Read Q'anjob'al Heb 11 Bible Online

Heb 11 - Q'anjob'al bible

Heb 11

¹A yet chi jaon oc junok tzet yetal yin co c'ul, chi yal elapnok tol caw chi jaoc yipok co c'ul tol ok co cha' tzet lanan jechbaneni, cax tol jojtak sic'libil, tol a juntzan tzet manchak jiloc yin, ay ton ec'ok.

²A eb jichmam, ocnak eb watx'il satak Dios, yujtol yanak oc eb c'ul yin Cham.

³Yujtol chi jaoc co c'ul yin Dios, xan jojtak tol asan yetok is k'anej max watx'nej Cham yulyibank'inal ti', c'al juntzan tzet chi ec' satcan. A juntzan tzet chi jil tinani', man yinok tzet txequel tinani' max tita.

⁴A Abel, yanak oc Dios yin c'ul. Yuj tu' xan a is xajanbal yak'nak bay, ec'ban watx'il yintak yet Caín, xan yalnak Dios tol watx' Abel tu' yul sat; yuj tu' max cha' is xajanbal. Caxc'al camnakxa Abel tu', palta axca tol ac'ala' k'anjab ayon, yujtol yanak oc yin c'ul.

⁵A Enoc, yanak oc Dios yin c'ul; yuj tu' xan max ilaytok yuj Dios yin yiquisal. Majxa ilchajok, yujtol max ilaytok yuj Dios. Chi yaltek yabixal yul tx'an Un, tol a yet c'amto chi ilaytok tu', max tzaloj Dios yetok.

⁶Ta c'am chi jaoc co c'ul yin Dios, c'am chi je' tzaloj jetok. Yujtol a mac chi jay bay Dios, yowalil chi yaoc yin c'ul, tol ay ton Dios. Cax chi yaon c'apax oc yin c'ul, tol chi paktzej Cham bay eb chi yochej chi jayoc bay.

⁷A Noé, yanak oc Dios yin c'ul. Yuj tu' xan a yet max yalon Dios bay tol ok jay tzet c'amto chi il-layi, caw wal max xiwi, xan max yikej watx'nen jun arca bay ok col ba yetok is yuninal yetok yetbi eb. Yuj jun tu' xan max lowcan camich yiban masanil anima. Max yalon Dios tol watx' Noé tu' yul sat, asan yuj max yaoc c'ul yin.

⁸A Abraham, yanak oc Dios yin c'ul. Yuj tu' xan a yet max awtelay yuj Cham max yikej, cax max toj bay jun lugar yak'nak Cham is sataknej. Caxc'al man yojtakok bay chi toji, palta max bekcan is tx'otx'al cax max toji.

⁹Yujtol yanak oc yin c'ul, xan ec'lejnak cajan bay jun lugar yak'nak Dios is ti' yak'on bay tu'. Mantiado max oc is yatutok. Axca tu' yutnak c'apax ba Isaac yetok Jacob, yujtol ay yalon yet eb chaon jun tzet yak'nak Dios ti' yak'oni.

¹⁰A Abraham tu', chi yechbanej jun conob cimiento yich ayayok. A Dios max naon watx'jubal jun conob tu', cax max watx'neni.

¹¹A xal Sara, yanak oc Dios yin c'ul. Yuj tu', caxc'al man uniwomixok, palta maxto ak'lay yip yet ixnamxa, maxto jay yune'. Yuj tu', ay jun yune' maxto alji, yujtol yanak oc yin c'ul, tol a Cham yak'nak ti' bay, chic'al yun bay chi yala'.

¹²Yuj tu', caxc'al caw ichamxa Abraham tu' sic'libil, palta xiwil max yun beytok yinatil axca wal bisil waycan, ma axca bisil yarenail ti a' mar, c'amxa chi bischaji.

