Read Q'anjob'al Stg 5 Bible Online

Stg 5 - Q'anjob'al bible

Stg 5

¹Abek ex beyom. Elokab wek'ek'ok e yaw e yok' tinani', yujtol ay mimek yailal chi bey jay e satak.

²Lananxa k'atok e beyomal. A e pichil bulan ec'ok, olquiẍtakxac'al yuj no no'.

³Cay c'apax tu' e tumin, caxc'al mi oro ch'en, ma plata ch'en, k'uxtakxa. A k'uxtakil ch'en tu' chi tx'oxon el e yobtakil. Axca wal chi yun tz'a junok tzet yetal yuj k'ak'ej, cay wal tu' ok yuncan el e mimanil yuj ch'en. Toxa chi jay lajub tiempo; axa pax ayex ti', asan e wajban e beyomal che yunej.

⁴Toc'al chi ul sa' eb e majan c'u ayex, tokwal che tojlanej c'u eb, toc'al che yetnej eb. Chi aj yaw eb bay Dios tinani', cax chi yalon aj eb e mul. Max ablay tzet max yal eb yuj Cham Yajaw yin Masanil.

⁵Watx' max ec' yulyibank'inal ti' e yuj ayex ti', nojnak wal el yul e yatut yuj masanil tzet yetal ay ayex. Toc'al chi etax el e yuj. Lajan ex axca junok wacax chi ak'lay serbil sic'libil, chi xew bak'echbi xin, cax chi ak'lay camok. Janic'xanej tiempoal che yak' e nabal.

⁶Ayex wal max e yacantok yiban eb tol watx' is nabal, ay eb max e yak' camok, palta majc'al wal col ba eb ayex.

⁷Ex wuẍtak, ex wanab, miman che yut e c'ul; echbanejek masantac'al ok jay Cham Jajawil. Ilab eb mulnajwom tinani', chi yechbanej eb jay babel nab, c'al lajub nab. Mimanc'al chi yut eb c'ul yin yechbanen yelol yawoj.

⁸Axcaokab chi yut ba eb mulnajwom tu', cayokab tu' che yut e yechbanen jay Cham Jajawil. Tec'an che yut e ba, yujtol toxa wal chi jayi.

⁹Ex wuẍtak, ex wanab, manchak ex alxi e yin junjun ex, yet watx' man ok ex beyc'ulnelayok, yujtol toxa wal ok jay Cham ok on beyc'ulnenok.

¹⁰Ex wuẍtak, ex wanab, a eb max alon el k'anej Dios yet payxa, max techaj wal yuj eb yiklen oc yatakilal, cax max yak'on eb mimanc'ulal. Yuj tu xin, techajokab e yuj axca eb tu'.

¹¹Jojtak wali, tol a eb max techaj yuj tu', tzalojc'ulal ay eb tinani'. Ay bay max e yab yabixal cham Job, tol tec'an max yut ba cham yet max yaben cham yail. E yojtak c'apaxok, tzetbil max yun yeloc cham yinxa lajubal yuj Cham Jajawil. Max ok' c'ul Cham Jajawil tu' yin, cax max cusoc c'ul Cham yin.

¹²Palta ex wuẍtak, ex wanab, ay wal junxa tzet caw yowalil ok wal ayex. Man comonokc'al che loctek bi Dios Cham aj satcan, ma bi junokxa mactxel, ma junokxa tzet yetal bay yulyibank'inal ti'. Cayokab tu' chi yun e k'anjab axca ti xin: Tatol yel, Ja' quex chi. Tatol man yelok xin, C'amak quex chi. Cayokabc'al tu' che yut k'anjab e ba, yet watx' c'am tzet chi jayoc e yiban.

¹³Ta ayex lanan e yaben yail tinani', txajlanek. Ta ay ex pax ayex oc yin tzalojc'ulal xin, bitnejek junok e watx' k'anej bay Dios.

¹⁴Ta ay ex ya' ex ay, awtejek eb yancianoal iglesia. Axa ex anciano ex ti', txajlanek yuj eb. Che yaoncan oc aceite yin eb, yin bi Cham Jajawil.

¹⁵Tatol che yaoc yin e c'ul yet lanan e txajli yuj eb tu', ok ton colchajcan el eb xol is yailal. Axa Cham Jajawil ok ak'oncan jay c'ul eb. Ta ay junok yobtakil max el yunen eb, ok jolayc'ay yiban eb yuj Dios.

¹⁶Yuj tu xin, alek ajtek e yobtakil ayex junjun ex. Cax txajlanek e yuj junjun ex, yet watx' ok jay e c'ul. A eb watx' beybal, tol chi k'an juntzanok tzet yetal bay Dios yin masanil is c'ul, xiwilxa tzet yetal chi watx'jican el yuj is txaj eb tu'.

¹⁷A yet max ec' cham Elías yet payxa, naba anima cham axca onc'al ti'. Yin masanil is c'ul max txajli, yet watx' c'amxa chi yak' nab. Nan is can abil wal majxa yak' nab bay jun lugar tu'.[3]

¹⁸Atoc'al yet max k'anon nab yin txajil junelxa, catatu bian, max jay pax nab. Atowal yet tu' max yaxbi pax aj jun lugar tu' junelxa.

¹⁹Ex wuẍtak, ex wanab, ta ay junok mactxel e nan e xol chi yican el ba yin is k'anej Dios, matawal ay junok ex che yaoc nabal eb, yet chi oc pax eb junelxa.

²⁰Ojtaknejek el jun ti', ta ay eb chi yetnejtok beybal, cax che yaon oc nabal eb yuj watx'ji oc beybal eb tu', lanan wal e colon el yanimail eb yul k'ab camich. Yuj wal tu' xan ok ak'lay c'ay jantak yobtakil eb.