Read Q'anjob'al Tit 2 Bible Online

Tit 2 - Q'anjob'al bible

Tit 2

¹Axa ach ti', aokab tzet moj cuylayi, aokab chak' cuylayok, wal juntzan cuybanilej caw wal yel.

²Chal bay eb ichamtak winak, tol bayc'al ijan chi yut eb is nabal. Watx'okab chi yut ba eb, yet watx' ayokab yelapnok eb yul sat yet animail. Aj nabalokab chi yut ba eb. Cawokab chi yaoc eb c'ul yin juntzan cuybanilej yel. Ayokab camc'ulal eb yin yet animail. Tec'anokab chi yut ba eb yet chi yilon eb yailal.

³Ac'ala' c'apax eb xal ixnamil ix, chal bay eb, tol watx' chi yut eb is beybal, axca wal chi yochej c'ul Dios. Man comonok chi yal eb k'umal yet animail. Manokab uq'uemanok eb. Meẍtolokab eb xal yin tzet watx',

⁴cax chi cuywaj eb xal xol eb ix k'opoj ixto yin tzet chi yut camc'ulnen ba eb ix yetok yichamil, c'al tzet chi yut camc'ulnen eb ix yune'.

⁵Cax aj nabalokab chi yut ba eb ix, tojolokab beybal eb ix. Ya'ilnejokab eb ix yatut. Watx'okab chi yut eb ix c'ul bay yet animail. Yikemokab eb ix bay yichamil, yet watx' c'amokab buchwal k'anej chi al-lay yin k'anej Dios.

⁶Yetok c'apaxok, chi cam alon bay eb ach'ejtak winak, tol aj nabalokab chi yut ba eb.

⁷Watx' chot a beybal yin masanil yil eb. Aokab yet chach cuywaj xol eb, chach cuywaj yin masanil a c'ul, c'al yin c'am ejmach'il.

⁸Tojolc'al chot cuywaj a ba bay eb, yet watx' c'amokab mac chi alon tol man watx'ok juntzan chak' cuy eb tu'. Yuj tu xin, caxc'al ay eb chi tit yowal en, palta ok q'uixwok aj eb, yujtol c'am junok tzet yob ok je' yalon eb jin.

⁹Chal bay eb creyente ayoc yin mosejal, tol yikemokab chi yut ba eb bay is patrón. Watx'okab chi yut ba eb axca chi yochej c'ul patrón eb tu'. Manchak tak'wej eb is ti',

¹⁰tamwal chi elk'an eb bay. Tojolokab chi yut ba eb tx'oxon el is watx' beybal. Axca ton tu' ok yut tx'oxk'abnen el eb bay eb anima, tol caw watx' cuybej co Colomal Dios.

¹¹A Dios, max tx'ox is watx'c'ulalil ayon, a' inej oc colbanil masanil eb anima bay yulyibank'inal ti'.

¹²Yuj is watx'c'ulal tu', xan chi nachaj el juj, tol yowalil chi co bekcan masanil tzet man watx'ok chi jochej oc bay yulyibank'inal ti', cax tol aj nabal chi jut co ba, c'al watx' chi jut co beybal. Asan yin Dios chi jaoc co nabal.

¹³Jechbanejek jay jun c'ual tzalojc'ulal, yet ok jay Cham co Diosal caw miman yelapnok, a ton Cham co Colomal Jesucristo.

¹⁴Max yak' cam ba Cham juj, yuj on is colon el yul k'ab yobtakil. Max yiel Cham masanil co mul, yet watx' asan Cham ay yalon yet jin, cax asanokab tzet watx' chi jochej chi junej.

¹⁵Al juntzan ti' xol eb creyente bay tu'. Cheptzej eb, cax cha tenchanen eb yob is beybal, yujtol opiso yayji. Watx'c'al chot a ba, yet watx' c'amokab mac chi aloni tol c'am opiso.