¹³A junjun mac max waltek yabixal ti', c'amto chi cha' tzet yak'nak Dios ti' yak'on bay eb, cax max cam eb, palta yanak oc eb yin c'ul. Yuj tu', axca tol yilnaktok eb yin juntzan tzetak yetal tu' najat, caw chi tzaloj eb yuj. Axca ton ti' yutnak yak'on ba eb testigoal tol a yulyibank'inal ti' man is conobok eb, palta tol toc'al ec'jabwom yayji eb yulyibank'inal ti'.

¹⁴Yujtol a eb chi alon axca ti', chi tx'oxk'abnej el eb sic'libil tol lanan sayon ec' eb junok conob tol yet eb yayji.

¹⁵K'inalok ta ac'ala' naontok eb is tx'otx'al bay max ca tita, tekan max je' meltzojtok eb bay tu'.

¹⁶Palta yochejnak eb junokxa is conob yelxac'al watx', a ton jun conob bay satcan. Yuj tu', a Dios c'am chi q'uixwi aj yet chi yalon oc eb is Diosalok, yujtol watx'xa yayji jun is conob eb tu' yuj.

¹⁷A Abraham, yanak oc Dios yin c'ul. Yuj tu' xan a yet max ak'lay porobal yuj Dios, max yitok Isaac, cax t'inan bet yak'on yin xajanbalil yaloni. Caxc'al yak'nak Dios is ti' yuj Isaac tu', palta bekanxa c'ul Abraham tu' yak'on jun c'otan is c'ajol yin xajanbalil.

¹⁸Yalnakxa Dios bay Abraham tu' axca ti': A yin nak Isaac, a tu' ok beyc'altok enatil, ẍi bay.

¹⁹A Abraham tu', max na' wal sic'libil tol chic'al je' yuj Dios yictzonen aj eb camnak. Yuj tu' chi je' jaloni, axca tol ictzojnak aj Isaac tu', cax axca tol max ak'lay bay Abraham tu' junelxa.

²⁰A Isaac, yanak oc Dios yin c'ul. Yuj tu' xan yin ayokto max yaloncanok, tzetak watx'ilal t'inan chaon Jacob yetok Esaú.

²¹A Jacob, yanak oc Dios yin c'ul. Yuj tu' xan a yet toxa chi cami, max yaloncan tzetak watx'ilal t'inan chaon junjun eb yuninal José. Maxto yak' ayilal bay Dios, max ay nojan yiban jolom is k'okoch.

²²A José, yanak oc Dios yin c'ul. Yuj tu' xan a yet toxa chi cami, max yaloncanok tol t'inan ok el eb israel bay Egipto. Max yalon c'apax canok, tzet yowalil ok yut eb is bakil.

²³A eb is mam c'al is txutx Moisés, yanak oc eb Dios yin c'ul. Yuj tu' xan a yet max alji Moisés tu', max yeban el eb oxeb xajaw, yujtol max yil eb, tol caw wal watx' yili. Maj xiw eb bay jun is ley cham rey, chi aloni tol chi ak'lay cam eb winak unin chi alji.

²⁴A Moisés tu', yanak c'apax oc Dios yin is c'ul. Yuj tu' xan a yet icham winakxa, c'amxa chi yochej chi al-lay oc yuneok ix cutz'in cham reyal Egipto.

²⁵Maj yochej max yak' tzalojbok c'ul yin yobtakil, yujtol a tzalojc'ulal tu' chi eq'uelok. A ti yet, tol max cha c'ul yaben yail yetok eb conob Dios.

²⁶Max naon c'apaxok, tol caxc'al chi yab yail buchlay yuj Cristo, palta watx' yet. A masanil beyomal Egipto tu', c'am yelapnok yul sat, yujtol yanaktok is nabal yin is paktzebal ok yak' Dios.

²⁷Max yaoc c'ul yin Dios. Yuj tu' xan max el bay Egipto tu'. Maj xiw jabok yuj yowal c'ul cham rey tu'. Caw tec'an max yut is nabal, axca tol chi yiloc yin Cham c'am chi je' jilon oc yin, a ton Dios.

