Read Q'anjob'al Jue 9 Bible Online

Jue 9 - Q'anjob'al bible

Jue 9

¹A Abimelec, is c'ajol Jerobaal, max toj bay Siquem k'anjab yetok masanil eb yican is txutx, max yaloni:

²—Yujtol jicanektoc'al co ba, xan chi wal ayex, elokab yin e c'ul, tol che montej eb e yet conob bay Siquem ti', cax che k'anlen bay eb, ta watx' chi yajawbi eb 70 c'ajol Jerobaal tu' e yiban, ma yelxac'al watx' tol junnej winak chi oc e yajawilalok. Naektek tol asannej in ay wuj in ba e yetok, ẍi nak.

³Yujtol ayto yuj ba yetok eb nak bay tu', yuj tu' xan max yaoc ba eb yin monten eb anima bay Siquem tu', tol a Abimelec tu' chi oc yin yajawil xol eb.

⁴Yetok c'apaxok, max yion ajtek eb 70 siclos ch'en plata yul temploal comon dios Baal-berit, max yak'on eb bay Abimelec. A ch'en tu' max yak' bay juntzan eb isaj winak, yet chi oc eb yetok, cax max toj eb yintak

⁵bay Ofra, bay max ec' Jerobaal is mam. A tu' max mak'cam Abimelec tu' eb nak 70 yuẍtak bay yiban jun ch'en ch'en. Asanxanej nak Jotam max colchaji, yujtol max c'ubajcan el ba. A nak tu', tzunan uninxac'al yintak masanil is c'ajol Jerobaal.

⁶Max lajwi tu xin, axa masanil eb anima bay Siquem, c'al eb ay bay Bet-milo max wajban oc ba bay yich te matx'ji ay bay Siquem tu'. A tu' ay jun ch'en ch'en ya' yili yuj eb, a ton bay tu' max yaoc eb Abimelec yin yajawilal.

⁷A yet max yaben Jotam, tol max oc Abimelec yin yajawilal, cax max ajtok bay jun tzalan yin c'ul witz Gerizim, max awji aytek yin ipejal, yet watx' masanil chi abeni: E masanil ex cajan bay Siquem, chi cam e yaben tzet chi wala', yet watx' axca tu', ok yab Dios tzet ok e yala'.

⁸A yet junel, max ab yochej te te' tol ay junok yajawil te' chi oqui. Yuj ab wal tu' xan max yal te' bay te olivo, tol chi oc te' is yajawilok te' masanil.

⁹Max ab tak'wi te olivo, max yalon te': C'amak, ta chin oc e yajawilok e masanil, c'amxa chi wak' aceite, chi k'anabax yuj is mimanbilal Dios, c'al yuj eb anima, ẍi ab te'.

¹⁰Max lajwi tu', max ab yalon te te', ta chi oc te higuera is yajawilok masanil te te'.

¹¹Max ab yalon pax te higuera: C'amak, ta chin oc e yajawilok e masanil, c'am xam chi wak' in sat chi oc vinoal chi ak'on tzalojbok c'ul eb anima yetok Dios, ẍi ab te'.

¹²Max ab yalon pax te te' bay an uva, ta chi oc an is yajawilok masanil te te'.

¹³Max ab yalon pax an uva: C'amak, ta chin oc e yajawilok e masanil, chim in bekcan wak'on vino chi ak'on tzalojbok c'ul Dios, c'al eb anima, ẍi ab an.

¹⁴Yinxa ab tzunanil max yal masanil te te' bay te q'uix, tol chi oc is yajawilok.

¹⁵Max ab yalon te', tol chi je' yoc te' yajawilok te te' tu' masanil. Max yaloni: Ta yel yin masanil e c'ul chin e yaoc e yajawilok, ocanek yalan wenel ti' e masanil. Ta c'am pax chi je' e c'ul chin oc pax e yajawilok xin, elokabtok jun miman k'ak'ej win, cax chi tz'acantok te c'ute' bay Líbano, ẍi ab te'.

¹⁶A tinani' xin, chin k'anlej ayex: ¿Tom yel wal watx' max e yunej, xan max e yaoc nak Abimelec tu' e yajawilok? ¿Tom is moj wal axca tu' che yut is yinatil Jerobaal tu' tinani'?

¹⁷Max ex col-lay el yuj in mam tu' yul is k'ab eb madianita.

¹⁸Axa ayex ti', chex meltzoj oc yin is yinatil in mam tu', max e mak'on cam 70 is c'ajol bay jun ch'en ch'en. ¿Tzet xam wal e yayji xan max e yaoc Abimelec, is yune' jun ix is chekbej in mam tu' e yajawilok, asan mi yujtol ayto e yuj e ba yetok nak yuj is txutx?

