Read Q'anjob'al Jue 8 Bible Online

Jue 8 - Q'anjob'al bible

Jue 8

¹Masanil eb is tribual Efraín, max tit yowal eb yin Gedeón, yujtol maj awtelay eb yuj cham yet max el yich yoc owal yin eb madianita.

²Max tak'wi cham: —¿Tom max e na xin tol miman tzet max wun e yintak? A tzet max e yun yet-xac'al lajubal ti', caw wal miman yelapnok yintak tzet max jun on yet yichbanil,

³yujtol max yak' Jehová cham Oreb, c'al cham Zeeb is yajawilal eb soldado yul e k'ab. ¿Tom miman wal tzet max wun yintak wal jantak max e yun tu xin? ẍi cham Gedeón. A yet max yaben eb yinatil Efraín tzet max yal Gedeón, max sicbi ay yowal c'ul eb.

⁴Max ayapnok Gedeón yetok eb 300 soldado bay ti a' Jordán, caxc'al tol c'unbinakxa eb, palta maxtoc'al tzakloj eb yintak eb ajc'ul tu', masantac'al max k'axpoj ec' eb.

⁵A yet max apni eb bay Sucot, cax max yalon Gedeón bay eb bay tu': —Chi wal ayex, elokab yin e c'ul, ak'ek janic'ok tzet chi lo' eb nak ajun wetok ti', yujtol caw wal chi c'unbi eb, yujtol uktebil eb reyal eb madianita juj, a ton cham Zeba c'al cham Zalmuna, ẍi Gedeón.

⁶Cax max tak'wi eb yajawil conob tu' bay axca ti': —¿Tom mayal pax michchaj cham Zeba, c'al cham Zalmuna tu' e yuj tinani', yuj tu' xan cha chek jak' low eb nak soldado ti'? ẍi eb.

⁷Max tak'wi Gedeón: —A yet mayal yaoc Jehová cham Zeba c'al cham Zalmuna tu' yul in k'ab, axa yet chin meltzoj cayti', cax ok in tzilon el e chibejal e yin yetok q'uix ok tit bay takin tx'otx', ẍi Gedeón.

⁸Max lajwi tu', max apni oc bay Penuel, max k'anon pax lobej eb nak soldado bay tu', axca max yun bay Sucot, ac'ala' axca tu' max yut pax tak'wok ba eb aj Penuel tu' axca eb tu'.

⁹Max yalon pax Gedeón: —A yet ok in meltzoj yet mayal ayc'ay eb wuj, ok in mak'ay weknaj jun e torre ti', ẍi.

¹⁰A tu' ayic' Zeba yetok Zalmuna bay Garcor, tzunan 15,000 soldado madianita yintak eb. Asanxanej tu', yujtol 120,000 eb mayal cami.

¹¹A tu' max tzakloj Gedeón yetok eb is soldado yintak eb ajc'ul tu' bay is tilak takin tx'otx' bay sataktok Noba, c'al bay Jogbeha. Max yak'on ayc'ayok, yujtol aytok eb soldado madianita yin c'ayc'ulal.

¹²Axa pax Zeba, yetok Zalmuna maxto wal el eb, palta maxtoc'al tzakloj Gedeón yintak eb, masantac'al max michchaj eb, cax max saklemtok is soldado eb yuj xiwilal bay Gedeón.

¹³A yet max meltzoj Gedeón yin owal, max ec'tok bay Heres.

¹⁴A tu' max michchaj jun nak ach'ej aj Sucot yuj, max k'anlen el bay nak, tzetakc'al is bi eb yajawil conob Sucot, cax max tz'iben nak tu' is bi junjun eb, cax ay 77 eb yin masanil.

¹⁵Max lajwi tu' max toj Gedeón bay Sucot, cax max yalon bay eb anima ay bay tu' axca ti': —¿Chi mi nachajtek e yuj tzet max yun in e buchoni yuj Zeba, c'al yuj Zalmuna? Ac'ala' ¿chi mi nachajtek e yuj yet maj e yak' jabok lobej eb nak soldado yet caw wal ay wajil eb nak, cax tol c'unbinak eb? Max e yaloni: Tokwal mayal michchaj eb tu' e yuj, quex chi. A tinani' xin, tix eb nak ti', ẍi Gedeón.

¹⁶Max lajwi tu', max yiontek Gedeón te q'uix max yitek bay takin tx'otx' max tzilon el is chibejal eb yajawil conob Sucot, yetok te'.

