Read Q'anjob'al Jue 20 Bible Online

Jue 20 - Q'anjob'al bible

Jue 20

¹Yuj tu' xan max wajbaj oc ba masanil eb israel satak Jehová bay Mizpa, max titac'al eb Dan bay norte, max tit c'apax eb bay Beerseba bay sur, ac'ala' max tit c'apax eb bay Galaad bay yichcan.

²Cax masanil eb yajaw yayji oc yin junjun tribual israel ayic' eb bay tu'. A xol masanil eb conob Dios wajan ec' tu' ay 400,000 eb soldado watx'xa yayji oc is yespada yul is k'ab.

³Axa pax eb yet is tribual Benjamín xin, max yab eb tol mayal wajbaj ba juntzanxa tribual eb israel bay Mizpa. Max k'anlej eb yajawil eb israel bay jun levita tu' tzet wal max yun yoc jun camich tu'.

⁴Axa yalon nak yichamil ix camom tu': —Max in apni oc yetok ix wetbi bay conob Gabaa, yul yet Benjamín, yet max ec' jun ak'bal wuj bay tu'.

⁵Palta a yet jun ak'bal tu' max waj ba eb winak cajan bay jun conob tu' yinlak te na bay ay in posada, yet chin is mak'cam eb yaloni, cay wal tu' max yun yoc ijan eb yetnen ix wetbi ti', masantac'al max yal cam ix yuj eb.

⁶Yuj tu' xan max wiaj jun mimanilej tu', cax max in coc' c'upnentok, max waontok bay masanil yul co makbej, yet watx' che yil e masanil tzet max yun yoc jun miman mulej caw wal yobxac'al ti'.

⁷Axa tinani' tutun wet israelal ex xin, ayex ok e na'; ok e yala' tzet ok yun jun ti', ẍi nak.

⁸Axca wal tol junxanej max yut ba eb masanil, max yalon eb axca ti': —C'am junok on chon meltzojtok bay co mantiado bay cajan on masantac'al chi yal ba tzet ok yun jun ti'.

⁹Asan jun tzet yetal yowalil chi junej, tol chi jaoc suerte co xol yet watx' ok jila' mac on txel chon oc yin jak'on owal yin conob Gabaa.

¹⁰Jun yin lajonwan winak yin junjun tribu, a eb tu' chi occan yiban sayon co lobej ayon soldado on ti'. Axa co masanil xin, chon toj jion ec' pak bay eb aj Gabaa yuj jun yobtakil max yun eb tu', ẍi eb.

¹¹Junxanej max yut ba eb israel tu' yet max oc eb yak'on owal yin jun conob tu'.

¹²Max yaontok eb chekbej bay masanil yul is makbej Benjamín, max ec' eb yalon axca ti': Yelxac'al wal yob tzet max e yun jaywanok ex ayex ti'.

¹³A tinani', a juntzan winak max yun yobtakil e xol tu', iek eltek eb juntzan winak aj Gabaa ayon cax chi co mak'on cam eb, caytu' ok yun yel jun yobtakil tu' co xol ayon israel on ti', ẍi eb. Palta maj cha yab eb yinatil Benjamín tu'.

¹⁴A ti' yet eb, tol max waj ba eb bay Gabaa, max toj eb yak'on owal yin juntzanxa eb yet israelal eb tu'.

¹⁵Ay 26,000 eb soldado max tit xol conoblak is tribual Benjamín, watx'xa yayji yet chi toj yin owal, tx'ok pax yel 700 eb soldado caw wal jelan, cax aj Gabaa eb.

¹⁶A xol masanil eb soldado tu' ay 700 eb tol q'uexan k'ab chi mulnaji, a yetok q'uexan k'ab eb tu' chi k'okwaj yetok jurjubej. A masanil eb tu' caxc'al a junok xilej chi k'ok eb, c'am junok eb tol c'am chi michchaj jun xilej tu' yuj.

¹⁷Axa pax juntzanxa eb israel tu', ay 400,000 eb soldado caw wal k'ajan yin owal, cax c'am oc eb Benjamín xol.

¹⁸Max toj eb israel tu' bay Betel, yet chi k'anlej eb bay Dios mac tribual chi babji yoc yak'on owal yin eb yet is tribual Benjamín. Max yalon Jehová, tol a Judá chi babji yoc yin owal.

¹⁹Max aj wan eb israel tu' yet k'inibalil, cax max bet watx'nen aj eb is campamento bay satak conob Gabaa.

²⁰Max toj eb yin eb Benjamín, max watx'nen oc ba eb satak conob Gabaa yin owal.

²¹Palta a eb yet Benjamín tu' max eltek eb yul conob Gabaa tu'. A yet jun c'ual tu' 22,000 eb yet israelal eb tu', max mak'camok.

²²Xan max bet oc eb israel tu' yin cusc'ulal satak Jehová masanil c'u, masantac'al yet max k'ekbi ayok, catatu' max k'anlen eb bay Jehová: ¿chon mi toj jak' owal yin eb jet israelal yinatil Benjamín junelxa? ẍi eb. Max yalon Jehová: Asek, ẍi Cham. Xan max yion pax eb yip, axa yet junxa c'ual max toj eb yak'on owal yin is tribual Benjamín, cax ac'ala' bay max oc eb yet babelal, a bay tu' max oc eb junelxa.

²³

²⁴

²⁵Ac'ala' yet junelxa ti' max el paxtek eb yet Benjamín yak'on owal yin eb, max mak'on cam eb junxa 18,000 eb soldado yet israelal eb.

²⁶Yuj tu', max toj pax masanil eb soldado, c'al yetok masanil eb conob bay Betel, max oc pax eb yin cusc'ulal bay satak Jehová. Masanil c'u, c'am jabok loj chi yun eb, max yak'on tz'a' eb xajanbal c'al yak'on eb xajanbal yet junc'ulalil.