²⁸A Moisés tu', yujtol max yaoc Dios yin c'ul, xan max yikej chaon el yich jun k'in chi yik Pascua. Yalnak bay eb yet israelal, tol chi txij oc eb chic' yinlak is puerta, yet watx' c'am chi mak'lay cam eb is babel unin eb yuj jun ángel ay yopiso yin mak'oj cam anima.

²⁹A eb israel tu', yanak oc eb Dios yin c'ul. Yuj tu' xan max ec'tok eb nan a' chi yik Cakyin Mar, axca co bey bay c'am aej. A yet max yochej eb aj Egipto max ec'tok axca eb tu', max jik'bi eb yuj a'.

³⁰Yuj max yaoc eb jichmam Dios yin c'ul, xan a yet max xew yoyon ba eb ukeb c'u yinlak murallail conob Jericó, max ayc'ay bulnaj yuj eb.

³¹A ix Rahab, ix ajmul ix, max yaoc Dios yin c'ul. Yuj tu' xan maj cam ix yetok eb pit max yut ba, yujtol watx' max yut chaon ix eb israel max beytzen jun conob tu'.

³²Xiwiltoc'al tzet yetal chi je' walontok ayex. Palta c'amxa tiempo walontek yabixal Gedeón, Barac, Sansón, Jefté, David, Samuel, c'al eb chekbej Dios.

³³A eb max in txoltek bi ti', max yaoc eb c'ul yin Dios. Yuj tu', ay eb yak'nak ayc'ay juntzan nacionlak, yet yak'len eb owal yetok eb. Ay eb watx'c'al yutnak yak'on yajawilal. Ay eb max cha' yalben Dios. Ay eb max makchej ti' no coj.

³⁴Ay eb max yak' tan mimek k'ak'ej. Ay eb max colchaj el yet t'inanxa cam eb yetok espada. Ay eb c'am yip, max ak'lay yip eb. Max ak'lay c'apax yip eb yak'wi owal. Yuj tu' xan a eb soldado max yak'lej owal yetok eb, max can eb yalan.

³⁵Ay eb ix ix max ictzoj aj is camnak, max chaon eb junelxa yin yiquisal. Palta ay juntzanxa eb, camnak yuj juntzanok yailal ocnak yiban eb. Bekan c'ul eb yaben yail, yet watx' chi yi eb ictzojbail, cax chi chaon eb jun is k'inal ec'ban watx'il.

³⁶Ay juntzan eb yabnak yail buchlayi, c'al mak'layi. Toltax max c'al-lay ay eb yetok cadena, max oc eb preso.

³⁷Ay eb tol max k'okch'ennelay camok. Ay eb tol max c'uplay ay nan yetok serrucho. Ay eb caw max ak'lay porobal sic'libil. Ay eb max cam yuj espada. Ay eb chi elic'ok yuj colon ba. Asanxanej tz'umal calnel c'al tz'umal chiwo chi yaoc eb is pichilok. Max yil eb mebil. Xiwil yailal max el yilon eb, max etax eb.

³⁸Man mojok eb aj yulyibank'inal ti' yec' juntzan anima watx' ti' xol eb. Xiwil tz'inan tx'otx', c'al tzalanlak bay max ec' cajan eb. Max cajaylej eb yulak na ch'en c'al yulak xab olan.

³⁹Masanil eb ti', max al-lay eb watx'il yuj Dios, yujtol max yaoc eb c'ul yin. Caxc'al watx' eb, palta majto cha eb tzet yak'nak Dios is ti' yak'on bay eb.

⁴⁰Yujtol ay jun tzet yetal ec'ban watx'il nabilxa yuj Dios jin. Yuj tu' xan majtoc'al yi ba tzet nabil yuj Cham yin eb tu' tx'oklil. Masantac'al chon is junanej Cham yetok eb tu', catatu' ok yion ba.