Read Q'anjob'al Ap 17 Bible Online

Ap 17 - Q'anjob'al bible

Ap 17

¹Cax max jayoc k'anjab wetok junok eb ukwan ángel inejnak aj ch'en ukeb sec' tu', max yalon axca ti': Sebach, ok in tx'ox ayach jun miman yailal ok jay yiban ix yajawil ajmul ix, ix chotan ay yiban a' mar.

²Pilan max ayc'ay eb mimek yajaw yin mul yetok ix, cax max etax el anima bay masanil yulyibank'inal yuj ix. Axca tol max oc eb uq'uem anil yuj yajmulal ix max yak' yuc' eb axca vino, ẍi ayin.

³Lajwi tu', max quin yiontok jun ángel tu' bay jun tz'inan tx'otx', cax ay tzet max ak'i wil yuj Cham Espíritu. A tu' max bet wil yin jun ix ayaj yiban jun chi yik No', cakyin yili. Xiwil is bi tz'ibbil oc yin is mimanil No'. Caw yob yali junjun is bi tu' chi yab Dios. Ukeb jolom, cax lajoneb yuc'a'.

⁴Calan morado yetok cak yili pichil jun ix tu'. Xiwil juntzan ch'en chi tzekeki ayoc yin. Aylaj oro, aylaj juntzan chi yik perla, c'al juntzanxa ch'en caw can is tojol ayoc yin. Mitx'bil aj jun sec' oro yuj ix. Nojnak jun sec' tu' yuj juntzan tzet yetal tol yajbejtak yuj Dios, a ton yobtakil yajmulal ix.

⁵Tz'ibbil oc jun biej yin nan sat ix, tol c'am mac chi nachaj el yuj. Tix yoc jun biej tu': A miman Babilonia, is txutx eb ix ajmul ix masanil. Is txutx c'apax masanil tzet yajbejtak yulyibank'inal, ẍi.

⁶Axa max wiloni, caw uq'uem an ix yuj chiq'uil eb yet-xa Dios, eb max mak' cam ix, yujc'al tol max yak' ba eb testigook Jesús. Caw wal max c'ayaj in c'ul yet max wilon jun tu'.

⁷Yuj tu' xan max yal jun ángel tu' ayin axca ti': ¿Tzet yuj xan caw chi c'ayaj a c'ul elon jun ti'? Ok wal ayach tzet chi yal elapnok jun ix ti', c'al jun chi yik No' bay ayaj ix, tol ay ukeb jolom tu', c'al lajoneb yuc'a' tu'.

⁸A jun chi yik No' max el tu', ayc'alta' ec' payxa, palta c'amxa ec' tinani'. Palta ok aj pax ul yul jun xab olan, yet manto toj bay c'aybanilal yin junelnej. A anima tol man tz'ibbilok is bi yul tx'an un yet k'inalej yet c'amto chi tz'unchaj yulyibank'inal, caw wal ok c'ayaj c'ul eb yet ok yilon eb jun chi yik No' tol ayxac'alta' ec' yet payxa tu'. Yujtol caxc'al c'amic' tinani', palta ok jay pax yet is cayelal.

⁹A mactxel jelan, ok nachaj el juntzan ti' yuj. A ukeb jolom jun chi yik No' tu', a ukeb tzalan bay chotan ajtok ix ajmul ix tu' chi tx'oxtek.

¹⁰A c'apax ukwan mimek yajaw chi tx'oxtek. Owan eb yajaw tu' mayal eq'uelok. Ay jun ayto oc yajawilal tinani'. Cax ay junxa tolto ok oc yajawilal. A yet ok jay junxa tu', manxa najatok tiempo ok yak' yajawilal.

¹¹Axa jun chi yik No' tu', ayic' yet payxa tu', palta tol c'amxa pax ec' tinani'; a' ok oc yet is waxak yajawilal, palta tol a ton junok eb ukwan tu'. Ok lajwok tu', cax ok tok bay ok c'ayil yin junelnej.

¹²A lajoneb yuc'a' jun chi yik No' tu', a lajonwan mimek yajaw manto chail yich yak'on yajawilal chi tx'oxtek. Palta ok ak'lay yikbej eb yetok jun chi yik No' tu', cax ok yak'on eb yajawilal yin txennej tiempoal yetok.

¹³A eb lajonwan tu', ok chalej ba nabal eb, cax ok yak'on eb yikbej yin yajawilal bay jun chi yik No' tu'.

¹⁴Ok yak'lej eb owal yetok jun Cham chi yik Calnel, palta a Cham ok ak'on ayc'ay eb. Yujtol a Cham, Yajawil eb yajaw, c'al Reyal eb rey yayji Cham. A eb ayic' yetok Cham, awtebil el eb, cax sic'bil el eb yuj Dios, cax a ton eb yikem bay, ẍi jun ángel tu' ayin.

¹⁵Lajwi tu', max yalon pax ayin axca ti': A a' mar max el tu' bay chotan ajtok ix ajmul ix tu', a ton conoblak, nacionlak, c'al anima tx'ok tx'ok is ti' chi tx'oxtek.

¹⁶A lajoneb yuc'a' jun chi yik No' max el tu xin, ok oc eb ajc'ulal yin ix ajmul ix tu'. Ok yi ec' eb masanil tzet ay ix. Ok can t'iran ix yuj eb. Ok chi eb chibejal ix, cax ok nison c'apax tz'a eb.

¹⁷Yujtol a Dios max ak'on yochej eb, axca wal chi yochej c'ul Cham. Yuj tu', jun lajan chalen ba nabal eb yunen axca tu', xan max yak' c'apax eb yikbej bay jun chi yik No' tu', masantac'al chi yuncan el tzet albilxata' yuj Dios.

¹⁸A ix ix max el tu', a ton jun miman conob chi ikban eb yajaw bay yulyibank'inal ti' chi tx'oxtek, ẍi ayin.