Read Q'anjob'al Ap 20 Bible Online

Ap 20 - Q'anjob'al bible

Ap 20

¹Lajwi tu', max wiloni, tol ay jun ángel max aytek bay satcan, max ayol sat tx'otx'. Ibil oc laweal jun xab olan yuj, yetok jun miman cadena,

²cax max mitx'lay ay jun dragón yuj. A jun dragón tu', a ton jun max yut ba labajil yet payxa, a ton jun chi yik diablo, c'al Satanás. Mil abil max pixlaycan ay yuj jun ángel tu'.

³Max k'oklay aytok yul jun xab olan. Lajwi tu', cax max makchencan jun ángel tu' is ti' jun xab olan tu', max yaon oc selloal, yet watx' c'amxa chi etnewi anima nak diablo tu' bay junjun nación, masantac'al chi yal lajwi mil abil tu'. Ato yet ok lajwok mil abil tu', cax chi beklay ajtek nak Satanás tu' jabokxa tiempoal.

⁴Axa max wiloni, ay juntzan tronolak. Chotan ay juntzan eb ak'bil yikbej beyc'ulnewi. Max wilon c'apax is pixan juntzan eb xikbil el jolom, yujc'al tol yak'nak ba eb testigoal yin Jesús, cax yalnak el eb k'anej Dios. A eb tu', maj yiay ba eb bay jun chi yik No' tu', c'al bay yechel. Maj chaoc eb yechel yin is nan sat, ma yin is k'ab. Axa max wiloni, max ictzoj aj eb, max yak'on eb yajawilal yetok Cristo yin mil abil.

⁵A eb yet-xa Cristo, a eb tu' babel ictzonebil ajok. (Axa juntzanxa eb camnak xin, majto ictzonelay aj eb, masantac'al yet max lajwi mil abil tu'.)

⁶Caw watx' yet eb babel ok ictzonelay aj tu'. Asan Dios ay yet eb. C'am yalon yet jun yet is cab camich yin eb. Ok ak'lay yikbej eb yoc yin sacerdoteal bay Dios, yetok bay Cristo, cax ok yak'on eb yajawilal yetok Cristo yin mil abil.

⁷A yet ok tz'aknaj mil abil tu', cax ok jaklay ajtek Satanás bay ayaytok preso tu'.

⁸Pilan ok ec' yetnej eb anima bay junjun nación bay yulyibank'inal. Ok yetnej jun chi yik Gog yetok eb chi yik Magog. Cax ok yak'on Satanás wajbaj oc ba eb tu' yin owal. Xiwil eb soldado tu', axca bisil yarenail ti a' mar.

⁹A yet ok tok eb yin owal tu', caw ok nojil sat tx'otx' yuj eb. Ok apnok oc oyan eb bay jun lugar eb yet-xa Dios makbilxa el yuj, jun is conob camc'ulnebilxa yuj Cham, cax ok bekon aytek Cham k'ak' bay satcan, cax ok ayol yiban eb soldado tu'. Pilan ok tz'a eb masanil.

¹⁰Axa nak diablo, jun max etnen eb tu', ok k'oklaytok xol jun miman k'ak' chi nilxi, calan yetok azufre, axca yili mimek najab, bay k'okbil c'apaxtok jun chi yik No', c'al jun tz'ak yalnak oc ba chekbejok Dios. Ok yab eb yail bay tu' yet c'ualil, c'al yet ak'balil yin tojbalk'inal.

¹¹Lajwi tu', max wilon jun miman trono caw wal sak, yetok jun Cham chotan ay yul. Pilan max c'ayil sat tx'otx' c'al satcan satak Cham chotan ay yul jun miman trono tu'. C'amxa jabok c'ajil max txeclojcanok.

¹²Max wilon c'apax yin masanil eb camnak, tol lecan oc eb masanil satak Dios, eb mimanbil c'al eb c'am yelapnok. Lajwi tu', max jaklay juntzan tx'an libro, cax ay junxa tx'an max jaklay c'apaxtok, a ton tx'an libro yet k'inalej tol ayc'al yin tojbalk'inal, cax max beyc'ulnelay tzetak yetal max el yunen junjun eb camnak tu', atac'ala' tzet tz'ibbil ay yul juntzan libro tu'.

¹³Cax max bekon eltek a' mar masanil eb camnak ay bay. Ac'ala' c'apax camich, c'al cajlub pixan eb camnak, pilanc'al max bekiltek jantak camnak ayic' bay, cax max beyc'ulnelay eb masanil, atac'ala' tzet max el yunen junjun eb.

¹⁴A camich tu', c'al cajlub pixan eb camnak tu', max k'oklaycantok nan xol jun miman k'ak' chi nilxi, lajan yili axca junok miman najab. A jun k'ak' tu', a ton jun tu' chi ikon yet is cab camich.

¹⁵Masanil mac man tz'ibok yayji bi yul tx'an libro yet k'inalej tol ayc'al yin tojbalk'inal tu', ac'al tu' max k'oklaycantok eb.