²⁷A yet jun tiempoal tu', a te caẍail trato Jehová, a tu' ayic' bay Betel. A Finees, is c'ajol Eleazar, is yitxiquin cham Aarón a ayoc yin sacerdoteal. Max k'anlen eb israel tu' bay Jehová, tatol chi je' yoc pax eb junelxa yin yak'on owal yin eb yet Benjamín, ma tol chi bekxac'al ay ba eb axca tu'. Max yalon Jehová bay eb: Ocanek yin eb, a yet yecal ayin ok wak' ayc'ay eb, ẍi Jehová.

²⁸

²⁹Xan max toj juntzan eb soldado yet israel c'uban el ba bay yinlak conob Gabaa.

³⁰Axa juntzanxa eb soldado yet israel max toj eb yin eb soldado yet Benjamín, max watx'nen oc ba eb yin yak'on owal yetok conob Gabaa, axca max yun eb yet ewi, c'al yet cabji.

³¹Max el paxtek eb yet Benjamín bay yul conobal tu' yin owal junelxa, max beyc'al tit eb najat yin yak'on owal yin eb yet israelal eb tu', maxto wal cam junxa 30 eb israel yuj eb bay yul beal Betel, c'al yul beal Gabaa, c'al bay c'amxa mac cajan.

³²A wal naon eb tol lanan yelaj eb yet israelal eb tu' bay, axa yayc'ay eb tu', axca max yun eb yet ewi c'al yet cabji, palta toc'al chi elaj eb bay eb ajc'ul tu' janic'ok, yak'ban chi titc'al eb yulak be najat bay tiel conob.

³³Yinxac'al aymanil max watx'nen pax oc ba eb yet israelal eb yin yak'on owal bay cawilal Baal-tamar. Cax max el c'apaxtek eb max c'ubaj el ba bay yinlak conob Gabaa.

³⁴Xan max ocxac'al eb yin conob Gabaa, 10,000 eb sic'bil el xol masanil soldado yet israel max oc yin conob tu' yak'on owal, yelc'ulal max aj can owal. A eb Benjamín max toj najat tu', c'am chi na eb tatol mayal jayok yiban eb.

³⁵A Jehová max ak'on yak' ayc'ay eb israel tu' eb yet Benjamín. A yet jun c'ual tu', max cam 25,100 soldado yet is tribual Benjamín.

³⁶Catatu' max yilontek ba eb yet Benjamín tol mayal ayc'ay eb. A eb soldado israel tu', maxax el eb najat satak eb yet Benjamín, yujtol yipc'ulej yayji eb winak max c'ubaj can el ba yinlak conob Gabaa, yuj yak'on lajwok conob tu'.

³⁷Yinxac'al aymanil max oc eb mak'on cam masanil anima bay tu'.

³⁸A eb max c'ubaj can el ba tu', lajti' yayji eb yetok juntzanxa eb soldado tol yetbi eb, tol a yet ok ayc'ay conob tu' yuj eb, cax ok yak'on tz'a eb conob tu' yet chi txecloj mubal, yet watx' chi nachaj el yuj eb tu' tol mayal ayc'ay conob.

³⁹A wal yet tu', a eb israel lanan yel bay eb yet Benjamín, max yilon eb jun miman mub tu', xan max meltzoj eb, max tec'ban ba eb satak eb yet is tribual Benjamín. Mayal cam 30 eb yuj eb yet Benjamín, xan max na eb yet Benjamín tu' tol lanan yayc'ay eb yuj eb, axca max yun eb yet babelal.

⁴⁰Palta a wal yet jun bek tu' max aj bululok mub bay conob tu'. A yet max yilon eb yet Benjamín tu' yintak, bululixac'al yaj mubal conob tu' satcan.

⁴¹Caywal tu' max yun tec'ban ba eb israel satak eb yet Benjamín tu', xan max xiwaj eb yet Benjamín yuj tzet yetal mayal tit yiban eb.

⁴²Yuj tu' max elaj eb satak eb israel tu', max tojcan eb bay chi tojcan beal tz'inan tx'otx', palta c'amxa chi je' yel eb. Yujtol max mitx'lay eb cax max mak'lay cam eb yuj eb israel chi eltek bay yul conob.

⁴³Max oymoj eb israel yin eb Benjamín tu', caywal tu' max yun yayc'ay eb masanil, max uktelay c'al eb yin c'am xewilal masantac'al bay yichcanil Gabaa.

⁴⁴A bay tu' max cam 18,000 soldado yet tribual Benjamín.

⁴⁵Axa juntzanxa eb, max meltzoji, max toj eb elaj bay tz'inan tx'otx', bay yetc'ulal tok ch'en sat ch'en chi yik Rimón, palta 5,000 eb tu' max cam bay yulak be. Max tzaklojc'al eb israel tu' yintak eb, masantac'al bay Gidom, max ayc'ay eb yuj eb. 2,000 soldado max cam bay tu' yuj eb.

⁴⁶Xan a yet jun c'ual tu' 25,000 eb soldado yet tribual Benjamín, a ton eb soldado caw wal k'ajan yin owal, max cami.

⁴⁷Palta ay 600 eb yet Benjamín max tojcan elaj bay tz'inan tx'otx'. Caneb xajaw max cancan eb bay sat ch'en yet Rimón.

⁴⁸Yinxac'al aymanil max yak' lajwok eb israel eb anima yet is tribual Benajmín, max tzoc'on cam masanil eb anima bay masanil conob, max mak'on c'apax cam eb no no', yetokc'al masanil tzet yetal max ilchaj yuj eb, c'al conoblak max yak'can tz'a eb.