Read Q'anjob'al Ap 11 Bible Online

Ap 11 - Q'anjob'al bible

Ap 11

¹Axa yak'lay jun te aj lajan axca vara ayin. Max lajwi tu', max al-lay ayin axca ti': Ajan wan. Echej templo Dios, cax chechen c'apax jun altar, cax cha bison eb chi yal ba bay Dios yul tu'.

²Palta manchak echej yamak'il templo tu', yujtol a yamak'il tu', ak'bilxa bay eb man israelok. A eb tu' 42 xajaw ok tec'ay eb is conob Dios.

³Ok waoc yopiso cawan mac ok yak' ba testigoal win. 1260 c'u ok ec' yalil eb in k'anej. A an el pichilej ok yaoc eb yet tu', yet watx' chi txecloj elok tol ayoc eb yin cusc'ulal, ẍi.

⁴A cawan testigo tu', a ton cab te txutxal olivo albil yuj Zacarías. Yetok c'apaxok, a ton cab tzektebal jopan oc satak Cham Yajawil sat tx'otx'.

⁵Ta ay mac ok yochej ok etnen eb, ok eltek k'ak'ej yul ti' eb. Axa eb ok chichon oc c'ul yin eb, ok tz'aay eb yuj k'ak' k'ak' tu' junelnej. Caytu' ok yun cam masanil mac ok yochej ok etnen eb.

⁶A eb testigo tu', ay yikbej eb tenon oc wanaj nab, yet watx' c'amxa chi yak' nab tu', yak'ban chi ec' eb yalon el k'anej Dios. Ay c'apax yikbej eb yuten oc aej yin chic'al. A bay sat tx'otx' chi je' yuj eb yak'on tzanc'al tzet yailal yin xiwil elal, atac'ala' yochwan eb.

⁷Palta a yet ok lajwok yalon el eb k'anej Dios, a jun chi yik No', a ton jun ok ajol yul jun xab olan, a' ok tok jucnaj yin eb, cax ok yak'len owal yetok eb. Ok uj yuj jun chi yik No' tu' mak'on cam eb.

⁸Ok can teljab mimanil eb cawanil yul calleal jun miman conob bay max curusnelay Cham Jajawil. A jun conob tu' chi yik Sodoma, cax chi yikon c'apax Egipto, yuj tx'oxk'abnelay el tzetbil yayji.

⁹Yin nan is can c'ual, xiwil anima ok ec' ilon oc is mimanil eb camnak tu'. Xiwil conoblak c'al nacionlak bay petoj eb ok matz'en tu'; tx'ok tx'okc'al yel is ti' eb. Maj cha' mukay eb anima tu' mimanil eb cawan camnak tu'.

¹⁰Ok tzaloj masanil anima bay yulyibank'inal, yujtol max cam eb. Toltax ok salej ec' eb tzetak yetal xol. Caw ok tzaloj eb yuj max oc camich tu', yujtol caw wal max yab eb yail yuj cawan eb chekbej Dios tu'.

¹¹Palta a wal lajwi nan is can c'ual cam eb tu xin, cax ok ictzonelay aj eb yuj Dios, cax ok aj pax wan eb. Caw wal ok xiw jantak eb mac ok ilonok.

¹²Lajwi tu', cax ok oc jun nuk'ej bay satcan, caw yip yalon bay eb cawan tu' axca ti': Ajanektek bay satcan ti', ẍi bay eb. Yuj tu' xan ok tok eb xol jun asun bay satcan tu'. Toxac'al t'anan ajtok eb ajc'ul tu' yin eb.

¹³A wal yet jun bek tu', ok ec' jun quixcab. Caw ow ok yun yeq'ui. Xiwil na ok ayc'ay bay jun miman conob tu'. Yin lajlajon bulan ok yun yayc'ay junjun bulan. Ukeb mil anima ok cam yuj. A pax juntzanokxa anima xin, caw ok xiw eb sic'libil. Ok yalon eb tol caw miman yelapnok Dios ayic' bay satcan.

¹⁴Axca ton ti' ok yun yec' jun yet is cab yailal, palta ayto wal junxa ok jay yin aymanil.

¹⁵Axa yet max xuon jun yet is suk ángel tu' is trompeta, max oc juntzan aw bay satcan. Caw yip yalon axca ti': A eb yajaw bay yulyibank'inal, wal tinani' chi can yikbej eb yul k'ab Dios Jajawil, chi can c'apax yul k'ab Cristo, a ton Cham ak'bil yikbej yuj Dios. A' ok ak'on yajawilal yin tojbalk'inal, ẍi eb.

¹⁶Axa yay nojan eb 24 icham winak chotan ay yul is ẍila ayic' satak Dios, max c'oli yalon ba eb bay Cham.

¹⁷Max yal eb axca ti': Ach Dios Jajawil, tol chic'al je' oj masanil. Ayach ec' tinani', ayachc'alta' ec'ok. Chi jal yuj diosalil ayach ach Jajawil, yujtol max a tx'oxk'abnej elok tol caw miman ekbej, max a chaon el yich ak'on Yajawilal.

¹⁸Max tit yowal juntzan nacionlak, palta max jay c'ual aon oc yailal yiban eb. Max jay c'apax tiempoal a beyc'ulnen eb camnak. Ok paktzej junjun eb chach ak'on serbil, a ton eb a chekbej, yetok eb et-xa yayji, c'al eb yikem ayach, eb ay yelapnok, c'al eb c'am yelapnok, ok ak' paktzil bay junjun eb. Yetok c'apaxok, max jay tiempoal ak'on lajwok el eb chi ak'on lajwok tx'otx' tx'otx', ẍi eb.

¹⁹Max lajwi tu', max jakchaj templo Dios ayic' bay satcan. Caw txequel caẍail is trato Dios yul templo tu'. Max c'oli nilili bil c'u, chi aj rayo. Aylaj juntzanxa tzet yetal chi nilili. Max ec' c'apax jun quixcab; max jay jun owal sakbat.