Read Q'anjob'al Ap 18 Bible Online

Ap 18 - Q'anjob'al bible

Ap 18

¹Lajwi tu', max wilon tit junxa ángel bay satcan, max ayol sat tx'otx'. Caw xiwil yipalil. Max sakbi yulyibank'inal yuj is tzekekial.

²Max yalon yin ipejal axca ti': ¡Mayal wal ayc'ay conob Babilonia, c'am junok axca, palta mayal ayc'ayi! Mayal oc cajlubok eb espíritu yob. Mayal occan bay chi wajbaj ba junjun makan eb espíritu yob. Mayal occan wayubok no tz'iquin caw yajbejtak, tol man watx'ok.

³Yujtol max oc masanil nación uq'uemanil yuj is vinoal, a ton is yajmulal, cax yuj max mulji eb mimek yajaw sat tx'otx' yetok, cax max oc eb txonjom sat tx'otx' beyomal yuj, yujtol c'amxa yalbanil tzet max man bay eb yuj yak'on nabal, ẍi jun ángel tu'.

⁴Lajwi tu', max waben yoc junxa aw bay satcan, max yalon aytek axca ti': Ex in conob, elanek bay tu', yet watx' c'am e locanil xol masanil tzet man watx'ok chi el yuneni, cax c'am chex tzakaytok yet ok jay yailal yiban.

⁵Yujtol a is mul tu', caw max aj bululok, masantac'al max ajol bulan satcan ti', cax max nalaytek is yobtakil tu' yuj Dios.

⁶Axca max yut juntzanxa mactxel, caytu' che yut e yion ec' pak bay. Toltax cayelokab che yiec' pak bay yuj is yunben. A tzet ayay yul jun is sec' max yak' yuc' juntzanxa mactxel, cayelokab caw ow che yut e yak'on pak bay.

⁷Yuj max yiaj can ba sic'libil, cax asan yin beyomal max yaoc is nabal, xan caytu' che yut e yaon oc yailal c'al cusc'ulal yin. Ilab tol max na' axca ti': Ayin ti', reina in. Chotan in ay bay in despacho. Mayin lajanok axca junok ix ix camnakxa yichamil. C'am bak'in ok wil yailal jabok, ẍi.

⁸Yuj tu', junnej c'ual ok yun jay yailal yiban, a ton camich, ok'ilal, c'al wajil. Ok nislay tz'a xol k'ak', cax ok lajwok. Caytu' ok yun jay yiban axca tu', yujtol xiwil yipalil Cham Dios Jajawil, Cham ok beyc'ulnenok, ẍi jun aw tu'.

⁹A eb mimek yajaw bay yulyibank'inal max mulji yetok jun chi binaj axca ix tu', locan eb yetok is beyomal, palta a yet ok yilon eb yaj wacacok mubal tz'a'i, caw ok ok' eb, cax ok c'uyuyok eb yuj.

¹⁰Najatta' ok tit lecjab eb yuj xiwilal yuj jun yailal tu', cax ok yalon eb axca ti': ¡Ay, ay, ok'bal wal c'ul jun miman conob Babilonia! Caw miman yelapnok jun conob tu', palta jun wal bek max jay yailal, ẍixac'al eb.

¹¹Ok cus eb comerciante yuj, cax ok ok' eb yuj, yujtol c'amxa mac ok manon txon eb tu'.

¹²Tixtak tzetak yetal chi txon eb ti': Oro, plata, juntzan ch'en can is tojol, perla, an lino caw watx', c'al juntzanxa k'ap caw watx', sera, morado c'al cak. Masanil-laj te' suk'uk'i yoc jab, masanil tzet chi watx'ji yetok marfil, c'al te te' caw wal caw, ch'en bronce, ch'en hierro, c'al ch'en mármol.

¹³Ay c'apax canela, yetok juntzanxa te' suk'uk'i c'uxi, c'al juntzan suk'uk'i jab yet chi tz'a'i, mirra, c'al yal suk'uk'i jab. Ay c'apax vino, aceite, yetok harina caw watx', c'al trigo. Ay c'apax no iktzom no', aylaj calnel, yetok chej. Ay c'apax carreta. Toltax eb mosejal chi txonlayi.