¹⁹Chi walcan ayex tinani': Ta yel yin jichanil yayji oc e yuj yin in mam tol camnakxa, cax che yunen axca tu' yetok is yinatil, watx'okab e yayji yetok nak Abimelec tu', cax watx'okabc'al ok yun yeloc nak e xol.

²⁰Ta c'amak xin, titokab can junok miman bolob yin Abimelec tu', cax chi c'aycan el conob Siquem, yetokc'al Bet-milo; axa bay Siquem c'al bay Bet-milo chi el paxtek junok miman k'ak'ej, yet chi c'aylay el Abimelec, ẍi Jotam.

²¹Max lajwi yalon Jotam juntzan tu', cax max el bay tu', max tojcan cajan bay Beer, yujtol chi xiw bay Abimelec is yuẍtak tu'.

²²Oxeb abil max yak' Abimelec yajawil yiban conob Israel.

²³Max lajwi tu', max yaontok Dios jun ajc'ulal nan xol eb aj Siquem yetok Abimelec, cax max meltzoj oc eb yin.

²⁴Axca tu' max yun paktzelay bay yuj is camichal eb nak 70 is yuẍtak max mak'camok. Max paktzelay c'apax bay conob Siquem yuj max yaoc ba yetok Abimelec yin is yobtakil tu'.

²⁵A eb aj Siquem tu', ay eb max toj c'ubaj el ba bay tilak be jolomlak witz, cax chi elol lemnaj eb elk'an yin anima chi ec' bay yul be chi ec' bay cawilal conob tu'. Max yaben Abimelec tol axca tu' chi yun eb nak.

²⁶A yet tu xin, max apni oc jun winak chi yik Gaal is c'ajol Ebed yetok eb yican bay Siquem, watx' max yuncan nak yul sat eb anima bay tu'.

²⁷A yet tu', max eltok eb bay yintak eltok conob, yet chi wajon eb an uva, max watx'nen eb vino. Axa chaon eb jun k'in tu', max c'oli low eb, c'al yuc'wi an eb bay yul templo is diosal. A yet tu' caw wal yob max yal eb yin Abimelec.

²⁸Cax max oc ijan Gaal tu' yaloni: ¿Mac winakil Abimelec tu' yaloni? A nak tu', c'ajol Jerobaal nak, a pax Zebul is chekbej yayji ocok. A eb tu' c'am yelapnok eb. A pax a on aj Siquem on ti', ¿tzet animail on? ¿Tom chon ocxac'al is chekbejok eb nak ti'? Yelc'ulalokab chi co naektek tinani', tol a jichmam, a ton Hamor, jun mac max watx'nen aj conob Siquem ti', xan jiek el co ba yul k'ab Abimelec.

²⁹A…, ta ayin e yajawil in, mayal mi in c'ayil Abimelec tu', chim wal bay: Wajbaj oc a soldado cax chi jak'on owal, quin chi mi, ẍi nak.

³⁰A yet max yaben Zebul, is yalcalil Siquem tu' tzet chi yal Gaal tu', caw wal max tit yowal.

³¹Ayman max yatok k'anej bay Abimelec yin ewantakil. Axa yalontok tu': Max jay Gaal, is c'ajol Ebed yetok eb yuẍtak cayti', lanan yak'on eb is c'ul eb anima, cax chi oc eb ajc'ulal en.

³²Yuj tu' titan yet ak'balil yetok a soldado, cax che c'uban el e ba bay tilak conob ti'.

³³Axa yet toxa chi sakbi elok, cax chex oc e yak'on owal yin conob ti', axa yet chi eltok Gaal tu' yak'on owal etok yetok is soldado, okxac'al ela' tzet ok otej, ẍitok Zebul tu'.

³⁴A yuj tu xin xan max toj Abimelec yet ak'balil yetok eb is soldado. Can makan max yut pojontok ba eb, bay yinlak conob Siquem max c'ubaj el ba eb.

³⁵Max eltok Gaal bay puertail is murallail conob, cax max eltek Abimelec yetok eb is soldado bay chi c'ubaj el ba eb tu'.

³⁶A yet max yilon Gaal tu', cax max yalon bay Zebul axca ti': —Il tonabi, masanil bay satlak witz chi ayol soldado, ẍi Gaal. —C'amak, yenel witz chal animail tu' ach ti', ẍi Zebul.

³⁷Max yalon pax Gaal: —Ac'ala' c'apax bay tzalan chi yik is muxuc tx'otx' tx'otx' chi aytek eb, c'al bay beal matx'jilak yet eb naom el k'anej, a tu' chi ayol soldado, ẍi Gaal.

