Read Q'anjob'al 1 P 1 Bible Online

1 P 1 - Q'anjob'al bible

1 P 1

¹Ayin ton Pedro in, chekbej in Jesucristo, chin tz'ibejtok jun in carta ti' ayex, ex sakleminak e yayji yulak makbej Ponto, yulak yet Galacia, yulak yet Capadocia, yulak yet Asia, c'al yulak yet Bitinia.

²Ayon ti', sic'bil onxa el yuj co Mam Dios, axcata' max yut naon oc jin yettax payxa. A Cham Espíritu Santo max con aon oc yetok, yet watx' chi jikej tzet chi yala', cax chi elcan co yobtakil jiban yuj chiq'uil Jesucristo. Mimanokab watx'c'ulal, c'al junc'ulal Dios chi yak' ayex bay tu'.

³Jalek watx' k'anej bay Dios, is Mam Cham Jajawil Jesucristo, yujtol max ok' c'ul Cham jin. Max con yak' aljok Cham yet cayelal, yuj yictzojbail Jesucristo xol eb camnak. Yuj tu xan chi jaoc yipok co c'ul, tol a' ok ak'on co k'inal.

⁴Ok yak' Dios jun co satak tol c'ubabilxa yuj bay satcan. A jun satakej tu', ayc'al ec' yin tojbalk'inal. Man ok etaxtok, tamwal ok tactok yili axca junok xumac c'un tac yili.

⁵Yujtol chi jaoc co c'ul yin Dios, xan taynebil onc'al yuj yetok is yipalil, masantac'al ok tz'aknaj co chaon co colbanil. A co colbanil tu', watx'xa yayji, yet watx' ok txeclonelay aj yet lajub tiempoal.

⁶Yuj tu' xan caw chon tzaloji. Caxc'al mi yowalil chi jab yail mimek porobal janic'ok tiempoal, palta ac'ala' co tzaloji.

⁷Ilab ch'en oro tinani', yowalil chi ak'lay porobal ch'en xol k'ak'ej, yet watx' chi txecloj elok ta watx' ch'en, ma yob ch'en. Cayon c'apax tu', yowalil chon ak'lay porobal, cax chi txecloj elok, tatol yel wali chi jaoc Dios yin co c'ul ma c'amak. Ta chi techaj juntzan porobal ti' juj, ec'ban yelapnok jaon oc co c'ul yin Dios yintak ch'en oro chi yal tu', yujtol a ch'en oro tu', txennej tiempoal ch'en. Ta chi techaj porobalil tu' juj, ok on al-lay watx'il yet ok jay Jesucristo. Mimanbil ok junej, miman ton ok yun jelapnok yet tu xin.

⁸Caxc'al tol c'am bay max e yil yin Jesucristo ayex ti', palta che camc'ulnej pax Cham. C'am ton bay max e yil yin, palta che yaoc e c'ul yin Cham. A xan chex tzaloj wal sic'libil, manxa jantakok is watx'il jun tzalojc'ulal tu', tol c'amxa axca chi yun yal-lay elok.

⁹A co colbanil ok co cha tu', a ton tu' uktebil juj, xan chi jaoc Cham yin co c'ul.

¹⁰A eb chekbej Dios yet payxa, max yak' eb yip sayon yil tzetbil wal yayji oc co colbanil ti'. Max yak'lej eb naon el tzet lanan yaloncan el eb yin ayoktoc'al, tol ok tx'ox Dios watx'c'ulalil ayon.

¹¹A Yespíritu Cristo ayoc yin eb, a' max ak'on yojtaknej el eb jantak yailal t'inan yilon Cristo. Lajwi tu xin, axa Cham ok yak' Yajawilal. A eb chekbej Dios tu', max yak'lej eb naon elok, mactxel jun ok jay tu', c'al tzet tiempoal ok jayok.

