Read Q'anjob'al Heb 12 Bible Online

Heb 12 - Q'anjob'al bible

Heb 12

¹Xiwil ton mac tx'oxnak el ba tol max ya ton oc c'ul yin Dios. A eb yanak oc yin c'ul tu', axca tol oyan oc eb jinlak tinani'. Ayon lananxa jak'on jip axca eb chi yak' yanej. Yuj tu', yowalil chi jiek el jiban juntzan axca ikatz ikbil aj juj, yujtol yuj juntzan tu' xan yob co beyi. Yetok c'apaxok, yowalil chi co bekekcan yobtakil, yujtol a yobtakil tu', lajan axca tzet chi toj bac'an xol jakan, cax chon aj telnaj yuj. Yowalil tec'an chi jut co ba jak'on jip, axca eb chi yak' yanej tu'.

²Jaek oc co nabal yin Jesús, Cham chi ak'on jaon oc co c'ul yin. Yuj Cham xan tz'akaki chi jut c'apax jaon oc yin co c'ul. Max yab yail Cham yin curus. C'am yelapnok ta q'uixwiltak max yun cami, yujtol yojtak Cham tol a yet ok lajwok yaben yail tu', caw tzalojc'ulal yet. A tinani', chotan ay Cham bay is watx' k'ab Dios.

³Yuj tu', naektek beybal Jesús, tzet max yut yak'on techajok, yet max yaben yail yuj eb yobtakwom. Ta che natek, man ok ex c'unbok ajok, tamwal ok somchaj el e c'ul.

⁴Caxc'al tec'an che yut e yajc'ulnen e ba yetok yobtakil, palta c'amto chex cam yuj.

⁵Tekan mayal toj c'ayc'ulal e yuj tzet yalnakcan Dios ayon, yet max yaon oc co nabal, yujtol yuninal onxa. Chi yalcan yul tx'an Un axca ti': Ach in c'ajol, manchak entaknej el is tenchebal Cham Jajawil. Manchak cabax aj a c'ul yet chach yak'on cuenta.

⁶Yujtol a mac ay is camc'ulal Cham yin, chi yak' cuenta, cax chi yaon oc yailal tzanc'al mac chi chaoc yuninalok, ẍi yul tx'an.

⁷Yowalil chi jak' techaj juntzan yailal chi yal ti', yujtol yuninal on, xan caytu' chon yutej. ¿Xin ta ay junok uninalej c'am chi ak'lay cuenta yuj is mam?

⁸K'inalok ta c'am chon yak' cuenta axca chi yut yak'on cuenta yuninal masanil, mayon yuninalok chi yal tu', axca mi mitz' unin on yul sat.

⁹A yet max con yak'on cuenta eb co mam yulyibank'inal ti', maj jintaknej el is cuenta eb tu'. Yuj tu', yelokab yikem chi jut co ba bay co Mam bay satcan, yet watx' ok co cha' k'inalej tol ayc'al yin tojbalk'inal.

¹⁰A co mam junjun on bay yulyibank'inal ti', max con yak' cuenta eb jabok tiempoal axca max yochej c'ul. Palta a Dios, chon yak' cuenta yuj co watx'ilok, yet chi watx'ji oc co nabal axca is nabal.

¹¹Yel toni, a yet chi alay oc co yailal tu', c'am junok on chon tzaloj yuj co yailal tu' yin aymanil, palta ta chi watx'ji oc co nabal yuj, c'ojanc'ulal chon jichloj oc yuj, cax chi jay co junc'ulal.

¹²Yuj tu xin, ayex axca tol c'amxa yip e k'ab, ma axca tol sicbinak el e yakan, tec'bajek e ba xol yailal.

¹³Iek beybalej watx' c'al tojol, yet watx' man ok etaxxac'al el eb axca tol coxan yakan, palta tol ok tec'baj ba eb.

¹⁴Ak'ek e yip e yayji yin junc'ulal yetok masanil anima. Ak'ek c'apax e yip yet watx' watx' che yut e beybal, yujtol a eb man watx'ok is beybal maj yil eb yin Cham Jajawil.

