Read Q'anjob'al Jue 19 Bible Online

Jue 19 - Q'anjob'al bible

Jue 19

¹A yet juntzan c'ual tol c'am rey bay israel, ay jun levita cajan bay lugar najat ayil bay siquilal tx'otx' yul yet Efraín, max yi' jun ix aj Belén yul yet Judá.

²Palta max yaoc jun ix tu' mul yul k'ab nak tu', xan max toj cajay bay Belén tu' bay ayic' is mam. A yet mayal lajwi caneb xajaw yayji ec' bay tu',

³max toj jun levita tu' monten ix junelxa, talaj chi tit pax ix yetok. Max yitok jun is chekbej yetok cac'on no burro, cax max chaon apnok ix bay yatut is mam tu'.

⁴Ac'ala' c'apax cham mamej tu', max cha' c'apax apnok yin tzalojc'ulalil, max yaloni tol chi cancan nak yetok bay tu', xan max cancan jun levita yetok is chekbej tu' oxeb c'ual bay na is mam ix ix tu'. Max low eb, c'al yuq'uena' eb, c'al way eb bay tu'.

⁵Axa yet is can c'ual xin, max aj wan yet k'inibalil, axa toj eb tu' yaloni. Axa yet toxa wal chi toj eb, max yalon is mam ix ix tu' bay is ni' tu': —Ok ach lowok, catatu' ok ach tok, yet watx' ay ep ok ach beyok, ẍi cham.

⁶Xan max ay chotan eb lowi c'al yuq'uena' eb, max oc tean cham mam ix ix tu' yin eb tol chi can eb junokxa ak'bal yin tzalojc'ulal.

⁷Caxc'al max aj wan jun levita tu' yet chi yochejxac'al chi toji, palta max ocxac'al tean is ni' tu' yin, xan maxto cani.

⁸Axa yet is so c'ual xin, max aj wan jun levita yet k'inibalil yet chi paxi, palta max oc pax tean cham is mam ix ix tu' yin junelxa yet chi lowi, catatu' chi toji, yet watx' ay yip yet chi toj yulak be. Max low eb xin, yak'ban chi ajc'al can c'u.

⁹Axa yet max aj wan jun levita tu' toj yetok ix ix tu' yetokc'al is chekbej, max yalon pax is ni' tu' bay tol mayal ec' c'u xan max oc pax tean yin yet chi can pax can yet junxa ak'bal tu' yin tzalojc'ulal, axa yet junxa c'ual xin, k'inib chi toj eb.

¹⁰Palta pax jun levita tu xin, majxa yal c'ul max can yet junxa ak'bal tu', palta max tojxac'al yetok ix ix tu' c'al yetok is chekbej, c'al yetok no' cac'on burro ayoc is tz'um. A yet max apni eb satak Jebús, a ton conob Jerusalén, cax toxa chi ay c'u,

¹¹max yalon jun chekbej tu' bay jun levita tu': —¿Tzet mi wal ẍi a c'ul ach ti', ta chon can yet jun ak'bal ti' bay conob Jebús ti'? ẍi nak.

¹²Max yalon jun levita tu' axca ti': —C'amak, c'am chon tojcan way bay junok conob tol man israelok. Chon tojc'al masantac'al chon apni oc bay Gabaa.

¹³A bay Gabaa tu' ok ec' ak'bal juj, ma bay Ramá xin, ẍi cham.

¹⁴Cax max tojc'al eb xin. Lananxa k'ekbi max apni oc eb bay Gabaa, a ton jun conob tu' yet is tribual Benjamín.

¹⁵Max elcan eb yul be, max tojcan eb bay Gabaa. A bay tu' ok ec' ak'bal yuj eb. Max toj ay chotan eb bay txonbal bay jun conob tu', yujtol c'am mac chi ak'on posada eb.

