Read Q'anjob'al Ap 3 Bible Online

Ap 3 - Q'anjob'al bible

Ap 3

¹Max yalon c'apax Cham ayin: Tix chot a tz'ibentok ti' bay jun in chekbej ayic' nan xol iglesia bay conob Sardis: A Cham ayoc ukwan Yespíritu Dios yin, Cham ibil aj ukeb waycan yuj, a Cham chi alon ayex axca ti': Wojtak masanil tzet chi el e yuneni. Wojtak tol a yul sat eb e yet animail, caw iquis ex sic'libil. Palta a yul in sat, camnak ex elok.

²Yuj tu', naek e ba. Caxc'al ayto wal jabokxa e watx' beybal chi wila', palta ijan wal ok lajwokxac'al ayok. Yuj tu', ak'ek wal e yip e yunen juntzan tu', yet watx' c'am chi texac'al lajwi ayok. Chi waltok juntzan ti' ayex, yujtol a juntzan tzet lanan el e yuneni, man watx'ok yul sat in Diosal.

³Yuj tu', naektek juntzan cuybanilej max e yaoc yin e c'ul yet yalan. Naek e ba, aek oc e nabal yin junelxa. Ta c'am chex makwaji, ok in jay ayex. Axca chi yun jay junok elk'om, tol c'am mac ojtakneni janic' chi jayi, axca tu' ok yun in jay ayex.

⁴Palta ay jaywan ex bay Sardis tu', tol maj ex etax elok. Axca junok mac c'am jabok bay chi tz'ilnejtok is pichil, cayex tu'. Yuj tu', ok oc e pichil caw sak sic'libil, cax ok ex ec' wetok, yujtol e moj toni.

⁵A eb ok yak' techajok, ok alay oc junjun is pichil eb caw wal sak. Man ok in joc'ay bi eb yul tx'an libro yet k'inalej, tol ayc'al yin tojbalk'inal. Ok walaj satak in Mam, c'al satak eb is yángel, tol wet eb.

⁶¡Masanilc'al mac chi aben juntzan ti', yacbajokab eb txiquin bay tzet chi yal Cham Espíritu bay junjun iglesia! cha tz'ibejtok, ẍi Jesús.

⁷Max yalon c'apax Cham ayin: Tix chot a tz'ibentok ti' bay jun in chekbej ayic' nan xol iglesia bay conob Filadelfia: A Cham caw watx'c'al, Cham caw yel, Cham inej aj is lawe cham rey David, Cham a yet chi jakoni, c'am mac comonc'al chi je' makcheni, axa yet chi makcheni, c'am mac comon chi je' jakoni, a Cham chi alon ayex axca ti':

⁸Wojtak masanil tzet chi el e yuneni. Ay jun puerta max in jak e satak. C'am mac comon chi je' makcheni. Wojtak, caxc'al txennej e tec'anil, palta yikem ex bay in k'anej. C'am bay max e yala' tol mayin e yojtakok.

⁹Yuj tu', a eb ayoc yin wajayil yet Satanás, eb chi yaloc ba israelal, ok watok eb ayex, cax ok ay jajan eb e satak. Ok wut eb axca tu', yet watx' chi nachaj el yuj eb, tol camc'ulnebil ex wuj.

¹⁰Max e yikej in chekbanil, yet max walon ayex tol caw che tec'baj e ba. Yuj tu', ok ex in taynej yul k'ab jun miman yailal ok jay yuj yak'on porobal masanil anima bay yulyibank'inal ti'.

¹¹Toxa ok in jayok. Yuj tu', ac'ala'okabc'al watx' che yut e beybal, axcac'alta' che beybalnej, yet watx' c'am mac ok je' yion ec' e paktzebal.

¹²A eb ok yak' techajok, axca juntzan yoyal yul yatut in Diosal, axca tu' ok yun yeloc eb wuj, yujtol c'am bak'in ok eltek bay tu'. Ok in tz'ibej oc bi in Diosal yin eb, c'al bi is conob Cham, a ton jun ac' Jerusalén ok ayol satcan, bay ayic' in Diosal tu', cax ok in tz'iben c'apax oc in ac' bi yin eb.

¹³¡Masanilc'al mac chi aben juntzan ti', yacbajokab eb txiquin bay tzet chi yal Cham Espíritu bay junjun iglesia! cha tz'ibejtok, ẍi Jesús.

¹⁴Max yalon c'apax Cham ayin: Tix chot a tz'ibentok ti' bay jun in chekbej ayic' nan xol iglesia bay conob Laodicea: A Cham caw yel, Cham caw watx' chi yut yak'on ba testigoal, tol asan yel chi yala', asannej Cham watx'nenej masanil tzetak yetal yet Dios. A Cham chi alon ayex axca ti':

¹⁵Wojtak masanil tzet chi el e yuneni. Lajan ex axca junok tzet chi loji man sicok, tamwal k'axan. Matawal sic ex; ta c'amak xin, matawal k'axan ex.

¹⁶Akxa tinani' lajan ex axca junok tzet yetal tol sic labinak; yuj tu', axca wal tol ok ex in xayej elok.

¹⁷Yujtol lanan e yalon axca ti': Ayon ti', caw beyom on. Caw watx' on. C'am tzet chi majax ayon, quex chi, che yaloni. Palta c'am jabok chi nachaj el e yuj, tol axca wal junok mac c'am jabok tzet ay, c'am chi je' yilwi, cax t'iran elok, cayex wal tu'.

¹⁸Yuj tu', chi wal ayex, watx'nejek wal e ba. Ta che watx'nej e ba, axca wal tol ok e man oro txicbilxa el is tz'ilal ayin, yet watx' ok e cha' e beyomal wal yin yel. Axca tol ok e man c'apax jun e pichil caw wal sak ayin, yet watx' c'amxa chex q'uixwi, ilab tol axca tol t'iran ex elok. Yetok c'apaxok, axcaok tol ok e man yanil e sat ayin, yet watx' chex ilwi.

¹⁹A masanil mac chi cam in c'ul yin, chin tenchanej eb, cax chi waon c'apax oc yailal eb. Yuj tu', naek wal e ba, cax che yaon oc e nabal win.

²⁰Abek. Axca wal tol lanan wawji octok ti' puerta. Ta ay mac chi aben wawji octok, cax chi jakon is puerta tu' ayin, ok in octok yetok. Ok in low yetok, cax ok low c'apax wetok.

²¹A eb ok yak' techajok, ok in chotbaj ay eb bay in despacho wetok, axca c'apax max yun wak'on techajok, xan max in ay chotan yetok in Mam bay is despacho.

²²¡Masanilc'al mac chi aben juntzan ti', yacbajokab eb txiquin bay tzet chi yal Cham Espíritu bay junjun iglesia! cha tz'ibejtok, ẍi Jesús ayin.