Read Q'anjob'al Ap 2 Bible Online

Ap 2 - Q'anjob'al bible

Ap 2

¹Max yalon Jesús ayin: Tix chot a tz'ibentok ti' bay jun in chekbej ayic' nan xol iglesia bay conob Efeso: A Cham mitx'nej aj ukeb waycan yul is watx' k'ab, cax chi ec'jab nan xol ukeb batxlub candil tol naba oro, a' chi alon ayex axca ti':

²Wojtak masanil tzet chi el e yuneni. Wojtak tol caw wal che yiajtek e c'ulok e mulnaj yin yet Dios, cax tol chi techajc'al mimanc'ulal e yuj, cax c'am c'apax che chaoc eb man watx'ok e nan e xol. Wojtak c'apaxok, tol che yak'lej porobal eb chi tz'ak yaloc ba in chekbejok. Max ayc'ay eb yin is lek'tial e yuj.

³Caw max techajc'al mimanc'ulal e yuj. Xiwil yailal max e yil wujc'al, palta maj ex caktzaj ajok.

⁴Palta ay wal jab in c'ul e yin, yujtol manxa lajanok e camc'ulal axca yet babelal.

⁵Yuj tu', naektek tzetbil e yayji, yet watx' manchak etax el e nabal. Naek e ba, watx'nejek oc e beybal axca yet yalan. Ta man ok e na e ba, ayman ok in jay ayex, cax ok ul wion el e tzektebal bay is lugar.

⁶Yujtol a is beybal eb Nicolaíta, c'am watx'il yul e sat, ilab c'apax ayin ti', c'am watx'il yul in sat.

⁷¡Masanilc'al mac chi aben juntzan ti', yacbajokab eb txiquin bay tzet chi yal Cham Espíritu bay junjun iglesia! Chi yal Cham axca ti': A eb ok yak' techajok, ok wak' sat te te' yet k'inalej tol ayc'al yin tojbalk'inal lo eb. A jun te tu', a bay paraíso Dios ayic'ok, cha tz'ibejtok, ẍi Jesús.

⁸Max yalon c'apax Cham ayin: Tix chot a tz'ibentok ti' bay jun in chekbej ayic' nan xol iglesia bay conob Esmirna: A Cham babel satak masanil, cax lajub c'apaxok, Cham max cami, palta max ictzonelay pax ajok, a Cham chi alon ayex axca ti':

⁹Wojtak tol wujc'al che yab yailal. Caw meba' ex, palta wal yel, beyom ex yul sat Dios. Wojtak c'apaxok, tzet chi yun e buchlay yuj eb chi tz'ak yaloc ba israelal. Palta a is wajayil eb tu', yet Satanás yayji.

¹⁰Manchak ex xiw yuj juntzan yailal ok jayoc e yiban. Ay ex ok ex alay oc preso yuj nak diablo, yuj ex yak'on porobal. Ok e yab yail lajonebok c'u, palta yikemokabc'al che yut e ba masantac'al camich. Ok in paktzej e yikemal tu', a ton e k'inal tol ayc'al yin tojbalk'inal.

¹¹¡Masanilc'al mac chi aben juntzan ti', yacbajokab eb txiquin bay tzet chi yal Cham Espíritu bay junjun iglesia! Chi yal Cham axca ti': A eb ok yak' techajok, manxa ok yab eb yail jun yet is cab camich, cha tz'ibejtok, ẍi Jesús.

¹²Max yalon c'apax Cham ayin: Tix chot a tz'ibentok ti' bay jun in chekbej ayic' nan xol iglesia bay conob Pérgamo: A Cham ay yespada cab ye tol caw el, a chi alon ayex axca ti':

¹³Wojtak tol ayex ec' bay jun conob bay caw chi yak' Satanás yajawilal, palta ac'ala' e yiken ayin. Yel ton wali, max yak' Antipas testigoal win, max mak'lay cam e xol, bay ayic' Satanás tu', palta majc'alta' e bek e yaon oc e c'ul win.

¹⁴Palta ay juntzan e paltail chi wila'. Ilab tol ay ex che yaoc e nabal yin is cuybej Balaam,*fn* nak ak'nej c'ul Balac, yuj yak'on etax el eb israel, yuj yoc eb chion tzet max xajanelay bay tzet chi al-lay oc diosal, cax max toj c'apax eb yin mulej.

