Read Q'anjob'al Heb 6 Bible Online

Heb 6 - Q'anjob'al bible

Heb 6

¹A tinani' xin, tonek co satak, yet watx' chi tec'anbi co nabal. Canokab juntzan babel cuybej yin Cristo jabnak tu'. Manchakxa co cuyubtanejek juntzan babel cuybanil ok waltek ti', axca cuybanil chi aloni tol chi co na co ba yin juntzan tzet chi iontek camich jiban, cax chi yaloni tol chi jaoc co c'ul yin Dios;

²axca cuybanil chi alon yuj bautismo, c'al yalay oc k'abej yiban co jolom, yet chi oc jopiso; axca cuybanil chi aloni tol ok on ictzoj aj xol eb camnak, c'al cuybanil chi alontek yailal eb anima yin junelnej. A juntzan cuybanilej ti' yetzanxa jaben tinani'.

³A tinani', ay wal junxa makan cuybanilej ok co cuyu', ta chi el yin c'ul Dios.

⁴Ayon ti', axca tol tzektanebilxa co nabal. Chabilxa jun sabal Dios caw watx' juj, ay jalon jet yin Cham Espíritu Santo.

⁵Jojtakxa is watx' abix Dios. Jojtakxa is yipalil ok tx'ox yet jun tiempoal tolto ok jayok.

⁶Yuj tu', ta chi jiel co nabal yin Cristo, ¿tzet ok yun co meltzoj oc junelxa, cax chi co naon pax co ba? Yujtol a yet chi jion el co nabal tu', chi yal elapnok axca wal tol ayon lanan co locban pax aj Cham C'ajol Dios yin curus junelxa. Lanan jion el is q'uixwil satak anima.

⁷Ayon ti', lajan on axca tx'otx' tx'otx'. A yet chi yak'on nab, chi yuc' tan tx'otx' a'. Ay tx'otx' caw watx' yawojal chi yak' bay mac chi mulnaj sat. Yuj tu' chi tx'ox Dios is watx'c'ulal yiban tx'otx' tu'.

⁸Palta ay tx'otx' tx'otx' q'uixc'al chi yak'a', c'al comon ac'un; c'am jabok yopiso. Yuj tu', ok jay yowal c'ul Dios yiban, cax ok tz'aok.

⁹Palta ex co camc'ulnebil, caxc'al max jaltok juntzan ti' ayex, chi jaoc yipok co c'ul, tol lanan e chaon watx'c'ulal Dios. Yuj tu', jojtak tol ayxa e colbanil.

¹⁰Yujtol a Dios bayc'al ijan chi yutej. Man ok tok c'ayc'ulal tzet max el e yunen yuj. Man ok tok e camc'ulal max e tx'ox bay, yin c'ayc'ulal yuj, yet max ex colwaj bay eb yet-xa Dios jetok. Ac'ala'to e colwaj tinani' c'apaxok.

¹¹Palta chi jochej tol junjun ex, tol caytu' che yut e ba masanil tiempo, yet watx' tz'akaki ok e yut e chaon pax tzet che yechbanej.

¹²Chi jochej tol man isajok che yut e ba yin yet Dios. Beybalnejek is beybal eb caw chi yaoc c'ul yin, eb caw tec'an chi yut ba. A eb chi beybalnen axca chi wal ti', chi yi eb juntzan tzet yak'nak Dios is ti' yak'oni.

¹³A yet max yak'on Dios is ti' bay Abraham yet payxa, c'am junokxa mac max loctek, ac'al bi Cham max loctek, yujtol c'am junokxa mac ec'ban yintak Cham.

¹⁴Max yal bay Abraham tu' axca ti': Wal yel, ok wak' miman in watx'c'ulal eban, ok wiwal aj can enatil, ẍi bay.

¹⁵A Abraham tu', mimanc'al chi yut c'ul yechbaneni. Yuj tu', max cha' tzet yak'nak Dios ti' yak'on bay.

¹⁶A yet chi co loctek bi junokxa mactxel, asan junok mac yelxac'al miman yelapnok jintak chi co loctek bi. A yet chi jalon tzet yetal tol yel, chi ton co loctek bi junokxa mactxel, yet watx' c'amc'al tzet chi jal yetok.

¹⁷Xan caytu' yutnak Dios yak'on is ti', cax ac'al oc max loctek is bi, yujtol chi yochej chi tx'ox jila', tol yel ok co cha' tzet yak'nak is ti' yak'on ayon, cax c'am chi q'uex is ti'.

¹⁸Yak'nak Dios is ti', cax max locban is bi, yuj tu', a tzet yalnakcanok, c'am bak'in tol man ok yunej, yujtol a Dios, c'am chi je' yak'on lek'tial. A tzet yalnakcanok, chi jaoc yipok co c'ul, yujtol janak oc co ba yul k'ab yuj on is coloni. Lanan jechbanen tzet ok yak' ayon, cax ayoc yipok co c'ul.

¹⁹Yujtol chi jaoc yipok co c'ul, xan tec'anxa waay co nabal tinani'. Lajanxa axca junok barco watx' mitx'lay tzakay yuj is mitx'banil ayaytok yul a'. A jun ayoc yipok co c'ul tu', watx'xa yayji octok yintak oc an makil nan templo Dios bay satcan,

²⁰bay babel ocnaktok Jesús co satak, yuj jakon ayon. Axca tu' max yun yoc sat sacerdoteal yin tojbalk'inal, axca yopiso Melquisedec.