Read Q'anjob'al Heb 8 Bible Online

Heb 8 - Q'anjob'al bible

Heb 8

¹A ton jun ti' chi wochej chi nachaj el e yuj, tol axca tu' yayji oc jun co sat sacerdote. A tinani', chotan ay bay watx' k'ab Dios bay is despacho bay satcan.

²Lanan yak'on yopiso bay yul acaw templo Dios, jun munilc'al watx'nebil yuj Cham Jajawil tu'; man animaok max watx'neni.

³Junjun eb sat sacerdote ayoc yopiso eb yak'wi ofrenda c'al xajanbal. Yuj tu' yowalil c'apax ay tzet chi yak' Jesucristo yin xajanbalil.

⁴K'inalok ta ayc'al ec' yulyibank'inal ti' tinani', c'am mi yopiso yin sacerdoteal, yujtol aytoc'al eb sacerdote, cax chi ak'wi c'apax ofrenda eb axca chi yal ley Moisés.

⁵Palta a yopiso eb tu', yenelc'al tzet ay satcan. Jojtak tol enelejc'al yayji, yujtol a yet c'amto chi watx'nej Moisés jun cajlub Dios, max yalon Dios bay axca ti': Chi cam wal eloni, tol lajan wal chi yun a watx'nen masanil axca yayji yechel max in tx'ox ayach bay jolom witz ti', ẍi bay.

⁶Palta a jun co sat sacerdote tinani', yelxac'al ec'ban watx'il yopiso yintak yet eb tu', yujtol a' chi ak'on yunel jun is trato Dios yak'nak ayon. A jun is trato tu', ec'ban watx'il yintak jun babel trato, yujtol tz'unbil ay yiban yalben Dios yelxac'al watx'.

⁷K'inalok ta c'am junok tzet chi yak' palta yin jun is babel trato tu', man xam yowalilok max yak' jun yet is cab trato ti'.

⁸Palta max yil Dios tol yob yutnak ba eb anima tu'. Yuj tu' xan chi yal yul tx'an Un axca ti': Axca wal ti' yalon Cham Jajawil: Ok ajapnok jun c'ual cax ok in watx'nej junok yet is cab trato yetok eb yinatil Israel, c'al yetok eb yinatil Judá.

⁹A jun trato tu', man lajanok yetok jun max in watx'nej yetok yichmam eb, yet max wion eltek eb bay Egipto. Axca tol ocnak in q'uetzan yin k'ab eb, max wion eltek eb. Ayin wal caw Yajaw in chi wala' tol a eb tu' maj yikej eb in trato max in watx'nej yetok eb, yuj tu' xan max in bekcan eb tx'oklil.

¹⁰Tix ok wut in trato yetok eb yinatil Israel yet yajtok tu'. Ayin wal caw Yajaw in chi wala' tol ok waoc juntzan in chekbanil yin is nabal eb, axca tol ok in tz'ibejcan oc yin yanimail eb. Ayin ok in oc is Diosalok eb, axa eb ok oc in conobok.

¹¹C'amxa junok ok yal bay yet conob: Ojtaknej el Cham Jajawil, man ẍiok. Yujtol ayin wal caw Yajaw in chi wala' tol masanil eb ok in ojtaknen elok, caxc'al unin, caxc'al icham anima.

¹²Ok wak' tancan is mul eb. C'amxa bak'in ok in natek is yobtakil eb, ẍi Cham Jajawil, ẍi yul tx'an Un.

¹³A yet max yalontek Dios yuj jun is cab trato ti', lanan tx'oxk'abneni tol ichamxa jun is babel trato. K'inalok ay junok tzet chi ichambi tinani', chi lajwi yopiso. Ta chi lajwi yopiso, chi c'ay c'apax elok.