Read Q'anjob'al Ap 6 Bible Online

Ap 6 - Q'anjob'al bible

Ap 6

¹Cax max wilon nic'on el Cham chi yik Calnel tu' jun babel sello. Max lajwi tu', max waben yalon junok eb querubín tu', axca wal nilili bil c'u, caytu' yoc yul nuk', yet max yalon axca ti': Sebach, ẍi.

²Cax max wiloni, tol ay jun sakyin chej, cax ayaj jun mactxel yiban, ay jun julbal ibil aj yuj. Max ak'lay jun is corona. Lajwi tu', max toj yak'on owal, yuj yak'on ayc'ayok.

³Axa yet max nic'on el Cham chi yik Calnel tu' jun yet is cab sello xin, cax max waben yalon jun yet is cab querubín axca ti': Sebach, ẍi.

⁴Ay junxa chej, cakyin yili max wila'. A jun mac ayaj yiban jun chej tu', max cha' is yikbej yin yion el junc'ulal bay masanil yulyibank'inal, cax chi yak'len cam ba anima. Ay jun miman espada max ak'lay bay.

⁵Axa yet max nic'on el Cham chi yik Calnel tu' jun yet is yox sello, max waben yalon jun yet is yox querubín axca ti': Sebach, ẍi. Cax max wiloni, ay junxa chej k'ekyin yili max wila'. A jun mac ayaj yiban jun chej tu', ay jun libra ibil aj yuj.

⁶Max waben yoc jun aw nan xol eb querubín tu' canwanil axca ti': K'okbil cab libra trigo yin jun denario,*fn* c'al wakebok libra cebada yin jun denario. Manchak etnej aceite yetok vino, ẍi bay.

⁷Axa yet max nic'on el Cham chi yik Calnel tu' jun yet is can sello, cax max waben yalon jun yet is can querubín axca ti': Sebach, ẍi.

⁸Cax max wiloni, ay junxa chej k'anyin yili max wila'. A jun chi yik Camich, a ayaj yiban jun chej tu'. Tzakan oc jun lugar bay ayic' pixan eb camnak yintak. A jun mactxel tu', max ak'lay yikbej yiban jun can makanil anima bay yulyibank'inal. Can makan ok yun eb. Ay jun makan ok mak'lay camok. Ok cam eb yuj owal, yuj wajil, ma yuj ilya', ma xin, yuj no no' ay is may.

⁹Axa yet max nic'on el Cham chi yik Calnel tu' jun yet so' sello, cax max wilon jun altar. A yalan, a tu' ayoctok pixan eb mak'bil cam yujc'al k'anej Dios, yujtol yak'nak ba eb testigoal yin.

¹⁰Yin ipejal max yalon eb axca ti': Ach Jajawil, watx' ach tonc'alta'a. Chic'al yun tzet chala'. ¿Bak'in ok a beyc'ulnej eb aj yulyibank'inal yuj co camichal on, cax ok eon ec' co pak bay eb? ẍi eb.

¹¹Catatu' max ak'lay junjun sak pichil eb. Max al-lay bay eb tol chi xew eb jabokxa, masantac'al chi tz'aknaj bisil eb yet creyenteal eb t'inan mak'lay cam axca eb tu', eb yak'omal serbil Cristo yetok eb.

¹²Axa yet max wilon nic'on el Cham chi yik Calnel tu' jun yet is wak sello, max ec' jun miman quixcab caw ow. Max k'ekk'olil c'u, axca junok k'ek k'apej. Axa xajaw, max cakbi el sic'libil axca chic'.

¹³Cax max titc'ay c'otlajbok waycan satcan, max ayc'ay bay yulyibank'inal, axca chi yun titc'ay c'otlajbok sat te higo tzunanxa chi k'inbi yuj mimek cak'ek'.

¹⁴Axca chul-lay aj junok un, axca tu' max yun c'aylay el satcan. Masanil tzalanlak, c'al tx'otx' tx'otx' oyquiẍtak can nanlak a' aej, maxc'al bili, max el tx'otx' bay ayic'ok.

¹⁵A eb rey bay yulyibank'inal, max c'ubaj el ba eb yulak mimek nach'en, yetok xolak ch'en bay tzalanlak. Cay c'apax tu' max yut ba masanil eb mimek winak, eb beyom, eb yajaw, c'al eb ay yelapnok. Caxc'al eb mosejal yayji, c'al eb yet ba, max toj eb elaj masanil.

¹⁶Max c'oli yalon eb yuj tzalanlak c'al yuj ch'en mimek nach'en tu' axca ti': Matawal chi titcan jiban, cax chon is c'uban el satak Cham chotan ay yul is trono, yujtol a yowal c'ul Cham chi yik Calnel, caw c'am chi jochej chi jay jiban.

¹⁷Yujtol max jay jun c'ual caw miman yelapnok, yet chi yatek Dios yowal c'ul jiban. ¿Mac ok techaj jun c'ual tu' yuj? ẍi eb.