Read Q'anjob'al Heb 7 Bible Online

Heb 7 - Q'anjob'al bible

Heb 7

¹A Melquisedec, reyal conob Salem yet payxa, cax sacerdote bay Dios Cham Axac'al Ocok. A yet junel, betnak ec' Abraham yak'lej owal yetok juntzanxa rey, max bet ayc'ay eb yuj. A yet max meltzoji, max bet chalay yul be yuj Melquisedec. Max k'anon watx'c'ulal Dios yiban Abraham tu'.

²Max yak' Abraham tu' is diezmo bay Melquisedec yin tzet max bet yi' bay owal tu'. A Melquisedec, chi yal elapnok, rey tojol beybal. Reyal c'apax conob Salem yayji. Salem, chi yal elapnok, junc'ulal. Yuj tu', xan chi yik c'apax Melquisedec tu', reyal junc'ulal.

³Man ojtakbilok mactxel is mam c'al is txutx, tamwal is yichmam. C'am tzet chi yaltek yuj yaljubal, tamwal yuj is camichal. Yuj tu', yenel Cham C'ajol Dios yayji, Cham sacerdote yin tojbalk'inal.

⁴A tinani xin, nachajokab el e yuj, tol miman yelapnok Melquisedec tu', yujtol max yak' jichmam Abraham is diezmoal tzet max yi yin owal tu' bay.

⁵Chi yal yul ley Moisés, tol a eb sacerdote yinatil Leví, ay yalon yet chaon is diezmo eb yet conob. Caxc'al yinatil Abraham eb yetok eb, palta yowalilc'alta' chi yak' eb.

⁶A Melquisedec tu', caxc'al man yinatilok Leví tu', palta chanak is diezmo Abraham, cham mac bay yak'nak Dios is ti', cax max k'anoncan watx'c'ulal Dios yiban Abraham tu'.

⁷Jojtak, tol a mac chi k'anon watx'c'ulal Dios yiban junokxa mactxel, wal yel miman yelapnok yintak jun mac chi k'antek watx'c'ulalil Dios yin.

⁸A tinani', a eb chi chaon diezmo eb jet conob, naba anima eb, cambejal yayji eb; palta chi yal tx'an Un, tol a Melquisedec, axca tol iquisto.

⁹A Leví chi chaon diezmo eb jet conob yet payxa, palta chi je' jaloni, tol ajun Leví tu' max yak' c'apax is diezmo bay Melquisedec yet max yak'on Abraham tu' yet.

¹⁰Yujtol a yet max bet chaon Melquisedec Abraham tu', c'amto chi alji Leví, palta ayoc yin mimanil Abraham tu', yujtol is yichmam.

¹¹A eb jichmam, max cha eb ley Moisés yul k'ab eb sacerdote yinatil Aarón, tol titnak yin Leví. K'inalok ta yuj eb chi je' watx'ji oc eb conob satak Dios, ta axca tu', ¿tzetto wal yuj max oc junxa sacerdote axca Melquisedec, cax man axcaok Aarón?

¹²Tatol chi q'uexlay eb sacerdote, yowalil chi q'uexlay c'apax ley Moisés.

¹³A jun mac lanan yal-lay ti', a ton Cham Jajawil. A Cham Jajawil ti', man yinatilok Leví Cham. Tx'ok junxa tribual eb israel ay yinatil Cham. A xol junxa tribu tu', c'am junok sacerdote xol.

¹⁴Jojtak, tol a Cham Jajawil, yinatil Judá Cham; palta c'am tzet yalnakcan Moisés ta ay junok eb yinatil Judá chi je' yoc yin sacerdoteal.

¹⁵Caw watx' nachaj el juntzan ti' juj, yujtol a junxa sacerdote max jay tu', a ton Cham Jajawil, lajan yopiso axca Melquisedec.

¹⁶Max oc Cristo yin sat sacerdoteal yujtol c'am bak'in ok lajwok is k'inal, man yujok yinatil albil yuj ley.

¹⁷Yujtol yalnak Dios bay axca ti': Sacerdote ach yin tojbalk'inal, axca yopiso Melquisedec, ẍi Dios bay.

¹⁸Yuj tu', a jun ley yet yalantok tu', lajwinakxa yopiso, yujtol c'am is yipalil, nabac'al ay.

¹⁹C'am junok tzet max watx'ji yuj jun ley Moisés tu', palta ay junxa yelxac'al watx' max occan is q'uexelok, a ton jun ayoc yipok co c'ul. Yuj jun tu', chi je' co jitzon oc co ba c'atan Dios.

²⁰A yet max watx'nencan yayji Dios jun ti', max loctek Cham is bi.

²¹A yet max oc eb sacerdote yin yopiso yet payxa, maj loclaytek is bi Dios; palta a yet max oc Jesús yin sacerdoteal, max loctek Cham is bi, yujtol tz'ibbilcan yul tx'an Un axca ti': Max yak' Cham Jajawil is ti' cax c'am bak'in ok q'uexa'. Yalnak Cham axca ti': Sacerdote ach yin tojbalk'inal, ẍi Dios, ẍi yul tx'an Un tu'.

²²Yuj tu' a junxa is trato max yak' tu', ec'ban watx'il yintak jun yak'nak yet babelal. A Jesús chi ak'on yunel jun trato tu'.

²³Xiwil mac ec'lejnak yin sacerdoteal. C'am junok eb chi je' yayjic'al ec' yin jun opiso tu' masanil tiempo, yujtol chi cam eb.

²⁴Axa pax Jesús xin, c'amxa bak'in ok camok. Yuj tu', ayc'al oc yin sacerdoteal yin tojbalk'inal.

²⁵Yuj tu', a mac chi alay oc yul k'ab Dios yuj, chi je' chaon is colbanil tol ayc'al yin tojbalk'inal yuj, yujtol iquisc'al Cham yin tojbalk'inal, cax chi tewi bay Dios juj.

²⁶A wal jun sat sacerdote ti', caw ay yopiso juj. Watx' Cham. C'am jabok is paltail ayoc yin. C'am yobtakil yin. Man lajanok beybal axca eb yobtakwom. Yel miman yelapnok yintak masanil bay satcan.

²⁷Man lajanok axca eb sat sacerdote yinatil Aarón, yujtol a eb tu', yowalil chi yak' eb xajanbal junjun c'u. Babel chi yak'can eb yuj is yobtakil, catatu' chi yak'on eb yuj yobtakil eb yet animail. A pax Jesús xin, junel ch'an yak'nak ba yin xajanbalil yuj co yobtakil, yet max yak' ba bay camich.

²⁸A eb ocnak yin sat sacerdoteal yuj ley Moisés, anima ton eb, ay is paltail eb; palta a yet max lajwi yopiso jun ley tu', munilc'al max loctek Dios is bi, cax max yaon oc yopiso junxa sat sacerdote, a ton is C'ajol, Cham tol tz'akaki yin watx'il yin tojbalk'inal.