Read Q'anjob'al Ap 1 Bible Online

Ap 1 - Q'anjob'al bible

Ap 1

¹A jun libro ti' chi alontek juntzan tzet ak'bil bay Jesucristo yuj Dios, yuj yak'on jojtaknej el mac on yak'omal on serbil. A juntzan chi yaltek ti', yowalil toxa ok yunej. Max chektek Jesucristo jun is yángel ayin Juan in ti', is yak'omal in serbil Cham, yuj ul yak'on wojtaknej el juntzan ti'.

²A juntzan ok wal ti', a ton tzet max wila' yetokc'al is k'anej Dios max yak' Jesucristo testigoal ba yin.

³A mac chi awten aj tzet chi yal Dios yin jun libro ti', c'al eb chi abeni, caw wal watx' yet eb ta chi yikej eb tzet chi yala', yujtol toxa ok yun tzet chi yal tx'an ti'.

⁴Ayin Juan in ti', ayin ton chin tz'iblitok ayex ex creyente bay ukeb iglesia bay yul yet Asia. Yak'okabc'al Dios is watx'c'ulal ayex, c'al is junc'ulal. Ayic' Dios tinani', ayc'alta' ec' Cham cax t'inan ok jayok. Yak'okab eb ukwan*fn* espíritu ayic' satak is trono is watx'c'ulal ayex.

⁵Yak'okabc'al Jesucristo, Cham acaw testigo is watx'c'ulal c'al is junc'ulal ayex. A Cham babel ictzonebil aj xol eb camnak, Yajaw yayji yiban eb rey bay yulyibank'inal ti'. Caw wal ay is camc'ulal Cham jin. Max yiel Cham co yobtakil yetok is chiq'uil.

⁶A Cham max on aon oc yin reyal. Max yak' Cham jopiso junjun on yin sacerdoteal bay Dios, Cham is Mam. Caw mimanbilokab Cham, ayokab is yikbej Cham yin tojbalk'inal. Yunokabi.

⁷Ilabi, toxa ok jay Cristo xol asun. Ok yil masanil anima jayi, toltax eb max tekon cam Cham, ok yil eb jay Cham. A yet ok yilon anima bay junjun conob bay yulyibank'inal ti', ok ok' eb. Wal yel, caytu' ok ujok. Yunokabi.

⁸Chi yal Dios: Ayin ton babel in satak masanil, cax lajub in c'apaxok. Axca yayji letra A, yetok Zeta, cayin tu', ẍi Dios Cham Jajawil, Cham chi je' yuj masanil. Ayic' Cham tinani', ayc'alta' ec' Cham, cax t'inan ok jayok.

⁹Ayin Juan in ti', wuẍtak in ba e yetok. Jetbeyom co ba jaben yail, cax jetbeyom c'apax co ba yul k'ab Dios. Jun lajan chi jut co chaon co tec'anil chi yak' Jesucristo. A yet junel, preso wayji bay jun lugar chi yik Patmos, aycan nan xol aej, yujc'al walon el yabixal Dios, c'al yuj wak'on in ba testigoal yin Jesucristo.

¹⁰Axa yet c'ual Cham Jajawil, ay tzet max yak' Cham Espíritu wila'. Axa max wabeni, ay jun aw caw ip max oc wintak max wabej, axca yoc nuk' junok trompeta.

¹¹Max yalon ayin axca ti': A tzet chel ti', tz'ibejcan yin junok un, cax chaontok bay eb creyente bay ukeb iglesia: bay eb aj Efeso, bay eb aj Esmirna, bay eb aj Pérgamo, bay eb aj Tiatira, bay eb aj Sardis, bay eb aj Filadelfia, c'al bay eb aj Laodicea, ẍi ayin.

¹²Lajwic'al tu', max in meltzojtok acan wintak wiloni mactxel jun chi alon ayin tu'. Axa max wiloni, ay ukeb batxlub candil tol naba oro.

¹³A nan xol juntzan batxlubal tu', ay jun mac lajan wal yili axca anima. Ayoc jun jokan pichilej yuj, chita ayol xol yakan. Ayoc jun miman sat cincho oro yin txam is c'ul.

¹⁴A is xil, caw wal sak axca sak lana, ma axca sakil sakbat. A is bak' sat, lajan yili axca xak k'ak'.

¹⁵A yakan, caw wal chi tzekeki axca ch'en bronce mayal niklay el tz'ilal, cax chi tz'a yul horno, toxanej chi tzekeki yili. A yul is nuk', toxanej chi nilili bili axca bil bey mimek aej.

¹⁶Ibil aj ukeb waycan yuj yul is watx' k'ab. Ayiltek jun espada cab ye caw wal el yul is ti'. Chi jopopi sat axca jopopial yakan c'u yet caw ow yakan.

¹⁷Axa yet max wilon yin tu', max in ay telnaj bay yakantak, axca junok camnak; palta max yatok k'ab wiban, max yalon ayin axca ti': Manchak ach xiwi. Ayin ton babel in satak masanil, cax lajub in c'apaxok.

¹⁸Iquis in ec'ok. Caxc'al max in camlej, palta iquis in yin tojbalk'inal tinani'. Ayin ti', yajawil in camich, yajaw in c'apax jun lugar bay wajan ec' pixan eb camnak.

¹⁹Tz'ibejcan juntzan tzet mayal el ti', juntzan ayic' yet jun tiempoal ti', c'al juntzan tolto ok ujok.

²⁰Ok wal ayach tzet chi yal elapnok ukeb waycan max el yul in watx' k'ab, c'al ukeb batxlub candil tol naba oro max ela'. A ukeb waycan tu', yenel eb ukwan in chekbej bay ukeb iglesia. A pax ukeb batxlub candil tu xin, yenel ukeb iglesia tu'.