¹⁵Yetok c'apaxok, ay ex che yaoc e nabal yin is cuybej eb Nicolaíta.

¹⁶Yuj tu', naek e ba. Ta c'amak, ok in jayoc lemnaj ayex, cax ok wak'len owal e yetok, mac ex caytu' che yut e ba axca tu'. Ok wak'balnej jun espada ay eltek yul in ti'.

¹⁷¡Masanilc'al mac chi aben juntzan ti', yacbajokab eb txiquin bay tzet chi yal Cham Espíritu bay junjun iglesia! Chi yal Cham axca ti': A eb ok yak' techajok, ok wak' lo eb jun maná ebebil elok. Ok wak' c'apax junjunok ch'en ch'en caw sak bay eb. A yin junjun ch'en tu', tz'ibbil oc jun ac' biej, c'am mac ojtakneni. Asan eb chi cha' yet, a eb ok ojtaknen elok, cha tz'ibejtok, ẍi Jesús.

¹⁸Max yalon c'apax Cham ayin: Tix chot a tz'ibentok ti' bay jun in chekbej ayic' nan xol iglesia bay conob Tiatira: A Cham C'ajol Dios, Cham axca xak k'ak' yul sat, Cham lajan yakan axca ch'en bronce chi tzekeki, a Cham chi alon ayex axca ti':

¹⁹Wojtak masanil tzet chi el e yuneni. Wojtak tol ay e camc'ulal. Caw chin e yaoc yin e c'ul. Chin e yak' serbil. Caw chi techaj mimanc'ulal e yuj. Wojtak tol ec'ban e mulnajil tinani', yintak yet yalan.

²⁰Palta ay in c'ul e yin, yujtol che chaoc ix Jezabel e nan e xol. A jun ix tu', chi tz'ak yaloc ba chekbejok Dios, palta toc'al chi yak' lek'tial bay eb wak'omal serbil, yujtol chi ak'wi c'ulej bay eb yet watx' chi toj eb yin mulej, cax chi chion eb tzet max xajanelay bay tzet chi al-lay oc diosal.

²¹Maxto wak'c'al mimanc'ulal yin ix, yet watx' chi na ba c'ul ix yin is yajmulal, palta maj na ba ix jabok.

²²Yuj tu', ok watok ix sat tx'at. Axa eb chi unen mul yetok ix, ok waoc miman yailal yiban eb. Ok wut eb axca tu', ta c'am chi na ba eb, ta manc'al ok bekcan eb is beybal axca ix tu'.

²³Yetok c'apaxok, ok wak' c'apax cam eb yune' ix. Axca tu xin, ok yojtaknej el junjun iglesia tol ayin ti', wojtak masanil tzet chi ec' yin e nabal c'al yin e yanimail. Ok in paktzej ayin ti', atac'ala' tzet chi el e yunen junjun ex.

²⁴Palta a ex aj Tiatira, ex tol c'am che yaoc e nabal yin is cuybej ix ix tu', jun cuybej chi yal eb tol cuybej Satanás ya' nachaj elok, c'am junokxa chekbanilej chi waltok ayex.

²⁵Asan jun ti' chi waltok ayex. Tol ac'ala' watx'okabc'al che yut e beybal, masantac'al chin jayi.

²⁶A eb ok yak' techajok, eb ac'ala' yunen axca chi wochej masantac'al lajubal, a eb ok waoc yajawilok juntzan mimek conob.

²⁷Axca yutnak in Mam yak'on wikbej ayin ti', caytu' ok wut wak'on yikbej eb. Yuj tu', ok yak' eb yajawilal yin c'am mimanc'ulalil. Ok yak' lajwok eb juntzan mimek conob tu', axca chi yun pojtok junok tx'otx' xij yuj junok ch'en k'okoch.

²⁸Yetok c'apaxok, ok wak' c'apax jun miman puj bay eb.

²⁹¡Masanilc'al mac chi aben juntzan ti', yacbajokab eb txiquin bay tzet chi yal Cham Espíritu bay junjun iglesia! cha tz'ibejtok, ẍi Jesús.