¹⁶Max lajwi tu xin, mayal aj ak'bal max ec'tok jun icham winak petoj bay is mulnajil. A jun icham winak tu', aj siquilal tx'otx' yet Efraín yet yalantok. Axa tinani', a tu' cajan ec' bay Gabaa tu', axcac'al ec'jabwom yayji xol eb yinatil Benjamín.

¹⁷A yet max yilon oc cham icham winak tu' jun levita tu', max k'anlen bay axca ti': —¿Baytal max ach tita, c'al baytal chach toji? ẍi bay.

¹⁸Max tak'wi jun levita tu' axca ti': —Toc'al chon ec'tok cayti', a tu' petoj on bay Belén, a tu' chon toj bay junok lugar najat bay siquilal tx'otx' yul yet Efraín. Ata bay tu' cajan in. Max in ayji ec' jayeb c'ual bay Belén, axa tinani' xin, chin tojcan bay cajlobal Jehová, palta c'am junok mactxel chi ak'on in posada cayti'.

¹⁹Ay zacate no' in burro ti', ay c'apax co lobej on, yetok ix wetbi ti' yetok in chekbej ti'. C'am tzet chi jochej, ẍi nak.

²⁰Max tak'wi cham icham winak tu' bay nak: —Titan wetok, ayin ok wak' masanil tzet yetal ok oc oj, maj yal in c'ul ok ach can bay txonbal ti' yet ak'balil, ẍi cham.

²¹Xan max yitok cham bay yatut, max yak'on cham lobej no burro. Lajwi tu', max tx'ajon eb yakan, cax max low eb, c'al yuq'uena' eb.

²²Yak'ban chi tzaloj eb, max jayoc oynaj juntzan mitz'winak aj conob yinlak te na tu', cax max c'oli janlabi octok eb bay puerta, max yalon eb bay cham icham winak tu': —Ieltek jun winak ayic' ulail ayach tu', chi jochej chi jetnej, ẍi eb.

²³Max yalon cham aj na tu': —C'amak ex wet animail, manchak e na e yak'on yobc'ulalil tu' yin jun winak ayic' posadail ayin ti'.

²⁴Ilabi tix jun ix in cutz'in caw wal k'opoj ti', yetok c'apax jun ix ix ibil oc yuj jun winak ti'. A eb ix ti' chi je' waon eltok ayex, yet che yun e yochwan tu' yin eb, palta jun winak ti' c'amokab che yun yobtakil tu' yin, ẍi cham.

²⁵Palta maj wal cha yab eb tzet max yal cham icham winak tu'. Axa yukten eltok jun levita tu' ix yistzil tu' bay yul calle, cax max etnenlay ix eb masanil ak'bal masantac'al max yal k'inibi ajok, catatu' max bekoncan eb.

²⁶Lananxa sakbi, max meltzoj octek ix ix tu' bay yatut cham icham winak bay ayic' yichamil tu', axa yet max jayoc ix bay puerta max ayc'ay ix, cax max camxac'al.

²⁷Axa yet max aj wan jun levita tu' yet k'inibalil, max jakon puertail te na yet chi chaon pax be toji; max yiloni, jaban ay ix yistzil tu' bay ti na, cax jabancan octok is k'ab bay yiban marcoal ti na tu'.

²⁸Max yalon bay ix: —Ajan wanok, ton, ẍi bay ix. Palta majxa tak'wok ix bay, max yion aj is mimanil ix tu', max yaon ajtok yiban jun no burro, max yiontok bay yatut.

²⁹A yet max apni oc bay yatut tu' max coc' c'upnentok is mimanil ix yistzil tu' bay chi nublej ba bakil, lajcaweb bijan max yutej, cax max yaontok bay masanil yul is makbej eb yet israelal.

³⁰A masanil eb max ilon jun tu' max aloni: —Yettaxc'al max on eltek bay Egipto c'amtoc'al bay maxax jil junok axca jun ti'. Yowalil wal chi cam co naonek yin jun ti' tzet watx' ok junek yetok, ẍi eb.