji xol eb, max yal nak axca ti': A eb wet aj conobal bay Creta ti'; toc'alta' lek'ti' eb. Caw wal lajan eb axca junok no no' caw wal ow. Isaj eb, toc'al chi yochej eb chi lowi, ẍi nak.

¹³Yel ton chi yal nak. Yuj tu' xan yowalil cha tenchanej eb sic'libil, yet watx' chi yaoc eb jun cuybanilej acaw yel yin is c'ul.

¹⁴Chal bay eb, tol manchak yacbaj eb txiquin bay juntzan comon abix chi yal eb wet israelal. Chalon c'apax bay eb, tol manchak yikej eb tzet chi yal eb c'am yelapnok cuybej yel yul sat.

¹⁵A yul co sat ayon watx'xa co nabal ti', watx' masanil tzet yetal; palta a eb c'am chi yaoc c'ul yin Dios, eb yob is nabal, c'am junok tzet yetal watx' yul sat eb, yujtol a is nabal eb man watx'ok. C'am jabok chi mitx' waay ba eb yetok is nabal tu'.

¹⁶Chi tz'ak yal eb tol yojtak eb Dios, palta a is beybal eb chi tx'oxk'abnen elok tol man yojtakok eb Cham. Man watx'ok eb yul sat Dios, yujtol c'am chi yikej eb jabok tzet chi yala'. Yuj tu' xan c'am junok tzet watx' chi je' el yunen eb.