¹⁷Lajwi tu', max toj pax bay Penuel, axa mak'on ay weknaj jun torre bay tu', max mak'on cam masanil eb winak ay bay tu'.

¹⁸Max lajwi tu xin, max k'anlen Gedeón bay Zeba, c'al bay Zalmuna axca ti': —¿Tzetbil yili eb nak max e mak'cam bay Tabor? ẍi bay eb. Cax max tak'wi eb: —Lajan yili eb nak axca eli ti'. Axca yili eb yajaw, axca tu' yili eb nak, ẍi eb.

¹⁹A yet max yaben Gedeón axca tu', max aj yaw: —Wuẍtak eb nak max e mak'cam tu', junnej in txutx yetok eb. A tinani' chi waoc Jehová yin testigoal. Matawal maj e mak'cam eb nak wuẍtak tu', c'am mi chex in mak'cam tinani', ẍi Gedeón.

²⁰Lajwi tu', max yalon bay nak Jeter, is babel c'ajol axca ti': —Ajan wanok, cax cha mak'on cam eb nak ti', ẍi bay. Yal ach'ejto nak Jeter tu', xan max xiw nak yion ajtek ch'en espada yuj mak'on cam eb.

²¹Lajwi tu xin, max yalon Zeba yetok Zalmuna bay Gedeón axca ti': —¿Tzet yuj xan manak ach chon a mak'camok, yujtol axca wal eli, axca tu' yayji oc epalil? ẍi eb. Max aj lemnaj Gedeón, max mak'on cam eb. Max yion el ch'en argolla ayoc yin nuk' is camello eb.

²²Max lajwi tu xin, max yalon eb yet israelal Gedeón tu' bay: —Ach max on a colil yul k'ab eb madianita, xan ach, yetokc'al eb enatil chex occan co yajawilok, ẍi eb.

²³Max tak'wi Gedeón bay eb axca ti': —Mayinnak, tamwal eb wuninal ok on oc e yajawilok; palta a Jehová co Yajawil yayji.

²⁴Asan jun chin k'an ayex, ta che yak' ch'en yutxiquinej max e yiel yin eb madianita ayin, ẍi Gedeón. Ibil oc juntzan ch'en yutxiquinej naba oro yuj eb ajc'ul tu', yujtol axca tu' is beybal eb cajan bay takin tx'otx'.

²⁵Cax yin wal aymanil max litx'baj ay eb jun an k'ap, max yaon ay eb ch'en yutxiquinej tu' bay yiban an, max yalon eb bay Gedeón axca ti': —Tix ch'en ti', chi el wal yin co c'ul chi jak'on ayach, ẍi eb.

²⁶A jantak ch'en oro ayoc yin yutxiquinejal tu', ay 1700 siclos yalil, tx'ok pax yel juntzanxa ch'en watx' yili, c'al adorno yetok an is pichil eb reyal madianita, yetokc'al ch'en collar ibil oc yuj is camello eb.

²⁷A yetok juntzan tzet yetal tu' max watx'nej Gedeón jun pichilej yet sacerdote, cax max cancan yuj bay is conob chi yik Ofra. Axa masanil eb israel max yintaknej el eb Jehová yuj yoc eb ayilal bay jun tu'. A jun tu' max oc yin telc'obalil bay Gedeón yetok yinatil.

²⁸Axa eb madianita max occan eb is chekbejok eb israel, majxac'al je' colon ba eb. Yin cawinak abil, a yet iquisto ec' Gedeón tu', c'amxa owal, junc'ulalxac'al yayji.

²⁹Max lajwi tu xin, max paxtok Jerobaal bay yatut.

³⁰70 is yuninal max alji, yujtol xiwil ix max yi'.

³¹Ay pax junxa ix ix yuj bay Siquem. Ay jun yune' ix tu' max yil yetok, max yak'on yik Abimelec.

³²Caw wal icham winakxa Gedeón, is c'ajol Joás yet max cami. Max mukay bay ay panteón is mam bay Ofra, bay ay eb is yinatil Abiezer.

³³Axa yet max lajwi cam Gedeón, max yion pax el ba eb israel yintak Jehová axa yak'on eb ayilal bay comon dios Baal tu', cax a' Baal-berit max oc is diosalok eb.

³⁴Max tojcan Jehová is Diosal eb c'ayc'ulal yuj, caxc'al a' max colon eb bay eb ajc'ul oyan oc yinlak eb.

³⁵Tamwal junok tzet yetal watx' max yak' eb paktzilok bay is yinatil Jerobaal, a ton Gedeón, yuj tzet watx' max yun yin eb.