Read Q'anjob'al Heb 1 Bible Online

Heb 1 - Q'anjob'al bible

Heb 1

¹A yet payxa, xiwilc'al tzet max yut k'anjab ba Dios bay eb jichmam. Tx'ial elc'al max k'anbalnej eb is chekbej.

²Axa yet jun lajub tiempoal ti xin, a is C'ajol max k'anbalnej yuj k'anjab ayon. A is C'ajol tu' max yak'balnej watx'nen yulyibank'inal, c'al masanil tzetak yetal ay yulyibank'inal ti', cax max yaon oc masanil yul k'ab is C'ajol tu'.

³A yin Cham C'ajolej chi tx'oxil Dios is watx'ilal, yujtol caw lajan watx'il Cham yetok. Caw lajan nabal Cham yetok. Asan yuj k'anej Cham C'ajolej tu', xan watx' bey masanil tzetak yetal, yujtol a is k'anej tu', caw miman yikbej. A yet max xew yioncan el Cham co yobtakil jin, max toj ay chotan bay watx' k'ab Dios bay satcan.

⁴A Cham C'ajol Dios, ec'ban yelapnok Cham yintak eb ángel, yujtol a is yikbej ak'bil yuj is Mam, ec'ban yintak yet eb ángel tu'.

⁵C'am junok ángel bay max yal Dios axca tzet max yal bay is C'ajol: Ach ton in C'ajol ach. Ayin max ach wak' iquisbok tinani', ẍi bay is C'ajol. A yet max yal Dios c'apax junxa ti', man yujok junok ángel xan max yala', palta yuj is C'ajol tu', xan max yal axca ti': Tol is Mam ok wunej, cax in C'ajol ok yunej, ẍi.

⁶A yet max yion jay Dios is C'ajol asannej oc bay yulyibank'inal ti', max yalon axca ti': Yiokab ay ba masanil eb wángel bay, ẍi.

⁷Yuj tu' xan yalnak c'apax yabixal eb ángel tu' yuj tzet chi yun eb, ẍi axca ti': Chi yaoc eb is yángel yin cak'ek'al. Chi ya c'apax oc eb yak'omal serbil yin xak k'ak'ejal, ẍi.

⁸A pax yuj Cham is C'ajol tu xin, chi yal axca ti': Ach Dios, Rey ach yin tojbalk'inal. Yajaw ach, watx'c'al chi yun a beyc'ulnewi.

⁹A wal tojolal chi cha a c'ul; c'am chi cha a c'ul yobtakil. A wal yuj tu' xan max ach siq'uil Dios, a ton a Diosal. Max yak' miman tzalojc'ulal ayach yintak juntzanxa eb ay yopiso etok, ẍi yul tx'an Un tu'.

¹⁰Chi yalon c'apax axca ti': Mamin Jajawil, atax yet yichbanil max a watx'nej ay yich tx'otx' tx'otx' ti'. Ach wal caw max a watx'nej satcan.

¹¹Ok c'aycan el masanil juntzan ti', ach xin, toc'alta' ayach ec'ok. A juntzan tu' ok ichambok axca yichambi an pichilej.

¹²Ok a pakaj axca junok k'ap. Ach ok a q'uexcanelok axca wal q'uexon el anima icham pichilej, axa ach xin, ac'ala' achc'al. C'am bak'in ok lajwok a k'inal, ẍi yul tx'an Un tu'.

¹³C'am junok ángel bay yalnak Dios c'apax junxa ti' axca max yut yalon bay is C'ajol: Ayan chotan bay in watx' k'ab ti', masantac'al ok wacan oc eb ajc'ul oc en batxlubok akan, ẍi bay is C'ajol.

¹⁴Masanil eb ángel tu', espírituc'al el eb, yak'omal serbil Dios yayji eb. Chekbiltek eb yuj on is coloni, ayon mac on ok co cha' co colbanil.