Read Q'anjob'al 1 Jn 2 Bible Online

1 Jn 2 - Q'anjob'al bible

1 Jn 2

¹Ex axca tol wuninal e yayji, chin tz'ibejtok juntzan ti' ayex, yet watx' manchakxa e yun yobtakil xin. Palta ta c'uxan ay bay chi jun junok yobtakil, ay jun chi aon oc co ti' bay co Mam Dios, a ton Jesucristo. A Cham, a caw wal tol watx' ton Cham.

²Axca wal junok xajanbal, axca tu' max yun cam Cristo tojolok co yobtakil. Man asannejok yuj co yobtakil ayon ti', xan max cami, palta yuj is yobtakil masanil anima bay yulyibank'inal ti', xan max cami.

³Ta chi jikej tzet chi cheklay co beybalnej yuj Dios, tita' tol jojtakxa Dios sic'libil chi yal tu'.

⁴Ta chi jala' tol jojtakxa Dios, palta c'am chi jikej pax tzet chi cheklay co beybalnej, lek'ti on chi yal tu', cax c'am jabok yel ayoc jin.

⁵Ta chi jikej tzet chi al-lay xin, wal yel ay ton wal co camc'ulal yin Cham sic'libil. Axca ton ti' chi yun jojtaknen elok, tol ayon ton oc yin Cham.

⁶Ta ayon chi jala': Ayin ti', ay in oc yin Cristo, ta con chi, yowalil chi co beybalnej beybal Cham.

⁷Ex wuẍtak, ex wanab, a jun chekbanil ok waltok ayex ti', man aokto tinani' ok e yabej, yujtol a jun chekbanil ti', albilxa ayex yettaxc'al max ex oc yetok Dios. E yabnakxa jun chekbanilej ti' yet payxa, tol yowalil chi co camc'ulnelej co ba.

⁸Palta chi waltok jun chekbanil ti' ayex junelxa. Lanan co beybalnen jun chekbanilej axca max yut beybalnen Jesucristo, yujtol lanan yel k'ekk'inal jin. Axa acaw sakk'inal ayoc jin.

⁹Ta chi jala' tol sakk'inalxa yayji co nabal, palta cac'al ti' pax chichon oc co c'ul yin junok juẍtak ma yin junok janab, k'ekk'inalto yayji co nabal chi yal tu'.

¹⁰Ta ay co camc'ulal yin eb juẍtak c'al yin eb janab, ti tol sakk'inalxa yayji co nabal chi yal tu', xan c'am junok tzet ayoc jin tol chon ak'on ayc'ayok.

¹¹Axa eb cac'al ti' chichon oc c'ul yin junok juẍtak xin, ma yin junok janab, k'ekk'inalto yayji is nabal eb. Axca wal junok mac chi bey xol k'ekk'inal, cax c'am chi yil bay chi ca toji, cay wal tu' eb, yujtol etaxnak el is nabal eb.

¹²Ex ac' creyente, chin tz'ibejtok juntzan ti' ayex, yujtol a Dios max jooncan c'ay e yobtakil yuj Jesucristo.

¹³Ex icham creyentexa, chin tz'ibej c'apaxtok ayex yujtol e yojtakxa Cham ayxac'alta' ec' yet manto yesnej aj yulyibank'inal ti'. Ac'ala' ex creyente tec'anxa e waayi, chin tz'ibej c'apaxtok ayex, yujtol max cancan nak diablo yalan e yuj. Ac'ala' ex ac' creyente, chin tz'ibejtok juntzan ti' ayex, yujtol e yojtakxa co Mam Dios.

¹⁴Ex icham creyentexa, chin tz'ibejtok ayex, yujtol e yojtakxa Cham ayxac'alta' ec' yet manto yesnej aj yulyibank'inal ti'. Ex creyente tec'an waayi, chin tz'ibejtok ayex, yujtol ayxa e yip yin e creyenteal, c'al chabilxa k'anej Dios e yuj wetok, cax max cancan nak diablo yalan e yuj.

