Read Q'anjob'al 3 Jn 1 Bible Online

3 Jn 1 - Q'anjob'al bible

3 Jn 1

¹Ayin ton anciano in chin tz'ibejtok jun in carta ti' ayach, ach wuẍtak Gayo. Chach in camc'ulnej yin masanil in c'ul.

²Ach wuẍtak camc'ulnebil, wojtak tol caw wal tec'an yak'on a nabal satak Dios. Chin txajli bay Dios oj, yet watx', watx'okabc'al chi ec' oj yin masanil tzet yetal, cax watx'okabc'al a c'ul, axca yak'on a nabal tu'.

³A yet max ul yalon ec' eb juẍtak tzetbil ayji ocok, caw wal max tzaloj aj in c'ul cayti', yujtol max yal eb tol caw wal ayoc a nabal yin cuybej acaw yel, cax asan ab jun cuybej yel ti' cha beybalnej.

⁴A yet chi wabeni tol a eb max cha' Cristo wuj, ac'ala' beybalnen eb cuybej acaw yel, xan chin tzaloji. C'am junokxa tzet bay yel chi tzaloj in c'ul axca tu', yujtol axca tol wuninal yayji oc eb.

⁵Ach wuẍtak camc'ulnebil, watx' ton lanan oten a nabal bay tu' chi wabej. Chach ab colwaj bay eb juẍtak, c'al bay eb janab, caxc'al man ojtakok eb, palta cayab tu' chot a c'ul yin eb.

⁶Ay eb max alon satak iglesia ti', tol yel toni, tol ay a camc'ulal bay tu'. Matawal chach colwajc'al bay eb, yet ay bay chi toj eb ec'jabok. Moj axcac'al tu' chot colwaj a ba bay eb, yujtol caytu' chi yochej Dios.

⁷A eb tu', asan yuj yak'on serbil eb Jesucristo, xan chi ec' eb. C'am jabok tzet yetal chi cha' eb bay eb man creyenteok.

⁸Yuj tu' xan co cuenta co colwaj bay eb. Ta chon colwaj bay eb, axca tol ayon jun lanan co mulnaj yetok eb, yet lanan yec' eb yalon el cuybej acaw yel.

⁹Max in tz'ibejtok jun in carta ayex, mac ex che wajbaj e ba bay tu', palta axac'al Diótrefes chi yochej chex ikban bay tu'. A tzet chi jal ayon ti', c'am jabok yelapnok yul sat nak.

¹⁰Yuj tu' xan a yet ok in apnok ayex tu', cax ok walon tzet is mul nak, yujtol chi ec' naaj nak k'anej ayex jin. Man asannejok juntzan tu' chi yal nak, palta c'am chi cha' pax nak eb juẍtak chi apni ayex tu'. Ilab ta ayex che yochej che cha' eb, chi tit yowal nak e yin, toltax chex yuktej el nak xol iglesia tu'.

¹¹Ach wuẍtak camc'ulnebil, manchak a beybalnej beybal eb man watx'ok is beybal. Asan beybal eb watx' cha beybalnej. Ta watx' chi jut co ba, tita' tol yet onxa Dios chi yal tu'. Palta a pax mac man watx'ok chi yut ba, man ojtakbilok Dios yuj.

¹²Axa pax juẍtak Demetrio, watx' ab yul sat eb masanil, yujtol miman txequel tol lanan yiken jun cuybej a caw yel. Ilab on ti' c'apaxok, watx' nak yul co sat. E yojtak tol yel tzet chi jala'.

¹³Xiwiltoc'al tzet yetal chi wochej chi waltok ayach, palta maj in tz'ibejtok yul jun in carta ti'.

¹⁴Yujtol chin na', tol chok wal je' ach toj wiloni, cax ato yet tu' chin watx' alnejcan juntzanxa tzet yetal tu' ayach.

¹⁵Ayokab a junc'ulal bay tu'. Chi yatok eb creyente cayti' cawil a c'ul. Ti chi ja c'apaxtok cawil c'ul eb creyente bay tu'.