Read Q'anjob'al Tit 3 Bible Online

Tit 3 - Q'anjob'al bible

Tit 3

¹Cha jek na eb creyente tu', tol yikem chi yut ba eb bay masanil eb yajaw. Yowalil chi yikej eb bay chi yal eb. Tzanc'al tzet mulnajilal tol watx', bekanokab chi yut eb c'ul watx'neni.

²Manokab comonok chi buchwaj eb yin yet animail. Manokab comonok chi yak'lej eb owal yetok junok mactxel. Watx'okab chi yut eb is nabal, mansookab chi yut ba eb bay masanil anima.

³Yujtol a yet yalantok, c'am c'apax co nabal ayon ti'. Pit on bay Dios. C'aynak on tok yet tu'. Max jak' serbil tzanc'al tzet yobtakil max jochej ocok. Caw wal yob co beybal yet tu'. Chi jak' sawenal yin eb jet animail watx' ay. Yajbejtak jili yul sat eb jet animail, yetok c'apaxok, ayonxac'al oc max co yajlej aj co ba.

⁴Palta max tx'oxaj Cham co Colomal Dios is watx'c'ulal, c'al is camc'ulal bay masanil anima.

⁵Yuj tu', max on colchaj el yuj. Man yujok junok tzet watx' max el juneni, xan max on is colo'; palta asan yuj max ok' c'ul Cham jin. A yet max tx'ajon el co yobtakil jin, axca wal tol max on alji yet cayelal. A Yespíritu max q'uexon co nabal.

⁶Yuj co Colomal Jesucristo xan max yatek Dios Yespíritu ayon yin masanil is c'ul.

⁷Xan watx' on yul sat, yujc'al is watx'c'ulal. Yuj tu' xan ok yak' c'apax co k'inal tol ayc'al yin tojbalk'inal, jun ayc'al oc yipok co c'ul.

⁸A juntzan chi wal ti', yel. Xan chi wochej tol yayjic'al alubtanen sic'libil juntzan cuybanilej ti', yet watx' a eb chi yaoc c'ul yin Dios, chi yaoc eb yin c'ul yunen tzet watx'. Caw watx' juntzan cuybanilej ti'. Caw chi oc yopiso juj co masanil.

⁹Manchak aoc a ba yetok eb comonc'al chi teyelej ba yin tzet nabac'al, c'al xol eb asan yabixal eb ichmamej chi yaltek. Manchak a c'apax oc a ba yetok eb comonc'al chi yak'lej owal, c'al yetok eb chi teyelej ba yin ley Moisés. C'am tzet chi yi' eb yin juntzan chi yalubtanej tu'. Nabac'al chi yetnej ba eb.

¹⁰Ta ay eb chi ochen chi pojchaj eb creyente, cha tenchanej eb junel cayelok. Ta c'am chi yikej eb, che yiel eb e xol.

¹¹A eb caytu' chi beybalnej, ojtaknej elok tol etaxnakxa el eb. Munilc'al yojtakxa eb tol lownakxa yin eb yuj is yobtakil.

¹²Ok in chektok juẍtak Artemas ayach, ma xin, a juẍtak Tíquico ok tok. A yet chi apni ocok, chak' ep a toj bay conob Nicópolis. Ata bay tu' ok on k'anjabok, yujtol chi wochej a tu' ayin ec'ok yet chi ec' nabil k'inal.

¹³A yet chi toj nak juẍtak licenciado Zenas yin is viaje yetok juẍtak Apolos, colwajan yin yet mimanil eb. Jantakc'al tzet chi k'anabax yuj eb yulak be, ak' bay eb, majaxta' aj eb.

¹⁴Cha cuy eb jet creyenteal bay tu', tol chi yun eb tzet watx', cax chi colwaj eb bay eb ay is majilal, yet watx' ay yopiso eb yul sat Dios.

¹⁵Chi yatok masanil eb ayic' wetok cayti' cawil a c'ul. Chak' cawil c'ul masanil eb creyente chon camc'ulnen bay tu'. Yak'okabc'al Dios is watx'c'ulal ayex e masanil bay tu'.