Read Q'anjob'al Ap 16 Bible Online

Ap 16 - Q'anjob'al bible

Ap 16

¹Cax max waben yoc jun aw bay templo tu'. Caw yip yalon bay eb ángel tu' yukwanil axca ti': Asek, che secon ay yowal c'ul Dios ayay yul ukeb sec' tu' bay yulyibank'inal, ẍi.

²Axa toj jun babel ángel tu', max bet secon ay tzet ayay yul is sec' tu' sat tx'otx'. Axa pitzc'oj aj juntzan mimek yabil yin mimanil jantak eb bay ayoc is yechel jun chi yik No' tu', cax chi yion c'apax ay ba eb bay yechel. Caw yob juntzan yabil tu', cax caw ya'.

³Lajwi tu', max secon ay jun yet is cab ángel tzet ayay yul is sec' yiban a' mar. Max oc a' mar tu' chic'al, axca chiq'uil junok anima camnak. Yuj tu', max cam masanil tzet ay yulak a'.

⁴Lajwi tu', max secon ay jun yet is yox ángel tzet ayay yul is sec' yiban a' mimek aej, c'al yiban nuk'lak a'. Max oc c'apax a' chic'al.

⁵Axa wabeni, max yalon jun ángel yajawil a' axca ti': Mamin, ach Dios, asan ton ach watx' ach. Ay ach ec' tinani', ay achc'alta' ec'ok. Watx'c'al max ot a beyc'ulnen eb yetok jun tzet max el onen ti'.

⁶Yujtol a eb anima, max mak'tek eb chiq'uil eb et-xa, c'al yetok eb a chekbej. Yuj tu' xan chic' chak' yuc' anima ti' tinani', xan moj ton caytu' chi utlay eb, ẍi.

⁷Axa max wabeni, max eltek jun k'anej bay altar axca ti': Yel, ach Dios Jajawil, chic'al je' oj masanil, caw watx' ton max ot a beyc'ulnen eb yin bayc'al ijan yel, ẍi.

⁸Lajwi tu', max secon ay jun yet is can ángel tzet ayay yul is sec' yiban c'u. Axa yak'lay yikbej c'u tu' yak'wi tz'a anima yetok is k'ak'al.

⁹Caw wal max tz'a anima masanil yuj sic'libil, palta majc'alta' na ba eb jabok. Tamwal max yal eb tol miman yelapnok Dios. A ti' yet eb, tol max bajwaj aj eb yin, yujtol ay is yikbej yak'on juntzan yailal tu'.

¹⁰Lajwi tu', max secon ay jun yet so' ángel tzet ayay yul is sec' yiban is despacho jun chi yik No' tu'. Xan max k'ekk'olcan el masanil tzet ayoc yul is k'ab bay chi yak' cuenta. A eb anima tu', caw wal chi chiay eb yak' yuj yail.

¹¹Palta ac'ala' majc'alta' na ba eb jabok. Tol max aj can eb bajwaj yin Dios aj satcan yuj yail chi yab eb, c'al yuj juntzan yabil max eltek yin is mimanil eb tu'.

¹²Lajwi tu', cax max secon ay jun yet is wak ángel tzet ayay yul is sec' yiban a' miman aej chi yik Éufrates. Max tanaj a' Éufrates tu', yuj yoc is be a' tu' beok eb yajaw ok tit bay chi ajol c'u.

¹³Axa max wiloni, ayic' jun dragón, yetok jun chi yik No', c'al jun chi tz'ak yaloc ba chekbejok Dios. Chi eltek junjun espíritu yob yul is ti' eb. Axca wal yili no pekey, caytu' yili juntzan espíritu tu' yoxwanil.

¹⁴A juntzan tu', a ton espíritu yob tol chi je' yuj tx'oxwi milagro. Max toj eb toj yak' wajban oc ba jantak mimek yajaw yulyibank'inal, yuj yak'len eb owal yet jun c'ual miman yelapnok tol yet Dios, Cham chic'al je' yuj masanil.

¹⁵Max yalon Cham chi yik Calnel axca ti': Abek, axca wal chi yun jay tzac'naj junok elk'om, axca tu' ok yun in jay tzac'najok. Caw watx' e yet mac ex chex makwaji. Che ya'ilnej e pichil talaj axca tol t'iran ex elok yet ok in jayok, cax ok ex ec' t'irt'on satak masanil anima. Caw ok e yak' e q'uixwilok, ẍi.

¹⁶A eb espíritu yob tu', max yak' eb wajbaj oc ba eb mimek yajaw bay jun lugar chi yik Armagedón yin is ti' hebreo.

¹⁷Lajwi tu', max secon ay jun yet suk ángel tzet ayay yul is sec' xol cak'ek', cax max eltek jun k'anej bay is trono Dios, bay yul templo, chi yalon axca ti' yin ipejal: ¡Mayal yi ba! ẍi.

¹⁸Cax ayman max aj joplajbok rayo. Max c'oli bil c'u. Ay juntzanxa tzet max nilili ajok. Ay wal jun miman quixcab max eq'ui. Yecheltaxc'al c'amto anima yulyibank'inal, c'amto bay chi ec' junok quixcab axca jun tu'.

¹⁹Axa jun miman conob, ox pojan max yunej. Pilan max ayc'ay masanil conoblak bay yulyibank'inal. Max nalaytek is yobtakil miman conob Babilonia yuj Dios. Cax max yaontok jun miman yailal yiban eb yuj yowal is c'ul. Axca wal tol max yak' Dios yuc' eb vino caw ow.

²⁰Pilan max c'ayil masanil tx'otx' tx'otx' sutquiẍtak nanlak a', c'al masanil witzlak.

²¹Lajwi tu', max jay mimek sakbat, ay mi junjunok quintal yalil junjun. Max bajwaj aj eb anima yin Dios yuj sakbat tu', yujtol caw wal ya' chi yab eb.