¹⁴Ok yal eb comerciante tu' yin jun conob tu' axca ti': ¡A juntzan sat te' chi yochej ocok, mayal c'ayilok. Masanil is beyomal, c'al juntzan tzetak yetal watx' ay, pilan max c'ayil masanil junelnej! ẍi eb.

¹⁵A eb max txonon juntzan tzetak yetal tu', max oc eb beyomal yuj jun conob tu', najatta' ok can eb yuj xiwilal yuj jun yailal tu'. Ok c'uyuyok eb cax ok ok' eb yuj.

¹⁶Cax ok yalon eb axca ti': ¡Ay, ay, ok'bal wal c'ul jun miman conob ti! Lajan wal axca junok ix ix a' ijan is pichil ayocok. Ay moradotak yili, aylaj cak. Xiwil oro ayoc yinlak, aylaj juntzanxa ch'en can is tojol, c'al juntzan ch'en chi yik perla.

¹⁷¡Palta junnej bek max lajwi el masanil is beyomal tu'! ẍi eb, ok yalon eb. Masanil eb yajaw barco, yetok masanil eb ayoc yul, c'al eb chi mulnaj oc yin mitx'banil barco tu', yetok eb chi mulnaj yulak a' mar, maxc'al can eb masanil najat.

¹⁸A yet max yilon yaj wacacok mubal jun conob tu' tz'a'i, max aj yaw eb yin ipejal axca ti': Tok ay junokxa conob chi apni axca jun miman conob ti', ẍi eb.

¹⁹Max tiẍajtok eb pokok xol is xil yuj cusc'ulal. Caw max jichchaj c'ul eb yok'i, cax chi c'uyuyi eb, c'al wek'on el eb yaw axca ti': ¡Ay, ay, ok'bal wal c'ul jun miman conob ti'! ¡Max beyomax jantak eb ay is barco yuj; palta junnej wal bek max lajwi ay jun conob ti' tinani'! ẍi eb.

²⁰Max wab al-layi: Tzalojanek yuj tzet max utlay jun conob ti' ex aj satcan, yetok ex chekbej ex Jesucristo, c'al ex chekbej ex Dios, yetok e masanil ex yet exxa, tzalojanek. Yujtol axca max ex utlay yuj, axca tu' max yun beyc'ulnelay jun conob ti' yuj Dios, cax max yak'on is yailal, ẍi.

²¹Max lajwi tu', ay jun ángel caw xiwil is yipalil. Max yiaj jun miman ch'en, axca suyay junok ch'enal molinoal trigo. Max k'okon aytok jun ch'en tu' yul a' mar. Max yalon axca ti': Cayton tu' ok yun k'oklay ay miman conob Babilonia. C'amxa bak'in ok il-laytek junelxa.

²²C'amxa bak'in ok ablay yoc arpa, c'al flauta yetok trompeta bay tu'. C'amxa junok mac ok mulnaj bay tu'. C'amxa bak'in ok ablay yec' suyuyok junok ch'enal molino.

²³C'amxa sakk'inalil tzektebalej ok oc bay tu', c'amxa bak'in ok ablay wekeki anima yin junok k'in nupayil bay tu'. Caytu' ok utlay jun conob tu', yujtol a jantak eb is comerciante yet yalantok, caw miman yelapnok eb yintak masanil eb bay masanil sat tx'otx'. Yetok c'apaxok, yujtol maxc'al etnewi anima bay junjun nación yuj yajtxumal jun conob tu'.

²⁴A bay jun conob tu' max il-lay chiq'uil eb chekbej Dios, c'al chiq'uil eb yet-xa Cham. Masanil jantak eb mak'bil cam bay masanil yulyibank'inal, ok oc chiq'uil eb cargonej jun conob tu', ẍi jun ángel tu'.