Read Q'anjob'al Stg 3 Bible Online

Stg 3 - Q'anjob'al bible

Stg 3

¹Ex wuẍtak, ex wanab, manokab xiwilok ex che yaoc e ba meẍtolal, yujtol e yojtak, tol ayon meẍtol on ti', ok cam co beyc'ulnelay yuj Dios.

²Yujtol co masanil, caw coc'takc'al chi oc co yobtakil. Tatol c'am bay chon ayc'ay yin tzet chi jala', watx' on ton wal satak Dios chi yal tu', cax chi je' co mitx'on oc wanaj co mimanil masanil.

³A yet chi jaon oc freno junok no chej, yujc'al ton ch'en freno tu', xan yikemc'al no' bay chi ji' beyok.

⁴K'inalok junok te barco, caxc'al caw miman te', cax chi low tinnaj cak'ek' yin te', palta asannej wal yuj is yaliẍ tx'umbanil, xan yalc'al bay chi je' yilay bey yuj nak chi tx'umon tu'.

⁵Axca ton tu' yayji co ti'. Yaliẍ wal ch'an, palta a caw wal tol chi maynej ba yin tzet mimek chi je' yuneni. K'inalok ay junok tz'it k'ak' chi ayc'ay bay junok k'aktelak, manxa jantakok te' chi tz'atok yuj.

⁶Caytu' yayji co k'anej, lajan wal yetok k'ak'ej. Masanil yobtakil bay yulyibank'inal ti' chi je' yuj. Yetbeyom co mimanil yayji co ti' ti'. Ac'al oc chi iontok co mimanil yin yobtakil yin masanil co k'inal. Axca tol a bay k'ak'al infierno chi tit k'anej axca k'ak'ej chi jala'.

⁷A junjun makan no no', no tz'iquin, no labaj, c'al no noal a' mar, chic'al ton wal je' mansonelay no', max tzakay wal eb anima mansoneni.

⁸Axa pax on ayon anima on ti', c'am wal junok on chi je' co mansonen co ti'. Caw yob, c'am mactxel chi tzakay mitx'on waayok. Lajan axca labaj ay venenoal, tol chi cam eb anima yuj.

⁹A yetok co ti' chi jal watx' k'anej bay Cham Jajawil, a ton co Mam Dios, ac'al pax oc yetok, chi co k'antek yowal c'ul Dios yiban eb jet animail, tol watx'nebil yuj Cham axca yayji oc Cham tu'.

¹⁰Ac'al oc co ti' chi jak'balnej yin jalon watx' k'anej bay Dios, ac'al oc chi jak'balnej pax yin bajwal. Ex wuẍtak, ex wanab, man mojok tol chi co beybalnej axca tu'.

¹¹Tok chi ajol a' aej watx', c'al a' aej c'achi' bay junnej nuk' aej.

¹²Yetok c'apaxok, k'inalok ta ay junok moc'an te higo, tokwal ok je' tol sat olivoxa ok yak' te'. Ma junok moc'an uva xin, tokwal ok je' tol higoxa sat an ok yak'a'. C'am junok nuk'a' chi ajol aej c'achi' c'al watx' aej bay.

¹³Ta ay junok ex jelan ex, chi nachaj el junok tzet yetal e yuj, yowalil tol watx' che yut e beybal xin. Che tx'oxk'abnej el e jelanil tu' yin e yunen masanil tzet yetal yin man maynejbailok.

¹⁴Palta tatol toc'al chi tit e yowal, cax asannejc'al e yet che yochej, che yochej tol asan ex che yala', ta axca tu', man e yaloc e ba jelanilal. Ta caytu' che yut e ba, miman txequel tol lanan e yak'on lek'tial yin e yalon oc e ba jelanilal tu'.

¹⁵Tatol caytu' che yut e ba, manak bay Dios chi tit jun e jelanilal tu xin, titol yet sat tx'otx' ti', yet eb comon anima. A jun e jelanilal tu', yet nak diablo chi yal tu'.

¹⁶Yujtol a eb tol axac'al yet chi yochej, cax chi yochen axac'al chi aloni, a ton bay tu' chi jay somc'ulal yuj eb xin, cax xiwil juntzanxa yobtakil chi oqui.

¹⁷A pax jun jelanil chi tit bay Dios xin, man cayok tu' yoqui. Tatol ayoc jun jelanil tu' jin, watx' onc'al yul sat Dios, junc'ulalxac'al ayon yetok jet animail. Manso on, pakaki on yin tzanc'al tzet chi junej. Chi ok' co c'ul yin eb jet animail. Watx'c'al chi jut co c'ul bay eb. C'am chi jut co ba yin cabc'ulaltak bay eb, man cabsatok chi jut c'apax co ba.

¹⁸Ta asan junc'ulal chi ji' can, ok co cha' paktzil co watx' beybal tu', yuj chi ji' can junc'ulal tu'.