Read Q'anjob'al 2 P 2 Bible Online

2 P 2 - Q'anjob'al bible

2 P 2

¹A eb wet israelal yet payxa, ay eb max tz'ak yaloc ba chekbejok Dios. Ac'ala' c'apax co xol, ay eb ok yaloc ba meẍtolal, cax yin ewantakil ok yak'on eb cuylay lek'ti cuybanilej co xol, yet watx' ayon ok on etax el yuj eb. Caw wal c'am yelapnok Cham Jajawil yul sat eb tu', palta ti pax wal a Cham max cam yuj tojolok is yobtakil eb. Yuj tu xin, munilc'al chi yitek eb yiban. Ayman ok c'aycan el eb yin junelnej.

²Xiwil mactxel ok beybalnen jun is yob beybal eb tu'. Yujc'al ton eb, xan ok al-layok tol c'am yelapnok jun beybalej yel bay ayon oc ti'.

³Yuj pek' tuminal eb, xan watx'xac'al ok yut yalon eb lek'tial k'anej ayex, a ton juntzan k'anej tol yulc'al yet eb max naon aj eb. Palta payxatax beyc'ulnebil eb yuj Dios. Yuj tu', yowalil ok c'aycan el eb yin junelnej. Maj je' colon ba eb bay jun c'aybanilal tu'.

⁴Co naektek tzet max yun yeloc eb ángel ocnak is yobtakil bay Dios. Tutun wal maj yak' mimanc'ulal yin eb. A ti yet eb, tol max k'oklaytok eb bay jun lugar chi yik Tártaro*fn* yuj Cham. C'anani max yun eb yetok cadena. Preso yayji eb xol k'ekk'inal tinani', masantac'al ok beyc'ulnelay eb.

⁵Yetok c'apaxok, maj yak' Dios mimanc'ulal yin eb anima yet payxa. Yanaktek jun owal aej mukwajwom yiban eb yobtakwom tu'. Asan Noé colchajnakcan el yetok ukwan is familia. A Noé tu', yalnak el xol anima tu', tol watx'okabc'al chi yut eb is nabal.

⁶Yetok c'apaxok, yanaktek Dios is c'aybanilal el eb aj Sodoma yetok eb aj Gomorra. Pilan lajwinak el cab conob tu', max tz'atok yuj k'ak'ej. Tanxac'al max yuncantok masanil. A eb lajwinak el tu', is tx'oxbanilok eb c'am Dios yul sat.

⁷Asannej Lot colchajnak el xol eb, yujtol watx' yayji is nabal. A yet c'amto chi lajwi el eb tu', max oc pitz'an cusc'ulal yin yuj eb.

⁸Watx'c'al is beybal Lot tu', palta junjunc'al c'u, cac'al ti' yiloni, c'al yaben juntzan tzet man watx'ok chi el yunen eb anima tu'. Yuj tu' xan cusc'ulalc'al ay yuj eb.

⁹Cac'apax tu' tinani'. Yojtak Cham Jajawil tzetbil chi yut colon el eb ayoc nabal yin, yet chi ak'lay porobal eb. Yojtak c'apax tzet chi yut yaoncantok eb man watx'ok is nabal bay yailal, bay chi tojcan eb, masantac'al ok jay jun c'ual yet ok beyc'ulnelay eb.

¹⁰Ay eb caw chi yaoc yin c'ul yunen juntzan tzet man watx'ok chi yochej oc yetok is mimanil. C'am wal jabok yelapnok Cham Jajawil yul sat eb. A ton eb ti' ok alaycantok bay yailal tu'. C'amxa chi xiw eb yunen tzet man watx'ok. Comonc'al chi yun eb tzet chi yochej. Toltax c'am chi xiw eb buchwaj yin juntzan mac caw miman yelapnok.

¹¹Toltax eb ángel, ti pax wal xiwil yipal eb, cax miman c'apax yelapnok eb, palta c'am chi tec'baj ba eb yalon aj is mul juntzan tu' yin buchwal k'anej satak Cham Jajawil.

