Read Q'anjob'al Jue 13 Bible Online

Jue 13 - Q'anjob'al bible

Jue 13

¹Max oc pax is mul eb israel yul sat Jehová, yuj tu' xan max alay oc eb yul is k'ab eb filisteo yin cawinak abil yuj Cham.

²A bay conob Zora, yin is tribual Dan ay jun winak chi yik Manoa. C'amc'alta' yune' yetbi max yila'.

³Max tx'ox ba Cham yángel Jehová bay xal, max yaloni: Ach ti' wal yel c'amc'alta' junok one' chela'. Palta tinani', ok ach oc yobixal, cax ok elon yin jun winak unin.

⁴A yet ok beytok ti', c'amc'al vino choq'uej, tamwal junok tzet yetal tol ow choq'uej, tamwal cha lo c'apax tzet ay yowalil, atac'ala' yalon ley.

⁵A yet ok jay jun one' tu', man ok tzuklay el xil jolom, yujtol nazareo ok yunej, yujtol yet Dios yayji yet c'amto chi alji; tol a ok chaon el yich colon el conob Israel bay yul is k'ab eb filisteo, ẍi Cham ángel tu'.

⁶Cax max toj xal tu' bay ayic' is yichamil, max yaloni: Ay jun is chekbej Dios max jayoc bay ayin ec'ok, caw wal max c'ayaj in c'ul yuj, axca wal tol yángel Dios max wila'. Maj in k'anlej bay mactxel, tamwal max yal ayin mactxel.

⁷Asan tol max yal ayin, tolab ok jay junok wune', max yaloni tolab manxa ok wuc' vino, c'al junokxa uq'ueja' tol ow, c'al junok tzet ay yowalil co looni, atac'ala' yalon ley; axa ab jun unin tu', yet Dios yayji yet ok aljok, masantac'al yet ok camok, ẍi xal.

⁸Max yalon Manoa yin is txaj bay Jehová: Chi wal ayach Mamin, elok wal yin a c'ul tol cha chektek a chekbej tu' ayon junelxa, yet watx' ok yal ayon, tzet wal ok jun yetok jun yaliẍ unin ok aljok tu', ẍi.

⁹Cax max yaben Dios is txaj Manoa tu', max tx'oxon pax ba jun ángel tu' bay xal yetbi junelxa bay xol mulnajil, palta c'amic' Manoa bay tu'.

¹⁰Ayman max toj lemnaj xal yalon bay: —Sebach, yujtol max tx'ox pax ba jun chekbej max ul k'anjab ayin yet junel, ẍi xal.

¹¹Cax max tit lemnaj Manoa, max toj yetok yetbi tu', max yaloni: —¿Tom ach ti' max ach ul k'anjab bay wetbi ti' yet junel? ẍi bay. Max tak'wi jun chekbej tu' bay axca ti': —Ja', ayin toni, ẍi.

¹²Cax max k'anlen Manoa tu' bay: —A yet ok yunen tzet max al tu', ¿tzet wal ok jun yetok, c'al jilon ch'ib jun unin tu' on? ẍi Manoa.

¹³Max tak'wi Cham yángel Jehová: —Chi yikej etbi tu' tzet yetal max wala':

¹⁴C'am chi yuc' ix vino, c'al junokxa tzet yetal tol ow, c'am chi yuq'uej. Cax c'am chi lo' ix sat an uva, tamwal tzet yetal tol ay yowalil lolayi, a ton juntzan tu' max wal bay ix tol chi yikej, ẍi jun ángel tu'.

¹⁵A Manoa tu', man yojtakok tatol a Cham yángel Jehová jun tu', xan max yala': —Chi wal ayach, elokab yin a c'ul chon echbanej, ti' chi toj ji' jun no yune' chiwo a chi', ẍi bay. Max tak'wi jun ángel tu': —Caxc'al chin can e yetok, palta maj in low e yetok; chi je' e yak'on no' tu' yin xajanbalil bay Jehová, ẍi.

¹⁷Max lajwi tu', max yalon Manoa tu' bay axca ti': —Alcan a bi ayon, yet watx' chi je' jalon yuj diosal ayach yet chi yunen el tzet max ul alcan ayon ti', ẍi Manoa.

¹⁸Max tak'wi Cham ángel tu' bay: —¿Tzet chi oc che k'anlej in bi? A jun tu' caw c'ayubtak yoqui, ẍi Cham ángel tu'.

¹⁹Cax max yiontek Manoa tu' no chiwo, c'al junxa ofrenda yin ixim trigo yin bak'ejal. Cax max yak'on tz'a xajanbal bay Jehová bay yiban jun ch'en ch'en. Max lajwi tu', max tx'oxon Jehová junok milagro satak Manoa yetok yetbi.

²⁰Yet max aj culnaj k'ak' yiban altar tu', axa yoc Cham ángel tu' xol xak k'ak'ej, max pax ajok. A yet max yilon eb axca tu', max ay jajnaj eb, axa yay nojan eb sat tx'otx' tu'.

²¹Catatu' max nachaj el yuj Manoa tol a Cham yángel Jehová jun chekbej tu'. Majxac'al tx'ox ba junelokxa bay Manoa yetok bay yetbi.

²²Cax max yalon cham bay yetbi tu' axca ti': —A tinani' t'inan ok on camok, yujtol max jil wal yin Dios, ẍi bay yetbi.

²³Cax max tak'wi xal bay axca ti': —Tatol ay is nabal Jehová tol chon cam yuj, maj mi cha' co xajanbal max jak' bay, c'al jofrenda, cax maj mi tx'ox juntzan ti' jila', cax maj mi yal juntzan ti' ayon, ẍi xal.

²⁴A yet max apni c'ual yalji yune' xal xin, max yak'on yik Sansón. Axa yet max ch'ibaj nak unin tu xin, max yak' Dios watx'c'ulalil yiban.

²⁵Max chaon el yich tx'oxon ba Yespíritu Jehová yin nak yet ayic' bay is campamento eb yinatil Dan, bay nan xol Zora yetok Estaol.