¹²Palta max ak'lay yojtaknej el eb yuj Dios, tol a juntzan max yalcan el eb tu' man yujok nachaj el yuj eb xan max yal eb, palta yet watx' chi nachaj el juj ayon ti'. A tinani' xin, ayon chi jalil k'anejal yet colbanilej mayal co watx' alnej el juntzan tu' ayex. A Espíritu Santo chekbiltek satcan, a' max oc jetok yet max jaloncan elok. Ilab eb ángel, chi yochej c'apax eb chi nachaj el juntzan ti' yuj.

¹³Yuj tu xin, watx'nejek e nabal. Bayc'al ijan che yut e ba. Caw che yaoc yipok e c'ul tzet ok yak' Dios ayon yuj is watx'c'ulalil yet ok jay Jesucristo.

¹⁴Ayex ti', yuninal exxa Dios wetok, cax yikem ex bay. A yet yalan, xiwil tzet max e yochej ocok, yujtol manto e yojtakok Dios. Axa tinani xin, majxa e beybalnej axca tu'.

¹⁵A Cham mac awtenej on, caw wal watx'c'al Cham, cax c'am jabok is paltail. Axcaokab Cham tu', cayexokab tu', watx'c'al che yut e ba.

¹⁶Yujtol chi yal Dios yul tx'an Un Tz'ibbilcan axca ti': Watx'c'al che yut e ba, yujtol watx' inc'al ayin ti', ẍi.

¹⁷A Dios ok beyc'ulnej junjun anima, atac'ala' is beybal junjun. Man tx'ok tx'okok ok yun beyc'ulnelay junjun yuj. Yuj tu xin, tatol chi jaloc Cham co Mamok, xiwokonek bay yet ayon ec' bay yulyibank'inal ti'.

¹⁸A juntzan beybal eb e yichmam beybalnebil e yuj yet yalantok, caw nabac'al max e yetnej e ba yin. Axa tinani' xin, colchajnak exxa el yul k'ab juntzan tu'. E yojtakxa tol a co colbanil ti', c'am chi manchaj yetok tzet c'un lajwi, ma axca ch'en oro ma ch'en plata.

¹⁹Palta a chiq'uil Cristo caw wal miman yelapnok, a' max con manoncan elok. Ilab tol max mak'lay cam Cham yin xajanbalil axca junok calnel c'am jabok tacnakil, tamwal jabok tzet yob yili oc yin.

²⁰A yet manto yesnej aj Dios yulyibank'inal ti', nabilxa yuj tol caytu' ok yun yelol yiban Cristo. Palta ato yet juntzan lajub tiempoal ti' max alaytek, yet chi txecloj el bay yulyibank'inal ti' yuj co watx'ilok.

²¹Yuj Cristo, xan max je' jaon oc Dios yin co c'ul tinani', yujtol a Cham max ictzonen aj Cristo xol eb camnak, cax max yion aj can. Yuj tu', caw wal chi jaoc Dios yin co c'ul, cax chi jaon c'apax oc yipok co c'ul.

²²A tinani', lanan jiken jun cuybej acaw yel. Axca tu' chi jut co jichlonen oc co beybal, yet watx' yel wali, ayokab co camc'ulal yin eb juẍtak, c'al yin eb janab. Yuj tu', yowalil chi co camc'ulnej co ba yin masanil co c'ul, c'al yin masanil jip.

²³Yujtol aljinak onxa yet cayelal. Man yinok co mam co txutx cambejal yayji max con alji yin cayelal tu', palta yujc'al k'anej Dios xan aljinak on, yujtol a' aj k'inalej yayji. A is k'anej ti', ayc'al ec' yin tojbalk'inal.

²⁴Axca yalon yul tx'an Un axca ti': Masanil anima, lajan axca an ac'un. Ayman chi etax el is watx'ilal eb axca wal chi yun yetax el an xumac bay xolak ac'un. A an ac'un chi takcan el an, axa is xumaquil an chi pukilok.

²⁵Palta a pax k'anej Cham Jajawil xin, ayc'al ec' yin tojbalk'inal, ẍi tx'an Un tu'. A is k'anej ti', a ton jun yabixal colbanilej watx' yoqui maxax al-lay el ayex.