Read Q'anjob'al Stg 2 Bible Online

Stg 2 - Q'anjob'al bible

Stg 2

¹Ex wuẍtak, ex wanab, tatol wal yel chi ja wal oc Cham Jajawil Jesucristo yin co c'ul, Cham tol miman yelapnok, yowalil lajanokabc'al chi jut co c'ul yin anima masanil.

²K'inalok tinani', ay junok beyom chi ocapnok bay chi co wajbaj co ba, ayoc oro col k'abej yuj, c'al pichilej ayxa may tojol ayoc yuj, cax chi oc pax apnok junok meba', tol yaynakil pichilejch'an ayoc yuj.

³K'inalok tol asannej yetok jun ayoc pichilej ayxa may tojol yuj tu' chon tzaloj yetok, cax chi jalon bay: Ayan chotan bay puch watx' ti', con chi bay, cax chi jalon bay jun meba' tu' axca ti': Watx' oc lecan bay tu'; ta c'amak xin, ayan chotan bay wakantak ti', ta con chi bay.

⁴Tatol caytu' chi jut axca tu', chi yal elapnok tol ay mactxel ay yelapnok yul co sat, cax ay mactxel tol c'am yelapnok yul co sat. Lanan co beyc'ulnewi yin man watx'ok chi yal tu'.

⁵Ex wuẍtak, ex wanab camc'ulnebil wuj, abek. A eb meba' yul sat eb ay bay yulyibank'inal ti', a ton eb chi sic'laycan el yuj Dios, yet watx' chi yaoc eb c'ul yin Cham. Axca ton tu' max yun beyomnelaycan eb yuj Dios, yujtol ok yican eb satak xol eb ayoc yul k'ab Cham, jun satakej max yalcantek, tol ok yak' bay eb tol chi camc'ulneni.

⁶Axa pax ex tol c'am yelapnok eb meba' yul e sat, naek. ¿Mactxel eb chon etneni, cax chon iontok satak yajaw? A ton eb beyom.

⁷A ton eb tu' chi buchon is bi Cristo Cham bay ayonxa oc ti', ti pax tol caw miman yelapnok jun biej tu'.

⁸Palta ay jun is ley Cham co Reyal yul tx'an Un Tz'ibbilcanok tol chi yal axca ti': Che ya'ilnej eb e yet animail, axca che yut e ya'ilnen e ba junjun ex, ẍi. Tatol chi jikej bay chi yal jun ley tu', watx' chi jut co ba chi yal tu'.

⁹Palta tatol man lajanok chi jut co camc'ulnen anima masanil, yob chi jut co ba. Ac'al oc jun ley tu' chi aloni, tol yob chi jut co ba.

¹⁰Ta ay junok tzet yetal chi cheklay jun yuj jun ley tu', cax c'am chi jun paxok, yujc'al ch'an jun tu' xan chi titcan bulnaj masanil ley tu' jiban.

¹¹Max yalcan Dios axca ti': Manchak e yaoc e mul yul k'ab e yetbi junjun ex. Manchak e mak' cam e yet animail, ẍi. A ton Dios max aloncan cabil. Yuj tu xin, caxc'al tol c'am chon mulji, palta tatol chi jak' cam junok jet animail, chi yal elapnok xin, tol mayal co ten tzet chi yal jun ley tu'.

¹²Yuj tu xin, xan watx'okabc'al chi jut k'anjab co ba, watx'okab chi jut co beybal. Yujtol ok on beyc'ulnelay yuj jun ley chi ak'on co bekbanilal.

¹³Tatol c'am chi ok' co c'ul yin eb jet animail, man ok ok' c'apax c'ul Dios jin, yet ok on beyc'ulnenok, palta tatol chi ok' co c'ul yin eb jet animail xin, ok ok' c'apax c'ul Cham jin yet c'ual beyc'ulal tu'.

¹⁴Ex wuẍtak, ex wanab, tatol chi jala' tol chi jaoc co c'ul yin Dios, cax c'am pax chi jun tzet yetal watx', toc'al chi jal chi yal tu'. Ta cac'al tu' chi jut jaon oc co c'ul yin Dios, tok mi wal chon colchaj yuj che na'.

¹⁵K'inalok ta ay junok juẍtak, ma junok janab tol meba'ch'an, c'am is pichil, cax c'am c'apax lobej,

¹⁶cax chi jalon bay axca ti': Xel a ba xin, manchak ach oc il, k'aẍnan, lowan, ta con chi bay, palta c'am pax jabok tzet chi jak' bay yuj is cawxinakil tu', ¿xin ta watx' axca tu'?

¹⁷Yuj tu xin, xan ta chi jaoc co c'ul yin Dios, cax c'am pax tzet yetal watx' chi junej, nabac'al ton wal chi jaoc co c'ul yin Dios chi yal tu'.

¹⁸Tekan ay mactxel ok alon axca ti': Ach ti', asannej wal chaoc a c'ul yin Dios. Axa pax ayin ti' xin, a watx' unbenal chi el wuneni, ẍi. Palta chi wal ayin ti', tol c'am mactxel chi je' tx'oxk'abnen elok, ta yel wali, ayoc Dios yin c'ul, tatol c'am tzet yetal watx' chi yunej. Ay mactxel xin, tol a yin is watx' unbenal chi txecloj elok, tol yel wali, ayoc Dios yin c'ul.

¹⁹Ay mactxel chi yaoc yin c'ul, tol junnej Dios; watx' ton tzet chi na' tu'. Ac'ala' eb espíritu yob chi ya c'apax oc eb jun tu' yin c'ul, cax chi bilaj eb yuj xiwilal yuj.

²⁰Ay jaywan ex, axca wal tol c'am e nabal, nachajokab el juntzan ti' e yuj xin. Tatol chi jaoc co c'ul yin Dios jaloni, cax c'am tzet yetal watx' chi junej, c'am jabok yelapnok chi yal tu'.

²¹A cham jichmam Abraham yet payxa, max yitok is c'ajol Isaac, yuj yak'on tz'a yin xajanbalil naoni, yujtol caytu' max yun yalon Dios bay. Yuj wal tzet max yun Abraham tu xin, xan watx' ton cham satak Dios.[1]

²²Co naek xin, tol max yaoc Abraham is c'ul yin Dios, yuj tu' xan max je' yiken tzet max ak'lay yunej. Ato wal yet max yun cham jun tu', max txeclojcan el sic'libil tol ay ton wal oc Dios yin c'ul.

²³Axca ton ti' max yun yunencan el tx'an Un Tz'ibbilcanok, bay chi yal axca ti': Axa yaon oc Abraham yin c'ul, tzet max yal Dios bay, xan watx' max cancan yul sat Cham, ẍi. Ac'ala', yalon c'apax canok, tol a Abraham, yamigo ba yetok Dios.

²⁴Yuj tu xin, nachajokab el jun ti' e yuj, tol watx' on satak Dios yuj tzet watx' chi junej, mannejc'alnak yuj chi jaoc co c'ul yin.

²⁵Cay c'apax tu' max yun jun ix ix chi yik Rahab yet payxa, ajmul ix ton ix, palta ak'bil posada eb chekbej eb israel yuj ix. Ac'al oc ix max chekon meltzoj eb bay junxa be, yet watx' c'am chi michchaj eb.[2] Yuj jun is watx'c'ulal ix tu' bay eb, xan max al-lay ix watx'il yuj Dios.

²⁶Axca wal junok mimanilej camnakxa, yuj c'amxa yanimail, cayton tu' jayji ocok, tatol toc'al chi jaoc co c'ul yin Dios, cax c'am pax tzet yetal watx' chi junej.