¹²Axca wal junok no no' c'am is nabal, caytu' eb anima tu', yujtol asanc'al tzet chi yochej oc is mimanil eb chi el yuneni. Comon chi buchwaj eb yin juntzan tzet man yojtakok eb. Yuj tu' xan ok c'aylay el eb, axca chi yun c'aylay el no no' tol chi alji no' yuj mitx'layi, c'al c'aylay elok.

¹³Axca chi yut yaon oc eb yailal yiban juntzanokxa, caytu' ok yun yalay c'apax oc yailal eb. Caxc'al c'ualil, chi yaoc eb nabal yunen tzet chi yochej ocok, yuj yak'on eb tzalojbok c'ul yin. Caw wal q'uixwiltak yayji eb e xol, yob e yili yul sat Dios yujc'al eb. Yujtol comonc'al chi low eb e yetok yet che yak'on waj loj. A yet chi oc eb e yetok, toc'al chi yak' eb tzalojbok c'ul yin tzet chi yochej oc eb tu'.

¹⁴Asanxanej mulej chi na eb yet chi yilon eb junok ix. Caw wal c'am chi je' mitx'on oc waan ba eb yunen ajmulal. Chi ak'lay c'ul eb c'amto tec'anil yuj eb. K'aynak eb yochen oc tzet man watx'ok. Yuj tu' xan caw wal aytek yowal c'ul Dios yiban eb.

¹⁵Max bekcan eb watx' beybalej, cax max c'aycantok eb. Yuj tu' xan a is beybal cham Balaam,*fn* cham c'ajol Beor, a' chi beybalnej eb. A cham Balaam tu' max yaloc ba chekbejok Dios, palta asan yion tumin yin tzet man watx'ok max yochej cham.

¹⁶Axa laj no burro tol jojtak tol c'amc'alta' chi je' k'anjabi, a no' max tzuon yuj is yobtakil tu', max k'anjab aj no' axca anima. A no' tennej oc waan yin is c'am nabalil chi yun tu'.

¹⁷A eb ak'om lek'tial co xol ti', axca wal junok nuk' aej tannakxa, cay wal tu' eb. Yetok c'apaxok, axca wal junok asun toc'al chi lanani ec' yuj cak'ek', cay wal tu' eb. C'am chi ec' tojcan eb bay k'ekk'inal yin junelnej.

¹⁸Toc'al chi yiaj can ba eb yalon tzet c'amxac'al yelapnok. Ilab chi yal eb axca ti': Chi je' junen tzet man watx'ok, chic'al je' junen tzet chi jochej oc yetok co mimanil ti', ẍi eb, chi tz'ak yalon eb. Caytu' chi yut yak'on eb c'ul eb lanan colchaj el xol tzet man watx'ok.

¹⁹Chi yal eb axca ti': Bekanc'al junen tzet chi jochej, ẍi eb, chi tz'ak yalon eb; palta a eb tu', man bekanok yayji eb, yujtol ayoc eb yak'omalok serbil tzet man watx'ok tu', yujtol a mac chi can yalan yuj junok tzet yetal, chi yal elapnok tol chi oc yak'omalok serbil jun tzet tu'.

²⁰A yet max jojtaknej el Jajawil Jesucristo co Colomal, atax yet tu' max con colchaj el yul k'ab juntzan tzet man watx'ok sat tx'otx' ti'; palta ta chi jaoc co ba yul k'ab juntzan tu' junelxa, ta chon can yalan yuj, yelxac'al yob jet yintak pax yet yalan.

²¹A eb axca tu' chi yut ba, matawal maj yaoc eb nabal yin jun watx' beybalej ti'. Watx'to wal yet eb jabok yet yalan. Akxa xin, max yaoc eb nabal yin. Chi lajwi tu' cax chi bekoncan eb chekbanil Dios ak'bil bay eb. Yuj tu' xan yelxac'al yob yet eb tinani'.

²²Ay wal jun k'anej caw wal yel, chi yal axca ti': A no tx'i', chi meltzoj no', chi lek'on aj is xaw. Yetok c'apax no txitam, chi lajwi tx'ajlay no', ayman chi toj no' xol tz'otz'ew, ẍi. Axca ton wal no' tx'i tu' ma no txitam tu', cay wal tu' eb ti', yujtol chi toj pax eb xol tzet man watx'ok junelxa.