³⁸—Chi cam a k'anjab el tinani', lek'ti ach. Ach max ala' tol c'am yelapnok Abimelec yet chon oc is chekbejok. A tinani', a ton eb is soldado max a buchu', elantok tinani', yet chak' owal yetok, ẍi Zebul.

³⁹Max lajwi tu', max oc Gaal yikban eb anima bay Siquem, max eltok yak'on owal yin Abimelec.

⁴⁰Max toj lemnaj Abimelec yin, max ayc'ay Gaal, yetokc'al eb anima yuj. Palta maxto col ba Gaal, max octok bay puertail conob. Xiwil mac max cam bay puertail conob tu'.

⁴¹Max lajwi tu', max meltzoj Abimelec bay conob Aruma. Axa Zebul max yuktej el Gaal yetok eb yuẍtak bay Siquem yin junelnej.

⁴²Max yaben Abimelec tol chi eltok eb aj Siquem mulnajil yet junxa c'u.

⁴³Yuj tu' xan max pojtok is soldado yin ox makan, max c'uban el ba eb bay xolak ac'un. A yet max yilon eb tol max elol eb anima bay is puertail conob, max eltek eb soldado bay chi c'ubaj el ba tu', cax max yak'on eb owal yetok eb.

⁴⁴Yet wal jun bek tu', max toj Abimelec yetok jun makan eb soldado makon puertail conob, palta ca makanxa eb xin, max oc eb yak'on owal yetok eb anima max eltok mulnaj yinlak conob Siquem tu'.

⁴⁵Masanil yet jun c'ual tu' ayoc owal yuj Abimelec, masantac'al max ayc'ay jun conob tu' yuj, cax max c'ayon elok, max mak'on cam masanil anima, max secon can ay atz'am yiban jun conob tu'.

⁴⁶A yet max yaben aj eb anima bay nail colbalbail bay Siquem, tzet max yuncantok Siquem yuj Abimelec, max toj eb c'uban el ba bay yul templo jun yechelej chi yik Baal-berit.

⁴⁷A yet max yaben Abimelec, tol a tu' chi c'ubaj el ba eb anima bay tu',

⁴⁸max toj yetok masanil eb soldado tzunan oc yintak, bay jolom witz Salmón, max yiontok jun echej, cax max tzoc'on el jun is k'ab jun te te', max yaon ajtok jolom is xic', max yalon bay masanil eb anima, tol axca tu' chi yut c'apax eb yin aymanil.

⁴⁹Yuj tu' xan masanil anima max tzoc'on el k'ab te te', max oc tzakan eb yintak Abimelec, masantac'al max apni oc eb bay templo tu', max occan bulan is k'ablak te' tu' yin nail colbalbail tu'. Max yaon oc eb k'ak'al, xan max cam masanil eb anima ay bay tu', cax ay mi junok mil eb winak yetok eb ix ix.

⁵⁰Lajwi tu', max toj Abimelec yak'on owal yin conob Tebes. Ayman max yoy ba yin, cax max ayc'ay yuj.

⁵¹A bay nan yul jun conob tu', a tu' ay jun miman na bay chi col ba eb anima yet ay owal. A tu' max toj eb anima c'ubaj el ba. Caw wal watx' max yun makchen eb is puertail jun na tu', max ajtok eb yiban.

⁵²Max apni oc lemnaj Abimelec, max jitzon oc ba bay puertail na tu', yet chi yaoc k'ak'al yaloni.

⁵³Axa jun ix ix ayic' yiban na tu', max bekon aytek jun ch'en ch'en yet molino, c'uxan wal yin is jolom Abimelec max ayol ch'en, cax max pojtok is jolom.

⁵⁴Ayman max yal bay jun nak yikomal is mitx'k'ab yet owal: Itek espada, cax chin ak'on camok, c'am chi je' in c'ul tol ok al-layok, tol a junok ix ix chin mak'on camok, ẍi. Yuj tu xin, max yitek nak tu' yespada, max jekontok yul is c'ul, cax max cami.

⁵⁵A yet max yaben eb is soldado tol mayal cam Abimelec, cax max meltzoj eb bay yatut.

⁵⁶Axca tu' max yun paktzen Dios bay Abimelec yuj yobtakil max yun yin is mam, yuj max mak'cam eb nak 70 is yuẍtak.

⁵⁷Ac'ala' axca tu' max yun c'apax paktzen Dios yin eb anima bay Siquem yuj is yobtakil eb, cax max elcan apnok is catab k'anej Jotam, is c'ajol Jerobaal yiban eb.