¹⁵Xe yilc'al e ba, talaj ay mac e xol c'amxa chi yochej chi cha' is colwal Dios, yuj tu' xan chi pitzc'oj aj yobc'ulalil e xol, cax xiwil ex chex etax el yuj. A jun yobc'ulalil e xol tu', lajan axca junok te te' c'a' sat chi yak'a'.

¹⁶C'amokab junok ex che yut e ba ajmulal. C'amokab ex che yintaknej el tzet yetal yet Dios, axca yutnak ba Esaú. A Esaú tu', yin junnej lojal max q'uextok is satak t'inan chaon bay is mam yuj babel c'ajolejal.

¹⁷Jojtak, tol yintakilto paxok, max yochento max ak'lay pax yet yuj is mam, palta c'amxa tzet max ak'lay bay. Caxc'almi xiwil max ok'i, palta c'amxa chi je' q'uexon tzet yetal max yun tu'.

¹⁸A on ti', man lajanok chi jun axca eb jet conob israel yet payxa. Yujtol a eb tu', max betic' bay jun tzalan chi je' jilon oc yin bay ay jun k'ak' nilnon yaji, a ton Sinaí. A bay tu' caw wal k'ekk'olinak, cax max ec' jun cak xuchum cak'ek'.

¹⁹Yabnak eb yok' jun trompeta. Yabnak c'apax eb yoc yul nuk' Dios, yet max k'anjab bay eb. A eb max aben k'anjab tu', max oc tean eb yin Moisés, tol manchakxa k'anjab Dios bay eb.

²⁰Yujtol maj techaj yaben eb jun chekbanil ti': Ta ay junok chi jitzxac'altek ba bay yichlak witz ti', caxc'al no', yowalil chi k'okch'ennelay camok, ma xin tol chi teklay cam yetok lanza, ẍi.

²¹Caw max xiw eb yet max yilon eb juntzan tu'. Toltax a Moisés yalnak axca ti': Caw chin luklon yuj xiwilal, ẍi.

²²Palta ayon ti', manak bay jun tzalan tu' aytok co nabal. Yujtol a bay tzalan Sión, a ton is conob Cham Dios iquis, a tu' chi toj co nabal. A jun conob tu', a ton Jerusalén ay bay satcan,

²³bay manxa jantakok ángel chi waj ba, yet chi yalon eb watx' k'anej bay Dios. A tu' wajan c'apax ec' eb yuninalxa Dios, eb tz'ibbilxa bi bay satcan. A bay tu' ayic' Dios, Cham Juezal masanil anima. A tu' ayic' yanimail eb watx' yutnak is beybal, eb tol watx'jinakxa el yuj Dios.

²⁴A c'apax tu' ayic' Jesús, Cham chi ak'on yunel jun is cab trato Dios. A chiq'uil Jesús, axca tol txijbiltok jiban, a' chi ion el co yobtakil jin. A is chiq'uil tu', axca tol chi k'an mimanc'ulal jin, man axcaok is chiq'uil Abel tol max k'an paktzebal.

²⁵Yuj tu' jilekc'al co ba, yet watx' manchak jintaknejek el Cham chi k'anjab ayon tu'. A eb max intaknen el Dios yet payxa, yet max tenchelay eb yuj bay yulyibank'inal ti', majxa uj yel eb bay yailal. Akxam wal ayon ti', majc'alta' uj jel bay yailal, ta chi jintaknej el Cham chi k'anjab aytek satcan ayon.

²⁶A yet max k'anjab yet payxa tu', caw bilnak tx'otx' tx'otx' ti' yuj yoc yul is nuk'. Palta tinani', chi yal axca ti': Junelxanej, man asannejok tx'otx' tx'otx' ti' ok wak' bilok, palta ok wak' c'apax bil satcan, ẍi.

²⁷A jun chi yal junelxanej tu', chi yal elapnok tol a masanil tzet watx'nebil yuj, ok yak' bilok, cax ok yak'on lajwok elok. Axa pax juntzan c'am chi je' bil xin, ok can yin junelnej.

²⁸Ay jalon jet yin bay yajaw yayji Dios; a jun tu' c'am chi je' yak'lay bilok. Yuj tu', jalek yuj diosalil bay Dios; jiek ay co ba bay axca chi cha c'ul. Xiwokonek bay,

²⁹yujtol a co Diosal, lajan axca junok k'ak' k'ak' chi lajwi masanil yuj.