Read Q'anjob'al Jue 14 Bible Online

Jue 14 - Q'anjob'al bible

Jue 14

¹A yet junel, max ayapnok Sansón bay yul jun conob eb filisteo chi yik Timnat, cax max oc sat yin jun ix k'opoj bay tu'.

²A yet max meltzoj bay yatut max yalon bay is mam c'al bay is txutx axca ti': —Ay jun ix k'opoj max wil bay Timnat xol eb filisteo, max can in nabal yin, xan chi wal ayex tol chi toj e k'an jun ix k'opoj tu' wi', ẍi nak.

³Cax max tak'wi is mam, c'al is txutx nak, max yalon eb axca ti': —¿Tzet yuj xan a bay xol eb filisteo ok tok a say etbi, tol tx'ok conobal eb? ¿Tom c'amxa junok ix watx' xol eb jet conob ti'? ẍi is mam c'al is txutx tu' bay. Max tak'wi Sansón axca ti': —A wal jun ix tu' chi wochej. A ix chi toj e k'an wi', ẍi nak.

⁴Caw wal man yojtakok is mam c'al is txutx tzet is nabal Jehová, yujtol lanan naon Cham tzet ok yun yel yich junok owal yetok eb filisteo yujtol a eb chi yajawbi yiban israel yet tu'.

⁵Xan max toj Sansón yetok is mam c'al is txutx bay conob Timnat. A yet max ec'tok eb bay jun makan an uva awbil yuj eb aj Timnat, max eltek jun no ach'ej coj yin Sansón, chi awji no' yet max tit no' yin.

⁶Yet wal jun bek tu', max oc Yespíritu Jehová yin nak yuj yak'on yipalil, c'am jabok tzet yetal ibil oc yuj, yetok wal is k'ab max coc' tzilnentok jun coj tu', axca chi yun co coc' bijnentok junok no yune' chiwo. Maj yal bay is mam c'al is txutx tzet max yun tu'.

⁷Max lajwi tu', cax max apni oc eb bay conob tu', max k'anjab nak yetok ix k'opoj tu', cax max canxac'al is nabal nak yin ix.

⁸Axa yet max ec'tok jayeb c'ual, yet lanan toj Sansón yet ok nupay yetok ix filistea tu', cax max ec' bay max mak'cam no coj tu'. Axa yet max apni oc nak, max yiloni, ayxa octok jun no cab yul joyomteal is bakil no', caw wal nojnak el yul tu' yuj is yalcabil no'.

⁹Max lajwi tu', max yion eltek nak no', max looni, axa toj tu'. Axa yet max tzakloj yintak is mam c'al is txutx tu', max yak'on nak no' lo eb, c'amc'al tzet max yala' tatol a bay yul joyomteal yul is bakil no coj max bet yieltek nak no' yal cab tu'.

¹⁰Max lajwi tu', max apni eb bay yatut ix k'opoj tu', max chaon Sansón k'inal is nupayil, axca ta is beybal eb nak ach'ej bay jun lugar tu'.

¹¹A yet max yilon eb nak filisteo, tol max apni oc Sansón, max yawtentek eb 30 eb ach'ej yet chi ilwi k'inal nupayil tu'.

¹²Cax max yalon nak Sansón bay eb nak ach'ej tu' axca ti': —Ay junok tzet ok wal ayex: Ta a yet ukeb c'ual k'in ti', ok e yal tzet yelapnok jun tzet ok wal tu', ok wak' jun junok e k'ap e k'utilok junjun ex, tol lino caw wal watx', c'al jun junok mojan e pichil yet k'in.

¹³Ta man ok nachaj el e yuj xin, ayex ok e yak' jun junok an k'ap tu' ayin yetok jun junok mojan in pichil yet k'in, ẍi nak bay eb. Cax max tak'wi eb bay axca ti': —Alto wal jab xin, tzet yetal chochej chal tu', ẍi eb nak.

¹⁴Max yalon nak axca ti': A yin junok chiwajwom, a tu' max eltek tzet chi uc'layi. A yin jun caw wal ay yip, a tu' max eltek tzet yetal caw wal chi', ẍi. Axa yet is yox c'ual k'in tu', c'amc'al chi je' paktzen eb nak.

¹⁵Yuj wal tu xin, axa yet is can c'ual, max yalon eb nak bay yetbi Sansón tu' axca ti': —Montej wal el bay echamil tu' tzet chi yal elapnok jun tzet max yal nak ayon ti', chi lajwi tu' cax chalon ayon. Ta c'amak, chach co nil tz'a yetok a mam, a txutx, c'al masanil mac ayic' yul atut tu'. Axca wal tol toc'al chon e yitek cayti', cax chon e yaon oc yin majilal, ẍi eb nak.

¹⁶Max lajwi tu', max ok' ix, cax max toj yalon bay Sansón: —Chin a yaj ach ti', cax c'am chin ochej. Max al jun a k'anej, yet chi nail eb nak wet conob, cax c'am wal jabok chal ayin, tzet chi yal elapnok, ẍi ix bay. Max tak'wi bay ix axca ti': —C'amtax mi chi wal bay in mam c'al bay in txutx, ¿tom ato ayach ok wala'? ẍi nak.

¹⁷Cax max occ'al ijan ix yok' bay nak yin juntzan ukeb c'ual k'in tu', cax ayc'al oc ix yalon bay junjun c'u. Axa yet is suk c'ual, max yalon nak bay ix. Max lajwi c'al yaben ix max yalon bay eb is yet conob tu' tzet chi yal elapnok.

¹⁸Axa yet is k'ekbintakil yet is suk c'ual tu', max bet yalon eb bay Sansón: C'am junokxa tzet yetal yelxac'al chi' yintak no yalcab. C'am junokxa yelxac'al ay yip yintak no coj, ẍi eb nak. Max tak'wi nak Sansón axca ti': Asan yujtol a wetbi tu' max e yaoc e yetok, xan max nachaj e yalon tzet chi yal elapnok, ẍi nak.

¹⁹Max lajwi tu xin, max oc pax Yespíritu Jehová yin Sansón yuj yak'on yipal, cax max toj bay conob Ascalón, max bet mak'on cam 30 eb nak filisteo bay tu'. A is pichil eb nak ayocok, a' max yielok, max yak'on tojolok tzet max yal tu'. Max lajwi tu', max meltzoj bay yatut is mam, yujtol caw wal chi chichon c'ul.

²⁰Axa yetbi tu xin, max ak'lay ix bay jun nak ajun yetok Sansón tu', yet max nupay yetok ix.