¹⁵C'amokab co camc'ulnejek co ba yetok yulyibank'inal ti', tamwal yetok juntzan tzetak yetal ay bay yulyibank'inal ti'. Ta chi co camc'ulnelej co ba yetok, c'amxa co camc'ulal yin co Mam Dios chi yal tu'.

¹⁶A eb yet yulyibank'inal ti', asan yet is mimanil eb chi yochej ocok, cax chi yochen c'apax oc eb tzetak yetal chi yil is sat, cax chi say eb mimanbilal. Palta a juntzan beybalej tu', man yetok co Mam Dios, palta tol yet yulyibank'inal ti'.

¹⁷A yulyibank'inal ti', c'al masanil yob yochwan eb anima, lanan lajwi ec'ok, palta tatol chi jun yochwan Dios, iquis onc'al yin tojbalk'inal.

¹⁸Ex camc'ulnebil wuj, lajubxac'al tiempo bay ayon ec' ti'. Max jabej tol a nak ajc'ul yin Cristo, ok tx'oxaj ba nak. A tinani', xiwilxa eb ajc'ul yin Cristo mayal tx'oxaj ba. Yuj tu' xan jojtakxa, tol lajubxa tiempo bay ayon ec' ti'.

¹⁹A co xol max el eb ajc'ul yin Cristo, yujtol manc'alta' jetbiok eb. K'inalok ta caw wal jetbi eb, toc'alta' max ayjic'al ec' eb jetok, palta max el eb, yet watx' chi txecloj elok tol manc'alta' jetbiok eb.

²⁰A pax ex ayex ti xin, max yak' Cristo Cham Espíritu Santo ayex jetok. Yuj tu' xan jojtak co masanil jun cuybej acaw yel.

²¹C'am junok ex tol man e yojtakok jun cuybej yel tu'. Yuj tu' xan chin tz'ibejtok ayex. E yojtakxa c'apaxok, tol c'am junok lek'tial xol jun cuybej acaw yel tu'.

²²Chi waltok e yabej mactak txel chi ak'on lek'tial: A eb chi aloni tol a Jesús man Cristook, chi yal elapnok tol man chekbiloktek Cham yuj Dios, a eb tu' ajc'ul yayji oc eb yin Cristo, yujtol a yet chi yintaknen el eb Cham C'ajolej, chi yintaknej c'apax el eb Cham Mamej.

²³Tzanc'al mac chi aloni tol a Jesucristo man C'ajolok Dios, c'am oc Dios yin eb. A pax eb chi alon xin, tol C'ajol ton Dios Cham, ay ton oc Dios yin eb.

²⁴Yuj tu' xan a jun cuybej max jab yettax max on oc yetok Dios, yowalil asan chi jaocc'al yin co c'ul. Ta caywal tu' chi jut jaon oc yin co c'ul, ok on ayjokc'al ec' yin co Mam Dios, cax ok on yaon c'apax oc yin is C'ajol.

²⁵Max yak'can Jesucristo is ti' ayon, tol ok yak' co k'inal tol ayc'al yin tojbalk'inal.

²⁶Ti chi waltok e yab yuj juntzan eb chi ochen chex etneni, xan chin tz'iblitok ayex.

²⁷Max yak' Jesucristo Cham Espíritu Santo ayon junjun on. Yuj tu' xan man yowalilok tol tx'okto wal junok anima chon cuyoni, yujtol a Cham Espíritu tu' chon cuyon yin masanil tzet yetal. A cuybanilej chi yak' ayon, yelc'al elok, c'am junok lek'tial aytok xol. Yuj tu', ayjanekc'al ec' yin Cristo, yujtol caytu' yalon Cham Espíritu ayon.

²⁸A tinani', ex camc'ulnebil wuj, yowalilokab ayonc'al ec' yin Cristo, yet watx' c'am on chon xiwaj yet ok jayok, cax c'am chon q'uixwi aj satak, yet ok jay tu'.

²⁹Jojtakxa tol caw wal watx' ton Jesucristo. Yuj tu', tix wal chi yun nachaj el juj ti', tatol watx' chi jut co beybal axca ton Cham tu', yuninal onxa Dios chi yal tu'.